.jpg)
ជនជាតិចិនជំរិតតាមអ៊ីនធឺណិតដែលអាជ្ញាធរបង្ក្រាបកន្លងមក។ រូប សហការី
ភ្នំពេញៈ ឯកអគ្គរដ្ឋទូតចិនប្រចាំនៅកម្ពុជាកាលពីម្សិលមិញបានឲ្យដឹងថា កំណើនវិនិយោគិនចិន និងពលករចិនជំនាញនៅក្នុងវិស័យសំខាន់ៗមួយចំនួនបានផ្តល់ផលវិជ្ជមានយ៉ាងខ្លាំងក្លាដល់ការអភិវឌ្ឍសេដ្ឋកិច្ចកម្ពុជា ខណៈលោកក៏បានទទួលស្គាល់ថាជាមួយនឹងកំណើនជនជាតិចិនមានក្រុមមនុស្សមួយចំនួនបានប្រព្រឹត្តបទល្មើស និងមានឥរិយាបថមិនសមរម្យ ដែលប៉ះពាល់ដល់សណ្តាប់ធ្នាប់កម្ពុជា និងកិត្តិយសប្រទេសចិន ហើយស្នើឲ្យស្ថាប័នអនុវត្តន៍ច្បាប់កម្ពុជាចាត់វិធានការតឹងរ៉ឹងដោយគ្មានការយោគយល់។
ថ្លែងនៅសន្និសីទសារព័ត៌មានរយៈពេល ២ ម៉ោងដែលរៀបចំដោយស្ថានទូតចិនប្រចាំកម្ពុជាកាលពីថ្ងៃម្សិលមិញលោក Xiong Bo ឯកអគ្គរដ្ឋទូតចិនប្រចាំនៅកម្ពុជាបានលើកឡើងថារដា្ឋភិបាលចិនអំពាវនាវដល់ពលរដ្ឋចិនទាំងអស់ដែលចេញក្រៅប្រទេស ដូចជា ចេញមកកម្ពុជាជាដើមត្រូវគោរពឲ្យបានខ្ជាប់ខ្ជួននូវច្បាប់ប្រទេសរបស់គេ គោរពប្រពៃណីទំនៀមទម្លាប់ និងប្រាស្រ័យទាក់ទងប្រជាជនក្នុងតំបន់ប្រកបដោយសន្តិភាព។
លោកបញ្ជាក់ថាក្នុងនោះពលរដ្ឋចិនមួយភាគធំសុទ្ធតែអាចបំពេញបាន តែមានបុគ្គលខ្វះការអប់រំមួយចំនួនក៏បានប្រព្រឹត្តអំពើល្មើសច្បាប់បរទេសជាប្រាកដមែនដោយខ្លះលេងល្បែងខុសច្បាប់ចាប់ជំរិតទារលុយតាមទូរគមនាគមន៍ខ្លះទៀតផឹកស្រាបង្កជម្លោះ ប៉ះពាល់ដល់សណ្តាប់ធ្នាប់សន្តិសុខសង្គមខ្លះទៀតមើលរំលងច្បាប់ចរាចរណ៍បង្កគ្រោះថ្នាក់នាំឲ្យរបួសដល់គេឯង។
លោកថ្លែងថា៖ «បើធៀបនឹងភ្ញៀវទេសចរចិនជាង ១ លាននាក់នោះជនក្រុមនេះមានចំនួនតិចណាស់ តែវាបានបំផ្លាញនូវមុខមាត់ប្រជាជនចិនយ៉ាងធ្ងន់ធ្ងរ។ ចំពោះជនទាំងនោះភាគីចិនមានជំហរយ៉ាងច្បាស់លាស់គឺយើងខ្ញុំគាំទ្រស្ថាប័នពាក់ព័ន្ធរបស់រាជរដ្ឋាភិបាលកម្ពុជាធ្វើការចាត់ការតាមនីតិវិធី»។
