ភ្នំពេញ: ចំនួនស៊ីមកាតដែលបានចុះបញ្ជីបានកើនដល់ជាង ២១ លានស៊ីមកាត កាលពីឆ្នាំមុនកើនជិត ១២ ភាគរយ បើធៀបនឹងឆ្នាំ ២០១៨។ នេះបើតាមរបាយការណ៍របស់និយតករទូរគមនាគមន៍កម្ពុជា។
ទិន្នន័យបង្ហាញថា ចំនួនស៊ីមកាតដែលបានផ្តល់ដោយប្រតិបត្តិករទូរស័ព្ទចល័តទាំង ៦ កាលពីឆ្នាំ ២០១៩ មានចំនួន ២១,៦៣ លានស៊ីមកាត កើនឡើង ១១,៦៣ ភាគរយ បើធៀបនឹងឆ្នាំ ២០១៨។
ចំនួនស៊ីមកាតដែលចុះបញ្ជីនេះស្មើនឹង ១៣៣ ភាគរយ នៃចំនួនប្រជាជនសរុបដែលមានជាង ១៦ លាននាក់ ពោលគឺមនុស្សម្នាក់មានស៊ីមកាតចាប់ពី ២ ឡើងទៅ។
បច្ចុប្បន្នក្រុមហ៊ុនដែលកំពុងប្រតិបត្តិការនៅកម្ពុជា រួមមាន CellCard, Metfone, Smart Axiataqb, Seatel និង CooTel។
លោក អ៊ឹម វុត្ថា អ្នកនាំពាក្យនិយតករទូរគមនាគមន៍កម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា ការកើនឡើងសេវាកម្មឌីជីថល និងកម្មវិធីនៅលើទូរស័ព្ទទំនើបជាមួយនឹងគោលនយោបាយមូលនិធិកាតព្វកិច្ចសកល (USOF) បានរួមចំណែកជំរុញកំណើនការប្រើប្រាស់សេវាទូរស័ព្ទចល័ត។ លោកពន្យល់ថា USOF គឺតម្រូវឲ្យក្រុមហ៊ុនទូរគមនាគមន៍បង់ប្រាក់ ២ ភាគរយ នៃប្រាក់ចំណូលប្រចាំឆ្នាំរបស់ពួកគេជារៀងរាល់ឆ្នាំ។
លោកបន្តថា តាមរយៈគោលនយោបាយមូលនិធិកាតព្វកិច្ចសកលនេះបានផ្តល់លទ្ធភាពដល់រដ្ឋាភិបាលធ្វើការអភិវឌ្ឍហេដ្ឋារចនាសម្ព័ន្ធ និងសេវាកម្មនៅតំបន់ជនបទដែលក្រុមហ៊ុនមិនអាចធ្វើការវិនិយោគបានជាមួយនឹងការលើកកម្ពស់ការសិក្សាស្រាវជ្រាវបច្ចេកវិទ្យាថ្មីក្នុងវិស័យនេះផងដែរ។
លោកថ្លែងថា៖ «កត្តាតម្លៃអ៊ីនធឺណិតសមរម្យ ដោយសារតម្លាភាពនៃការប្រកួតប្រជែង និងមានបណ្តាញនៅក្រោមសមុទ្រផ្ទាល់ខ្លួនជាផ្នែកមួយនៃការខិតខំប្រឹងប្រែងរបស់រដ្ឋាភិបាល»។
ដើម្បីផ្តល់សេវាល្អ និងលឿនរហ័ស ក្រុមហ៊ុនទូរស័ព្ទចល័តឈានមុខក្នុងស្រុកមួយចំនួនបានដាក់ឲ្យដំណើរការសាកល្បងសេវាអ៊ីនធឺណិត 5G។
ក្រុមហ៊ុន រ៉ូយាល់គ្រុបដែលគ្រប់គ្រងក្រុមហ៊ុន CamGSM បានចុះអនុស្សរណៈនៃការយោគយល់គ្នាជាមួយក្រសួងកាលពីខែឧសភាឆ្នាំមុនស្ដីពីកិច្ចសហការ និងការរៀបចំផែនការសម្រាប់ការដាក់ឲ្យដំណើរការ ប្រព័ន្ធ 5G និងការធ្វើឲ្យកម្ពុជាទៅជាលក្ខណៈឌីជីថល។
កាលពីដើមខែកក្កដា ឆ្នាំ ២០១៩ Smart Axiata ជាក្រុមហ៊ុនទូរគមនាគមន៍ទូរស័ព្ទចល័តឈានមុខគេរបស់ប្រទេស កម្ពុជា បានដាក់សាកល្បងប្រព័ន្ធ 5G លើកដំបូងដល់អតិថិជនរបស់ខ្លួន។ ក្រុមហ៊ុន Smart Axiata បច្ចុប្បន្នបម្រើអតិថិជន ៨ លាននាក់។
របាយការណ៍នេះបង្ហាញថា ការប្រើប្រាស់អ៊ីនធឺណិតចល័តក៏បានមើលឃើញការកើនឡើងរហ័សផងដែរ អតិថិជន ១៦,១២ លាននាក់ ប្រើប្រាស់ទូរស័ព្ទចល័តដើម្បីទទួលបានមាតិកាអនឡាញកាលពីឆ្នាំមុនកើនឡើង ១៨,៤៧ ភាគរយ។
ទិន្នន័យនេះក៏បង្ហាញថា អ្នកប្រើប្រាស់ទូរស័ព្ទចល័តលើតុបានធ្លាក់ចុះ ៣៥ ភាគរយមកនៅត្រឹម ៥៧ ៤៣៨ នាក់ និងអ្នកប្រើប្រាស់អ៊ីនធឺណិតភ្ជាប់ខ្សែចំនួន ២២៤ ១០៤ នាក់កើនឡើង ៤៦ ភាគរយ។
ទិន្នន័យនេះបានឲ្យដឹងថា ចំនួនគណនី Facebook ដែលចុះឈ្មោះក៏បានកើនឡើង ២៩ ភាគរយ ដល់ ៨,៨ លានគណនីផងដែរកាលពីឆ្នាំមុន៕LA