ភ្នំពេញៈ ទេសចរចិននៅតែបន្តឈានមុខគេនៃភ្ញៀវទេសចរបរទេសដែលបានធ្វើដំណើរមកកម្ពុជាក្នុងរយៈពេល ៩ ខែដំបូងឆ្នាំនេះ ជាមួយនឹងកំណើនជិត ៣០ ភាគរយ បើធៀបទៅនឹងរយៈពេលដូចគ្នាកាលពីឆ្នាំ ២០១៨។ នេះបើយោងទិន្នន័យពីក្រសួងទេសចរណ៍។
របាយការណ៍របស់ក្រសួងទេសចរណ៍ដែលចេញផ្សាយកាលពីល្ងាចថ្ងៃពុធ បង្ហាញថាក្នុងរយៈពេល ៩ ខែឆ្នាំ ២០១៩ កម្ពុជាទទួលបានភ្ញៀវទេសចរបរទេសសរុប ៤,៨១ លាននាក់ កើនឡើង ១០ ភាគរយ បើធៀបនឹងរយៈពេលដូចគ្នាក្នុងឆ្នាំ ២០១៨ ក្នុងនោះចំនួនភ្ញៀវទេសចរចិនបាននាំមុខគេដោយមាន ១,៨៦ លាននាក់ កើនឡើង ២៩,៤ ភាគរយ ពីចំនួន ១,៤៤ លាននាក់ ឬស្មើនឹង ៣៨,៧ ភាគរយ នៃចំនួនភ្ញៀវទេសចរបរទេសសរុបមកកម្ពុជាក្នុងរយៈពេល ៩ ខែនេះ។
ភ្ញៀវទេសចរវៀតណាមស្ថិតនៅលេខ ២ ដែលមានចំនួនភ្ញៀវទេសចរសរុប ៦៣,៧ ម៉ឺននាក់ កើនឡើង ៩,១ ភាគរយ និងលេខ ៣ ជនជាតិថៃមានចំនួន ២៨,១ ម៉ឺននាក់ កើន ២២,៤ ភាគរយ។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ភ្នំពេញប៉ុស្ដិ៍ពីថ្ងៃម្សិលមិញថា ទោះបីចំនួនភ្ញៀវទេសចរបរទេសដែលមកទស្សនាខេត្តសៀមរាបធ្លាក់ចុះបន្តិច តែជារួមចំនួនភ្ញៀវបរទេសនៅតែមានភាពល្អប្រសើរ ដែលធ្វើឲ្យក្តីរំពឹងទុករបស់ក្រសួងទេសចរណ៍នឹងអាចសម្រេចបានតាមផែនការកំណើនលេខ ២ ខ្ទង់ជារៀងរាល់ឆ្នាំ។
លោកថ្លែងថា៖ «កំណើននេះគឺមានភាពប្រហាក់ប្រហែលនឹងការព្យាកររបស់ក្រសួង ដែលរំពឹងថានឹងទទួលបានភ្ញៀវទេសចរអន្តរជាតិ ៦,៦ លាននាក់ក្នុងឆ្នាំ ២០១៩ នេះ»។ លោកបន្តថា ទោះបីចំនួនភ្ញៀវទេសចរបរទេសមួយចំនួនដូចជា កូរ៉េ និងឡាវ ធ្លាក់ចុះបន្តិចក្នុងរយៈពេល ៩ ខែ តែភាពរឹងមាំនៃកំណើនភ្ញៀវទេសចរចិននៅតែធ្វើឲ្យកម្ពុជាអាចរក្សាបាននូវភាពខ្លាំងក្នុងវិស័យទេសចរណ៍ដដែល។
របាយការណ៍បានឲ្យដឹងថាក្នុងរយៈពេល ៩ ខែ ភ្ញៀវទេសចរបរទេសដែលមកដល់កម្ពុជាតាមជើងហោះហើរមានចំនួនសរុប ៣,៣៩ លាននាក់ កើន ១៤,៧ ភាគរយ បើធៀបនឹងរយៈពេលដូចគ្នាឆ្នាំ ២០១៨ក្នុងនោះភ្ញៀវចូលតាមអាកាសយានដ្ឋានអន្តរជាតិភ្នំពេញមានកំណើន ១២,៧ ភាគរយ ព្រលានយន្តហោះខេត្តព្រះសីហនុមានកំណើន ៣០៨ ភាគរយ ខណៈព្រលានខេត្តសៀមរាបបានធ្លាក់ចុះ ១០,៩ ភាគរយ។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានសាទរចំពោះកំណើននេះ ប៉ុន្តែអ្នកស្រីអះអាងថា កំណើននេះនៅទាបជាងអ្វីដែលវិស័យឯកជនចង់បានដែលទាមទារឲ្យគ្រប់ផ្នែកទាំងអស់ត្រូវខិតខំធ្វើការងារឲ្យខ្លាំងបន្ថែមទៀត។
អ្នកស្រីបន្តថា បើទោះបីជាចំនួនភ្ញៀវចិនមានការកើនឡើងខ្ពស់ ប៉ុន្តែការធ្លាក់ចុះចំនួនភ្ញៀវទេសចរជនជាតិបរទេសផ្សេងទៀត (កូរ៉េ ឡាវ និងអាមេរិក) វាក៏មិនមែនជាព័ត៌មានល្អប៉ុន្មានទេ។ អ្នកស្រីថ្លែងថា៖ «យើងស្ថិតក្នុងការព្រួយបារម្ភខ្លះដែរ ព្រោះអ្វីដែលយើងរំពឹងគឺយើងចង់បានច្រើនជាងហ្នឹង»៕