ភ្នំពេញៈ ក្រសួងប្រៃសណីយ៍ និងទូរគមនាគមន៍កម្ពុជាកំពុងពិនិត្យលើសេចក្ដីព្រាងអនុក្រឹត្យស្តីពីច្រកទ្វារអ៊ីនធឺណិតជាតិដើម្បីកៀរគរប្រាក់ចំណូល និងកែលម្អការភ្ជាប់អ៊ីនធឺណិតឲ្យមានភាពល្អប្រសើរជាងមុន។
លោក ជា វ៉ាន់ដេត រដ្ឋមន្ដ្រីក្រសួងប្រៃសណីយ៍ និងទូរគមនាគមន៍បានឲ្យដឹងនៅក្នុងកិច្ចប្រជុំមួយកាលពីថ្ងៃអង្គារថា ក្រសួងប្រៃសណីយ៍ត្រូវបានចាត់ឲ្យរៀបចំឲ្យមានក្របខ័ណ្ឌគតិយុត្តច្បាស់លាស់មួយដើម្បីគ្រប់គ្រងច្រកទ្វារអ៊ីនធឺណិតជាតិ។
លោកថ្លែងថា៖ «សេចក្ដីព្រាងអនុក្រឹត្យនេះមានគោលបំណងកៀរគរចំណូលជាតិ និងពង្រឹងប្រសិទ្ធភាពក្នុងការតភ្ជាប់បណ្ដាញអ៊ីនធឺណិតនៅកម្ពុជា។ កិច្ចប្រជុំថ្ងៃនេះមានបំណងទទួលយកធាតុចូលពីប្រតិបត្តិករទូរគមនាគមន៍ទាំងឡាយដើម្បីធ្វើឲ្យសេចក្ដីព្រាងអនុក្រឹត្យនេះកាន់តែមានភាពប្រសើរឡើង»។
លោកក៏ជំរុញឲ្យមានកិច្ចពិភាក្សាលើប្រកាសស្ដីពីគុណភាពសេវាជាមួយប្រតិបត្តិករ ហើយសង្កត់ធ្ងន់ថា កម្រៃតភ្ជាប់បណ្ដាញនឹងមានតម្លៃតិចដើម្បីចៀសវាងការបង្កើតបន្ទុកហិរញ្ញវត្ថុបន្ថែមលើប្រតិបត្តិករតាមរយៈការអនុញ្ញាតឲ្យក្រុមបច្ចេកទេសក្រសួងពិភាក្សាបន្ថែមជាមួយប្រតិបត្តិករលើធាតុចូល និងមតិរបស់ពួកគេ។
កាលពីខែកុម្ភៈក្រសួងប្រៃសណីយ៍ និងទូរគមនាគមន៍មានផែនការនឹងអនុម័តប្រព័ន្ធច្រកទ្វារអ៊ីនធឺណិតតែមួយថ្នាក់ជាតិ (SIG) ដែលធ្វើឲ្យការគ្រប់គ្រង និងសន្ដិសុខអនឡាញក្នុងប្រទេសកាន់តែមានប្រសិទ្ធភាព។
ច្រកទ្វារអ៊ីនធឺណិត គឺជា «ចំណង» បណ្ដាញមួយដែលតភ្ជាប់បណ្ដាញផ្សេងគ្នារួមតែមួយ។ ប្រព័ន្ធ SIG ដែលបានដំឡើងនៅក្នុងកម្រិតជាតិនឹងធ្វើឲ្យបណ្ដាញទាំងអស់ស្វែងរកការភ្ជាប់ជាមួយបណ្ដាញផ្សេងទៀតនៅកម្ពុជាតាមរយៈច្រកទ្វារតែមួយ។
លោក អ៊ឹម វុត្ថា អ្នកនាំពាក្យក្រសួង ប្រៃសណីយ៍ ធ្លាប់បានប្រាប់ភ្នំពេញប៉ុស្ដិ៍ថាប្រព័ន្ធ SIG ជាតិនឹងបង្កើតប្រព័ន្ធច្រកចេញចូលតែមួយសម្រាប់ការតភ្ជាប់អ៊ីនធឺណិតបរទេសទាំងអស់តាមរយៈច្រកតែមួយ។
លោកនិយាយថា៖ «នេះជាគម្រោងថ្នាក់ជាតិមួយដើម្បីបង្កើតច្រកទ្វារអ៊ីនធឺណិតរួមមួយក្នុងប្រទេស។ នៅពេលនេះសំខាន់បំផុតគឺការគ្រប់គ្រងអ៊ីនធឺណិតត្រូវតែមានប្រសិទ្ធភាព និងសុវត្ថិភាពសម្រាប់ការប្រើប្រាស់»។
លោកបន្តថា៖ «បច្ចុប្បន្នមានច្រកជាច្រើន ដូចជា VoIP ដែលជាបណ្ដាញខ្សែកាបទូរគមនាគមន៍ និងក្រោមសមុទ្រ។ យើងកំពុងស្វែងរកមធ្យោបាយដើម្បីផ្លាស់ប្តូរបណ្ដាញនេះទៅជាច្រកទ្វារជាតិតែមួយ ដើម្បីធានាថា យើងអាចគ្រប់គ្រងការប្រើអ៊ីនធឺណិត និងធ្វើឲ្យមានភាពកាន់តែងាយស្រួល និងកាន់តែមានសុវត្ថិភាព»។
លោក វុត្ថា បានឲ្យដឹងថា ប្រព័ន្ធ SIG ទាមទារឲ្យមានដោយសារតែការកើនឡើងចំនួនប្រជាជនដែលប្រើប្រាស់អ៊ីនធឺណិតដែលអាចមានផលវិបាកវិជ្ជមាន និងអវិជ្ជមាន៕LA