ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអះអាងថា ការបើកច្រកព្រំដែនស្ទឹងបត់បានណងអៀននឹងជំរុញការធ្វើពាណិជ្ជកម្មឆ្លងដែនរវាងប្រទេសកម្ពុជា ថៃ ឲ្យកាន់តែមានភាពល្អប្រសើរថែមទៀត។
ការថ្លែងនេះបានធ្វើឡើងក្នុងដំណើរទស្សនកិច្ចរបស់លោកទៅពិនិត្យវឌ្ឍនភាព និងបច្ចេកទេសនៃការសាងសង់អគាររដ្ឋបាល និងហេដ្ឋារចនាសម្ព័ន្ធនានានៅច្រកព្រំដែនកាលពីថ្ងៃពុធ។
លោកបញ្ជាក់ថា៖ «ការបើកច្រកព្រំដែនចំណុចស្ទឹងបត់បានណងអៀននឹងបើកឱកាសយ៉ាងទូលំទូលាយដល់កិច្ចសហប្រតិបត្តិការអន្តរជាតិ ការវិនិយោគ ការធ្វើពាណិជ្ជកម្មឆ្លងដែន ការបង្កើតការងារធ្វើ និងការទាក់ទាញភ្ញៀវទេសចរសំដៅលើកកម្ពស់សេដ្ឋកិច្ចគ្រួសារ និងសង្គមជាតិនៃប្រទេសទាំង ២»។
លោកបន្តថា ជាមួយគ្នានេះក្រសួងកំពុងខិតខំរិះរកនីតិវិធីដើម្បីបើកច្រកស្ទឹងបត់នេះជាបណ្ដោះអាសន្នក្នុងការសម្រួលដល់ការដឹកជញ្ជូនទំនិញឆ្លងកាត់ច្រកព្រំដែន។ លោកថ្លែងថា៖ «យើងនឹងសាងសង់ផ្លូវសម្រាប់ត្រួតពិនិត្យឡានដឹកទំនិញចេញ-ចូលជាបណ្តោះអាសន្នសិន។ យើងនឹងខិតខំធ្វើការជាមួយភាគីថៃបើកច្រកនេះ ដើម្បីបញ្ចៀសការកកស្ទះនៅទល់ដែនរបស់យើង»។
លោកបន្ថែមថា បច្ចុប្បន្នការកសាងហេដ្ឋារចនាសម្ព័ន្ធនានានៅច្រកទ្វារព្រំដែននេះសម្រេចបាន ៥ ភាគរយហើយដែលការសាងសងនេះមានការយឺតជាងផែនការចំនួន ២ ខែ ប៉ុន្តែក្រុមហ៊ុនសាងសង់ធានាថានឹងសាងសង់ចប់តាមផែនការ។
បើតាមលោក ចាន់ថុល ការសាងសង់គម្រោងនេះត្រូវបានចំណាយថវិកាប្រមាណ ២៦,៨៥ លានដុល្លារ ជាគម្រោងឥណទានទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង (NEDA)។
ច្រកព្រំដែនស្ទឹងបត់ត្រូវបានបើកការដ្ឋានសាងសង់ និងតភ្ជាប់ទៅផ្លូវជាតិលេខ ៥ កាលពីអំឡុងខែមេសា ឆ្នាំ ២០១៩ ដែលមកដល់ពេលនេះមិនទាន់បើកដំណើរការនៅឡើយទេ។
លោក ឈួ វិចិត្រ ប្រធានក្រុមហ៊ុនតំបន់សេដ្ឋកិច្ចពិសេស Sanco Cambo Investment Group Co Ltdដែលស្ថិតនៅក្រុងប៉ោយប៉ែត បាននិយាយថា ច្រកព្រំដែនថ្មីនេះនឹងដើរតួនាទីយ៉ាងសំខាន់ដល់ការនាំចេញទំនិញរវាងប្រទេសទាំង ២។
លោកថ្លែងថា៖ «បច្ចុប្បន្នយើងកំពុងប្រឈមនឹងបញ្ហាកក់ស្ទះចរាចរណ៍នៅច្រកព្រំដែនអន្តរជាតិប៉ោយប៉ែត ដែលវាមានការកកស្ទះយ៉ាងខ្លាំងដល់ការដឹកទំនិញ។ ប្រសិនបើច្រកនេះត្រូវបានបើកវានឹងជួយសម្រួលដល់ការដឹកជញ្ជូនរបស់វិស័យឯកជនក៏ដូចជាក្រុមហ៊ុនខ្ញុំ»។
ស្ថានទូតថៃប្រចាំនៅកម្ពុជាបានឲ្យដឹងថា ពាណិជ្ជកម្មទ្វេភាគីរវាងកម្ពុជា និងថៃមានតម្លៃជាង ៩ ពាន់លានដុល្លារកាលពីឆ្នាំមុនកើនឡើង ៧,១៤ ភាគរយធៀបនឹងឆ្នាំ ២០១៨៕ LA