The Phnom Penh Post Search

Search form




Logo of Phnom Penh Post newspaper Phnom Penh Post - ចំនួន​រោងចក្រ​កាត់​ដេរ​នៅ​ឆ្នាំ ២០១៣ កើន​ឡើង

ចំនួន​រោងចក្រ​កាត់​ដេរ​នៅ​ឆ្នាំ ២០១៣ កើន​ឡើង

ចំនួន​រោងចក្រ​កាត់​ដេរ​នៅ​ឆ្នាំ ២០១៣ កើន​ឡើង

20140225_11
កម្មករដែលកំពុងធ្វើការនៅក្នុងរោងចក្រកាត់ដេរមួយនៅជាយក្រុងភ្នំពេញនាពេលកន្លងមក ផា លីណា

ភ្នំពេញៈ របាយការណ៍​ពី​ក្រសួង ការងារ​បណ្តុះ​បណ្តាល និង​វិជ្ជាជីវៈ​បង្ហាញ​ថា ចំនួន​រោងចក្រ​សរុប​នៅ​កម្ពុជា​ក្នុង​ឆ្នាំ ២០១៣ បាន​កើន​ដល់ ៩៦០ រោងចក្រ​កើន ៣១,៨១ ភាគរយ​ធៀប​នឹង​ឆ្នាំ ២០១២។

អ្នក​នៅ​ក្នុង​ឧស្សាហកម្ម​នេះ​បាន​អះអាង​ថា តួលេខ​នេះ​ជា​កំណើន​ពី​ខែ មករា ដល់​ខែ មិថុនា ឆ្នាំ ២០១៣ ប៉ុណ្ណោះ ជា​ពេល​ដែល​សេដ្ឋកិច្ច​នៅ​ល្អ។ ពួកគេ​បង្ហាញ​ពី​ការ​ព្រួយ​បារម្ភ​ថា ចំនួន​រោងចក្រ​នៅ កម្ពុជា អាច​នឹង​ថយ​ចុះ​នៅ​ឆ្នាំ​នេះ បើ​ស្ថានភាព​នៅ​តែ​តានតឹង។

លោក ជាតិ ខេមរា មន្ត្រី​ជាន់​ខ្ពស់​នៃ​សមាគម​រោងចក្រ​កាត់ដេរ​នៅ​កម្ពុជា (GMAC) បាន ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា តួលេខ​នេះ​ជា​កំណើន​ប្រចាំ​ឆ្នាំ ហើយ​អាច​នឹង​កើន​ខ្ពស់​ជាង​នេះ​ប្រសិន​បើ​មិន​មាន​បញ្ហា​កូដកម្ម​កើត​ឡើង​នោះ​ទេ។ លោក​បន្ត​ព្យាករ​ថា ប្រសិន​បើ​ស្ថានភាព​នៅ​តែ​មាន​ភាព​តាន​តឹង​នោះ​ចំនួន​រោងចក្រ​អាច​នឹង​ថយ​ចុះ​នៅ​ក្នុង​ឆ្នាំ ២០១៤ នេះ។

លោក​ថ្លែង​ថា៖ «វា​អាច​មាន​ការ​ថយ​ចុះ ព្រោះ​រាល់​ថ្ងៃ​វា​មិន​កើន​ទេ។ វា​ជា​តួលេខ​កំណើន​ប្រចាំ​ឆ្នាំ ប៉ុន្តែ​បើ​មើល​ប្រចាំ​ខែ តួលេខ​នៃ​រោងចក្រ​ដែល​ចុះ​បញ្ជី​គឺ​ធ្លាក់​ចុះ​ចាប់​តាំង​ពី​ខែ កក្កដា រហូត​មក​ដល់​ពេល​នេះ​ការ​ចុះ​បញ្ជី​នៅ​តែ​ធ្លាក់​ចុះ ឬ​មាន​កំណើន​យឺត»។

