.jpg)
សកម្មភាពកម្មករកំពុងលើកដាក់ស៊ីម៉ងត៍បន្ទាប់ពីបានដឹកមកដល់ភ្នំពេញនាពេលកន្លងមក។ ហេង ជីវ័ន
ភ្នំពេញៈ ក្រុមហ៊ុន Siam Cement Group (SCG) បានបង្ហាញប្រតិបត្តិការដ៏រឹងមាំរបស់ខ្លួននៅក្នុងទីផ្សារកម្ពុជា នៅត្រីមាសទី១ ឆ្នាំនេះ ដោយប្រាក់ចំណូលបានពីការលក់ កើនឡើង ៩ ភាគរយនៅអំឡុងពេលនេះ។
សេចក្ដីប្រកាសព័ត៌មានរបស់ក្រុមហ៊ុននេះបានឲ្យដឹងកាលពីម្សិលមិញថា ក្រុមហ៊ុន SCG Cambodia បានរាយការណ៍ប្រាក់ចំណូលបានពីការលក់ចំនួន ១១០ លានដុល្លារ ក្នុងអំឡុងពេល ៣ ខែដំបូងឆ្នាំ ២០១៩ កើនឡើង ៩ ភាគរយធៀបនឹងរយៈពេល ដូចគ្នាកាលពីឆ្នាំ ២០១៨។
របាយការណ៍បន្ថែមថា ទ្រព្យសកម្មរបស់ក្រុមហ៊ុននេះកាលពីចុងខែមីនា ឆ្នាំនេះបានកើនឡើងដល់ ៣៥៦ លានដុល្លារ កើនឡើង ៩ ភាគរយកាលពី ចុងខែ មីនា ឆ្នាំ ២០១៨។
ក្រុមហ៊ុន SCG ទើបតែបានដាក់ឲ្យដំណើរការនូវកម្មវិធី «ដំណោះស្រាយផ្ទៃក្នុង» ដោយអះអាងថា កម្មវិធីនេះនឹងផ្តល់អត្ថប្រយោជន៍បន្ថែមទៀតដល់អតិថិជន ដែលកំពុងតែត្រូវការសេវាច្រកចេញចូលតែមួយ ចាប់ពីការរចនាម៉ូដ សំណង់ រហូតដល់ការតុបតែង។
លោក ស៊ុមវ៉ាង មែនភិមុណឆៃ អគ្គនាយក SCG ប្រចាំកម្ពុជាបានលើកឡើងថា៖ «ដំណោះស្រាយនេះ គឺជាការពង្រីកបន្ថែមនៃការផ្តល់ជូនរបស់ ក្រុមហ៊ុន SCG ដែលមានគោលបំណងក្នុងការជួយធ្វើឲ្យជីវិតកាន់តែល្អប្រសើរសម្រាប់អតិថិជនកម្ពុជា»។
ក្រុមហ៊ុននេះមិនបានផ្ដល់ព័ត៌មានលម្អិតប្រាក់ចំណេញដែលប៉ាន់ប្រមាណរបស់ខ្លួននៅរយៈពេល ៣ ខែដំបូងឆ្នាំនេះទេ។ កាលពីឆ្នាំមុន ក្រុមហ៊ុន SCG Cambodia បានទទួលចំណូលពីការលក់ចំនួន ៣៩៦ លានដុល្លារកើន ១៥ ភាគរយធៀបនឹងឆ្នាំ ២០១៧៕LA
