ភ្នំពេញៈ ចំនួនការប្រើប្រាស់សេវាទូរស័ព្ទចល័តរយៈពេល ១១ ខែ ឆ្នាំ ២០១៨ បានកើនឡើងដល់ជាង ១៩,៣ លានស៊ីមកាត កើនឡើង ៣,៧៨ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៧។ នេះបើយោងតាមទិន្នន័យស្តីពីស្ថិតិសេវាទូរគមនាគមន៍ និយតករទូរគមនាគមន៍កម្ពុជា(TRC)។
របាយការណ៍បង្ហាញថា គិតត្រឹមខែវិច្ឆិកា ឆ្នាំ ២០១៨ ចំនួនស៊ីមកាត ដែលផ្តល់ដោយប្រតិបត្តិករទូរស័ព្ទចល័ត ៦ មានចំនួន ១៩ ៣០១ ៥០២ ស៊ីមកាត ស្មើនឹង ១២០,១១ ភាគរយនៃចំនួនប្រជាជនសរុប ដែលមានជាង ១៦ លាននាក់។ ទិន្នន័យបានបង្ហាញថា ចំនួននេះបានកើនឡើងពីចំនួន ១៨ ៥៩៧ ៧៤៣ ស៊ីមកាត ក្នុងរយៈពេលដូចគ្នាកាលពីឆ្នាំ ២០១៧។
លោក អ៊ឹម វុត្ថា អ្នកនាំពាក្យនិយតករទូរគមនាគមន៍កម្ពុជាបានប្រាប់ថា ចំនួនស៊ីមកាត ដែលបានប្រតិបត្តិការក្នុងរយៈពេល ២ ឆ្នាំចុងក្រោយនេះបានកើនឡើងតិចតួចប៉ុណ្ណោះ ព្រោះស្ថិតនៅក្នុងដំណាក់កាលឆ្អែតរួចទៅហើយ ដោយខុសគ្នាកាលពីអំឡុងឆ្នាំ ២០១៣-២០១៥ ដែលចំនួនស៊ីមកាតបានកើនឡើងយ៉ាងខ្ពស់រហូតដល់ជាង ២០ លានស៊ីមកាត។
លោកថ្លែងថា៖ «ដោយសារក្រុមហ៊ុននីមួយៗចង់លើកទឹកចិត្តឲ្យអតិថិជនប្រើប្រាស់ប្រព័ន្ធរបស់ខ្លួនឲ្យបានច្រើន តាមរយៈការផ្តល់នូវតម្លៃដ៏ថោកសម្រាប់ការខលក្នុងប្រព័ន្ធតែមួយ»។
ទិន្នន័យបានបង្ហាញថា ការប្រើប្រាស់ស៊ីមកាតនៅកម្ពុជាបានកើនឡើងខ្ពស់នៅក្នុងឆ្នាំ ២០១៥ ដោយមានចំនួន ២០ ៨៥០ ៥៤៣ ស៊ីមកាត។ ចំនួននេះបើធៀបនឹងចំនួនប្រជាជននៅពេលនោះ គឺមានអត្រា ១៣៥,៣៥ ភាគរយ។ ក្រុមហ៊ុនទូរស័ព្ទដែលកំពុងប្រតិបត្តិការនៅកម្ពុជារួមមាន CellCard, Metfone, Smart Axiata, qb, Seatel និង CooTel។
នៅពេលសួរថា តើក្រុមហ៊ុនដ៏ច្រើននេះអាចឈរជើងក្នុងទីផ្សារដ៏តូចរបស់កម្ពុជាបានយូរប៉ុនណា ខណៈការប្រកួតប្រជែងមានកាន់តែខ្លាំងនោះ លោក វុត្ថា លើកឡើងថា រដ្ឋាភិបាលមិនបានកំណត់ពីចំនួនក្រុមហ៊ុនទូរស័ព្ទទេ តែសម្រាប់ទីផ្សារកម្ពុជាដែលមានប្រជាជនប្រហែល ១៦ លាននាក់ វាអាចគ្រប់គ្រាន់ហើយ។
ទោះបីមានប្រតិបត្តិករច្រើនក្នុងទីផ្សារ ដែលជារឿងល្អសម្រាប់អ្នកប្រើប្រាស់ទាក់ទងនឹងតម្លៃ ក៏អ្នកប្រើប្រាស់កំពុងប្រឈមនឹងកាត់ទឹកប្រាក់ក្នុងគណនេយ្យដោយមិនដឹងមូលហេតុពីប្រតិបត្តិករទូរស័ព្ទមួយចំនួនផងដែរ។
លោក អ៊ឹម វុត្ថា និយាយថា៖ «ព័ត៌មាននេះខ្ញុំធ្លាប់បានឮ និងឃើញសរសេរនៅលើបណ្តាញសង្គមហ្វេសប៊ុក តែមិនមានការសរសេរបណ្តឹងជាផ្លូវការមកនិយតករទូរគមនាគមន៍កម្ពុជាទេ។ ទោះបីជាមិនមានការប្តឹងក៏ដោយ តែអាជ្ញាធរតែងធ្វើការពិនិត្យនៅពេលមានព័ត៌មានទាំងអស់នេះកើតឡើង»។
របាយការណ៍របស់ TRC បានបង្ហាញដែរថា បច្ចុប្បន្នកម្ពុជាមានប្រតិបត្តិករសេវាទូរស័ព្ទ អចល័តចំនួន ៧ ដែលមានអ្នកប្រើប្រាស់ចំនួន ៩១ ៣៣១ នាក់ ធ្លាក់ចុះ ២៧,៤៦ ភាគរយ បើធៀបទៅនឹងឆ្នាំ ២០១៧ ដែលមានរហូតដល់ ១២៥ ៩០៨ នាក់។ ប្រតិបត្តិករសេវាអ៊ីនធឺណិតចល័តមាន ៧ ដែលមានអ្នកប្រើប្រាស់ ១២ ៩៧៤ ៣១៩ ស៊ីមកាត កើនឡើង ២២,៧៩ ភាគរយ ខណៈសេវាអ៊ីនធឺណិតអចល័ត ដែលមានប្រតិបត្តិករ ៣៤ មានអ្នកប្រើប្រាស់ ១៤៧ ៥៩៦ នាក់ កើនឡើង ៩,១៦ ភាគរយ។
ទិន្នន័យបង្ហាញថា ប្រជាជនខ្មែរបានបើកគណនីបណ្តាញសង្គមហ្វេសប៊ុក ត្រឹមគិតចុងខែកុម្ភះ ឆ្នាំ ២០១៨ មានប្រមាណ ៦,៨ លានគណនី មានកំណើនឡើង ២ លានគណនី បើធៀបតួលេខចុងឆ្នាំ ២០១៧៕LA