លោក​បន្ត​ថា ប្រសិន​បើ​មិន​មាន​ការ​ស្ទះ​ដំណើរការ​ផលិតកម្ម​ដោយ​សារ​បញ្ហា​កូដកម្ម​នោះ​ទេ តួលេខ​អាច​ឡើង​ខ្ពស់​ជាង​នេះ។ លោក​ពន្យល់​ថា កំណើន​នៃ​ចំនួន​រោងចក្រ​នៅ កម្ពុជា គឺ​ដោយ​សារ​វិបត្តិ​កើត​មាន​នៅ​ក្នុង​វិស័យ​កាត់ដេរ​នៅ​ប្រទេស បង់ក្លាដែស នៅ​ពេល​ដែល​មាន​ការ​បាក់​រលំ​អគារ​រោងចក្រ​បណ្តាល​ឲ្យ​អាក់​ខាន​ដល់​ដំណើរការ​ផលិត​និង​បាន​សម្លាប់​កម្មករ​ជាច្រើន​ពាន់​នាក់​កាល​ពី​ខែ ឧសភា ឆ្នាំ ២០១៣ និង​ចំ​ពេល​ដែល​ប្រាក់​ឈ្នួល​កម្មករ​នៅ​ប្រទេស ចិន មាន​ការ​កើន​ឡើង​ដែល ធ្វើ​ឲ្យ​ប្រទេស កម្ពុជា ជា​ទិសដៅ​ប្រសើរ​មួយ​សម្រាប់​ការ​វិនិយោគ។

លោក ជាតិ ខេមរា លើក​ឡើង​ថា រោងចក្រ​ប្រឈម​នឹង​ការ​បិទ​ទ្វារ​ប្រសិន​បើ​ដំណើរការ​ផលិតកម្ម​ត្រូវ​រំខាន​ដោយ​សារ​កូដកម្ម​នៅ​តែ​បន្ត​កើត​មាន។

កូដកម្ម​ទាមទារ​ដំឡើង​ប្រាក់​ខែ​អប្បបរមា​របស់​កម្មករ​រោងចក្រ​កាត់ដេរ​ផ្ទុះ​ឡើង​ចាប់​ពី​អំឡុង ខែ កញ្ញា រហូត​មក​ដល់​ពេល​បច្ចុប្បន្ន។ គិត​ត្រឹម​ខែ វិច្ឆិកា ឆ្នាំ ២០១៣ ចំនួន​កូដកម្ម​សរុប​មាន ១៣១ ករណី ជា​តួលេខ​កត់​ត្រា​ដោយ​សមាគម​រោងចក្រ​កាត់​ដេរ​កម្ពុជា។

កាល​ពី​ថ្ងៃ​ពុធ សប្តាហ៍​មុន លោក វ៉ាន់ ស៊ូអៀង ប្រធាន​សមាគម រោងចក្រ​កាត់ដេរ​នៅ​កម្ពុជា​បាន​ប្រាប់​សារព័ត៌មាន​ក្នុង​ស្រុក​ជា​ការ​ព្រមាន​ថា រោងចក្រ​ចំនួន ៨០ ភាគរយ​នឹង​ត្រូវ​បិទ​ទ្វារ ហើយ​មួយ​ចំនួន​នឹង​ត្រូវ​ដក​ចេញ​កាន់​ទៅ​ប្រទេស​ផ្សេង ប្រសិន​បើ​កម្មករ​បន្ត​ទាមទារ​ដំឡើង​ប្រាក់​ឈ្នួល​ដល់ ១៦០ ដុល្លារ​ជា​ការ​ឆ្លើយ​តប​ទៅ​នឹង​គម្រោង​ធ្វើ​កូដកម្ម​របស់​សហជីព​នៅ​ទូទាំង​ប្រទេស​នៅ​ថ្ងៃ ទី១២ មីនា ខាង​មុខ​នេះ។

