ភ្នំពេញ: មន្ត្រីជាន់ខ្ពស់រដ្ឋាភិបាល និងដៃគូអភិវឌ្ឍន៍មានសុទិដ្ឋិនិយមថា ច្បាប់ស្តីពីកិច្ចការពារអ្នកប្រើប្រាស់ដែលបានអនុម័តឲ្យប្រើប្រាស់កាលពីថ្មីៗនេះ នឹងជួយបង្កើនភាពទុកចិត្ត និងទាក់ទាញវិនិយោគិនឲ្យចូលមកវិនិយោគនៅប្រទេសកម្ពុជាកាន់តែច្រើនថែមទៀត។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងនៅក្នុងសិក្ខាសាលាផ្សព្វផ្សាយរបាយការណ៍ថ្នាក់ជាតិស្តីអំពី «កម្រិតយល់ដឹងរបស់អ្នកប្រើប្រាស់នៅកម្ពុជា» និង «គម្រោងការពារអ្នកប្រើប្រាស់ក្នុងតំបន់អាស៊ាន» កាលពីថ្ងៃពុធថា កិច្ចការពារអ្នកប្រើប្រាស់នេះមានគោលបំណងធានាការពារអ្នកប្រើប្រាស់ និងលើកកម្ពស់ការប្រកួតប្រជែងដោយសុចរិត។
លោកបន្តថាច្បាប់នេះមានគោលដៅកំណត់វិធាន និងយន្តការ ដើម្បីរួមចំណែកបង្កើតបរិយាកាសនៃការធ្វើពាណិជ្ជកម្មប្រកបដោយសុចរិត ដែលរួមមានកិច្ចការពារសិទ្ធិ ផលប្រយោជន៍របស់អ្នកប្រើប្រាស់ ព្រមទាំងកសាងនូវទំនុកចិត្តរវាងអ្នកប្រើប្រាស់ជាមួយនឹងពាណិជ្ជករ។
លោកថ្លែងថា៖ «កិច្ចការពារអ្នកប្រើប្រាស់នៃព្រះរាជាណាចក្រកម្ពុជាគឺជាប្រធានបទថ្មី និងមានលក្ខណៈក្មេងខ្ចីនៅឡើយបើធៀបនឹងបណ្តាប្រទេសក្នុងតំបន់ ដូច្នេះនេះជាគំនិតផ្តួចផ្តើមដ៏ល្អក្នុងការចាប់ផ្តើមអនុវត្តច្បាប់ថ្មីនេះដើម្បីការពារអ្នកប្រើប្រាស់»។
លោក Gunter W.Riethmacher នាយកអង្គការ GIZ ប្រចាំនៅកម្ពុជាថ្លែងថា GIZ បាននិងកំពុងសហការជាមួយក្រសួងពាណិជ្ជកម្មកម្ពុជាអស់រយៈពេលជិត ១ ទសវត្សរ៍មកហើយក្នុងការអនុវត្តគម្រោង «អាស៊ានជួយអាស៊ាន» ដើម្បីឆ្ពោះទៅរកការរៀនសូត្រពីបទពិសោធ និងការអនុវត្តល្អនៅក្នុងតំបន់។
លោកថ្លែងថា៖ «យើងពិតជារីករាយដែលដឹងថា ច្បាប់ប្រកួតប្រជែងថ្មីនៃព្រះរាជាណាចក្រកម្ពុជាត្រូវបានបញ្ចប់ និងអនុម័តជាផ្លូវការ»។
លោកបានឲ្យដឹងថា គម្រោង «កិច្ចការពារអ្នកប្រើប្រាស់នៅអាស៊ាន» គឺជាការពង្រឹងប្រព័ន្ធកិច្ចការពារអតិថិជននៅកម្ពុជា និងប្រទេសជាសមាជិកអាស៊ានដែលបានជ្រើសរើស រួមមានការផ្តល់ជំនួយបច្ចេកទេស ដើម្បីពង្រឹងកិច្ចពិភាក្សា និងសហប្រតិបត្តិការក្នុងតំបន់ ការអភិវឌ្ឍក្របខ័ណ្ឌស្ថាប័ន និងច្បាប់ ព្រមទាំងដោះស្រាយវិវាទ។
លោកបន្ថែមទៀតថា៖ «ការការពារអតិថិជនប្រកបដោយប្រសិទ្ធភាព គឺជាការចាំបាច់ក្នុងការបង្កើតបរិយាកាសអាជីវកម្មប្រកបដោយអំណោយផល និងការប្រកួតប្រជែង។ វាបម្រើដើម្បីប្រឆាំងនឹងការអនុវត្តពាណិជ្ជកម្មក្លែងបន្លំ ឬក៏ភាពអយុត្តិធម៌ដែលកំពុងប្រឈមយ៉ាងខ្លាំងនឹងការកើនឡើងនៃប្រតិបត្តិការឆ្លងកាត់ព្រំដែន និងតាមប្រព័ន្ធអ៊ីនធឺណិត»។
លោកឲ្យដឹងទៀតថា៖ «ទន្ទឹមនឹងនេះវាក៏នឹងជួយធានា និងពង្រឹងសិទ្ធិអ្នកប្រើប្រាស់ជាមូលដ្ឋានដែលជាជម្រើសសុវត្ថិភាព តំណាង និងការដោះស្រាយ។ ការលើកកម្ពស់ផលប្រយោជន៍ និងសុខុមាលភាពរបស់អ្នកប្រើប្រាស់គឺជាការប្តេជ្ញាចិត្តយ៉ាងសំខាន់របស់រដ្ឋជាសមាជិកអាស៊ាន»។
យោងតាមលទ្ធផលនៃការស្ទង់មតិលើអ្នកប្រើប្រាស់ចំនួន ២០០ នាក់ ដែលរស់នៅក្នុងរាជធានីភ្នំពេញ និងទីជនបទបង្ហាញថា ការយល់ដឹងរបស់អ្នកប្រើប្រាស់ទាំងអស់នោះទៅលើប្រព័ន្ធនៃកិច្ចការពារអ្នកប្រើប្រាស់នៅមានកម្រិតទាបណាស់នៅកម្ពុជា។ នេះបើតាមលោក ប្រាក់ សេរីវឌ្ឍន៍ ប្រធានវិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជា (CIRD)។
លោកបានអះអាងថា ការស្ទង់មតិនេះគឺផ្តោតលើចំណុច ៣ សំខាន់ៗរួមមាន កម្រិតយល់ដឹងរបស់កិច្ចការពាររបស់អ្នកប្រើប្រាស់ ចំណេះដឹង និងជំនាញអ្នកប្រើប្រាស់ និងឥរិយាបថ និងការជឿទុកចិត្តលើប្រព័ន្ធនៃការពារអ្នកប្រើប្រាស់។
ច្បាប់ស្តីពីកិច្ចការពារអ្នកប្រើប្រាស់ត្រូវបានប្រកាសឲ្យប្រើប្រាស់កាលពីថ្ងៃទី ២ ខែ វិច្ឆិកា ឆ្នាំ ២០១៩ ដែលមាន ១១ ជំពូក និង ៥១ មាត្រា៕LA