លោក ស៊ូអៀង បាន​ហៅ​ការ​ទាមទារ​ថា មិន​សម​ហេតុ​ផល ហើយ​អាច​នាំ​មក​នូវ​គ្រោះថ្នាក់​ដល់​វិស័យ​វាយនភ័ណ្ឌ​នៅ​កម្ពុជា។ លោក​និយាយ​សំដៅ​ដល់​ការ​ទាមទារ​ប្រាក់​ខែ ១៦០ ដុល្លារ​របស់​កម្មករ ដែល​លោក​ថា ហួស​ពី​សមត្ថភាព​របស់​និយោជក​អាច​ផ្តល់​ឲ្យ។ លោក វ៉ាន់ ស៊ូអៀង បាន​អះអាង​កាល​ពី​ដើម​ខែ មករា ឆ្នាំ ២០១៤ ថា រោងចក្រ​នៅ​កម្ពុជា​ខាត​បង់​ថវិកា​ប្រមាណ ២០០ លាន​ដុល្លារ​ពី​ការ​ធ្វើ​កូដកម្ម​កន្លង​មក​នេះ។

Content image - Phnom Penh Post

ប្រធាន​សហជីព​សេរី​កម្មករ​លោក ជា មុនី និយាយ​កាល​ពី​ម្សិលមិញ​ថា លោក​យល់​ថា ការ​ដក​ខ្លួន​ចេញ​របស់​រោងចក្រ​ពី កម្ពុជា ដោយ​សារ​កូដកម្ម​ទាមទារ​ប្រាក់​ឈ្នួល​របស់​កម្មករ​ជា​រឿង​ដែល​មិន​អាច​ទៅ​រួច​នោះ​ទេ។

លោក​បាន​ថា៖ «រោងចក្រ​នឹង​មិន​ចាក​ចេញ​ពី កម្ពុជា ដោយ​សារ​តម្លៃ​នៃ​កូដកម្ម​ទាមទារ​ប្រាក់​ឈ្នួល​អប្បបរមា​នោះ​ទេ។ ខ្ញុំ​ដោះស្រាយ​វិបត្តិ​ជូន​កម្មករ ១០ឆ្នាំ ហើយ​តាំង​ពី ៤៥ ដុល្លារ​មក​មិន​ឃើញ​មាន​រោងចក្រ​ណា​មួយ​ចេញ​ពី​ស្រុក​ខ្មែរ​ទេ»។

លោក​បន្ត​ថា៖ «រោងចក្រ​មាន​តែ​កើន​ឡើង។ យើង​ត្រូវ​ដឹង​ថា ចំណូល​ពី​វិស័យ​នេះ​កើន​តាំង​ពី ១ ពាន់​លាន​រហូត​ដល់ ៥ ពាន់​លាន។ ចំណែក​អ្នក​បញ្ជា​ទិញ​រឹត​តែ​ជំរុញ​ឲ្យ​រោងចក្រ​ចរចា​ផ្តល់​តម្លៃ​ប្រាក់​ឈ្នួល​សមរម្យ​ដល់​កម្មករ»។

លោក កែន រដ្ឋា អ្នក​នាំ​ពាក្យ​ក្រសួង ពាណិជ្ជកម្ម បាន​ឲ្យ​ដឹង​ថា រដ្ឋាភិបាល​មាន​ភារកិច្ច​គិត​គូរ​ពី​ជីវភាព​របស់​ប្រជា​ពលរដ្ឋ ប៉ុន្តែ​ក៏​ត្រូវ​គិត​គូរ​ពី​ភាព​ប្រកួត​ប្រជែង​សម្រាប់​វិស័យ​កាត់ដេរ ជាមួយ​នឹង​ប្រទេស​នៅ​ក្នុង​តំបន់​ផង​ដែរ។

លោក​ថា៖ «ធម្មតា​ការ​ដំឡើង​ប្រាក់​បៀវត្សរ៍​កម្មករ​គឺ​អាស្រ័យ​លើ​កម្រិត​ប្រកួត​ប្រជែង​ក្នុង​ចំណោម​រោងចក្រ។ អ្នក​វិនិយោគ​គឺ​គេ​ពិចារណា​លើ​ជំនាញ និង​តម្លៃ​ចំណាយ​សម្រាប់​ប្រាក់​ខែ​របស់​កម្មករ។ មិន​អាច​ដំឡើង​ប្រាក់​ខែ​ហួស​ពេក ដែល​ធ្វើ​ឲ្យ​រោងចក្រ​រត់​ចេញ​ពី​កម្ពុជា​ទេ»។

លោក​បញ្ជាក់​ថា ក្រសួង ពាណិជ្ជកម្ម មាន​ផែនការ​ក្នុង​ការ​ទាក់​ទាញ​អ្នក​វិនិយោគ​រួច ហើយ។ លោក​បន្ត​ថា៖ «អ្នក​វិនិយោគ​គេ​មិន​មើល​តែ​ទៅ​លើ​បញ្ហា​នយោបាយ​តែ​មួយ​មុខ​នោះ​ទេ ហេដ្ឋា​រចនា​សម្ព័ន្ធ និង​ច្បាប់​ពាក់​ព័ន្ធ​នឹង​ការ​វិនិយោគ​ក៏​ជា​អ្វី​ដែល​គេ​សម្លឹង​មើល​ដែរ។ កម្ពុជា​យើង​មាន​អំណោយ​ផល​ល្អ​ក្នុង​ការ​ទាក់​ទាញ​ការ​វិនិយោគ»។

លោក Hiroshi Suzuki អ្នក​សេដ្ឋកិច្ច ជាន់​ខ្ពស់​ប្រចាំ​វិទ្យាស្ថាន​ស្រាវជ្រាវ​ពាណិជ្ជកម្ម​នៅ​កម្ពុជា បាន​និយាយ​ក្នុង​បទ​សម្ភាស​ជាមួយ ភ្នំពេញ ប៉ុស្តិ៍ កាល​ពី​ដើម​ខែ មករា ថា៖ «បើ​យើង​មើល​ចំណូល​ដែល​បុគ្គលិក​កម្ពុជា​ម្នាក់​ទទួល​បាន​ហើយ​ធៀប​នឹង​ចំណូល​របស់​បុគ្គលិក ចិន និង ថៃ ទោះ​បី​ជា​បុគ្គលិក​រោងចក្រ​កាត់ដេរ​កម្ពុជា​ទទួល​បាន​ការ​ដំឡើង​ប្រាក់​ឈ្នួល​ដល់ ១៦០ ដុល្លារ​ក៏​នៅ​តែ​មាន​គម្លាត​ឆ្ងាយ​នៅ​ឡើយ។ ប៉ុន្តែ​យើង​ចាំ​បាច់​ត្រូវ​ពិចារណា​លើ​ដៃ​គូ​ប្រកួត​ប្រជែង​ស្រួច​ស្រាល់​របស់​យើង​ដែល​មាន​ដូចជា មីយ៉ាន់ម៉ា ឡាវ និង បង់ក្លាដែស ជាដើម។ យើង​ត្រូវ​ព្យាយាម​រក្សា​តុល្យភាព​នៃ​ប្រាក់​ឈ្នួល​អប្បបរមា និង​ការ​ទាក់​ទាញ​វិនិយោគិន​បើ​មិន​ដូច្នេះ​ទេ កម្ពុជា អាច​មាន​ផល​ប៉ះពាល់»។

តួលេខ​ពី​ក្រសួង ពាណិជ្ជកម្ម បង្ហាញ​ថា ការ​នាំ​ចេញ​សរុប​នៃ​ផលិត​ផល​វាយនភ័ណ្ឌ​មាន ៥,៥ ពាន់​លាន​ដុល្លារ​ក្នុង​ឆ្នាំ ២០១៣ កើន ២០ ភាគរយ​ធៀប​នឹង​ឆ្នាំ ២០១២។ ការ​នាំ​ចេញ​ផលិតផល​វាយនភ័ណ្ឌ​គ្រប​ដណ្តប់ ៨០ ភាគរយ​នៃ​ការ​នាំ​ចេញ​សរុប​របស់ កម្ពុជា៕

អត្ថបទគួរចាប់អារម្មណ៍