លោកបានបន្តថាស្ថានទូតចិន រដ្ឋាភិបាលចិនសូមអំពាវនាវដល់ស្ថាប័នអនុវត្តន៍ច្បាប់របស់កម្ពុជា អនុវត្តច្បាប់ឲ្យបានកាន់តែរឹងមាំហើយរដ្ឋាភិបាលចិនមានឆន្ទៈរួមគ្នាជាមួយកម្ពុជាដើម្បីកសាងកម្ពុជាឲ្យក្លាយទៅជានីតិរដ្ឋ។
លោកបានបញ្ជាក់ថា៖ «សូមអំពាវនាវដល់ភាគីកម្ពុជា កុំគិតថាដោយសារជន [ប្រព្រឹត្តល្មើស] ទាំងអស់នេះជាជនជាតិចិនហើយគិតគូរដល់ទំនាក់ទំនងល្អរវាងចិន-កម្ពុជាបែរជាបន្ធូរបន្ថយដល់ជនសង្ស័យណាមួយ។ យើងអំពាវនាវឲ្យស្ថាប័នអនុវត្តន៍ច្បាប់របស់ប្រទេសកម្ពុជា មានចំណាត់ការកាន់តែតឹងរ៉ឹងចំពោះជនដែលល្មើសច្បាប់»។
ការលើកឡើងរបស់ឯកអគ្គរដ្ឋទូតចិនប្រចាំនៅកម្ពុជានៅពេលនេះត្រូវបានគេមើលឃើញថាធ្វើឡើងបន្ទាប់ពីការរិះគន់យ៉ាងខ្លាំងពីសាធារណជនទៅលើវត្តមានជនជាតិនៅកម្ពុជាដែលតែងតែបង្កបញ្ហា ជាពិសេសនៅខេត្តព្រះសីហនុដែលបច្ចុប្បន្នពោរពេញទៅដោយការវិនិយោគ និងទេសចរជនជាតិចិន។
លោកនាយករដ្ឋមន្ត្រី ហ៊ុន សែន កាលពីសប្តាហ៍មុនក៏បានរិះគន់ចំពោះក្តីបារម្ភពីលំហូរចូលវិនិយោគិនចិនមកកម្ពុជាដែរដោយលោកចាត់ទុកថាកម្ពុជាមិនទាន់អាចឆ្លើយតប និងការវិវឌ្ឍរបស់ប្រទេសនៅឡើយទេដែលចាំបាច់ត្រូវការការវិនិយោគ និងកម្លាំងពលកម្មជំនាញ។
បច្ចុប្បន្នគេឃើញលំហូរចូលយ៉ាងគំហុកនៃទេសចរ និងវិនិយោគិនចិននៅក្នុងខេត្តព្រះសីហនុដែលវិនិយោគរាប់ចាប់តាំងពីកាស៊ីណូ សណ្ឋាគារ ភោជនីយដ្ឋាន រហូតដល់មុខរបរតូចតាច។
កាលពីពេលថ្មីៗនេះអាជ្ញាធរកម្ពុជាក៏បានបង្កើតក្រុមការងារពិសេសមួយដើម្បីពង្រឹងការចុះបញ្ជី និងការគ្រប់គ្រងអាជីវកម្មសម្រាប់ជនជាតិចិននៅខេត្តព្រះសីហនុ បន្ទាប់ពីមានការត្អូញត្អែរពីអាជីវករក្នុងស្រុក។
ក្រុមការងាររួមនេះត្រូវបានបង្កើតឡើង ខណៈអភិបាលខេត្តព្រះសីហនុបានសរសេរលិខិតមួយទៅរដ្ឋមន្ដ្រីក្រសួងមហាផ្ទៃ ដោយបញ្ជាក់ពីបញ្ហាជាមួយការវិនិយោគរបស់ជនជាតិចិននៅខេត្តព្រះសីហនុ។
កាលពីឆ្នាំ ២០១៧ ភ្ញៀវទេសចរចិននៅកម្ពុជាកើនដល់ ១,២ លាននាក់ កើនឡើងជាង ៤០ ភាគរយ បើធៀបនឹងឆ្នាំ ២០១៦ ដែលធ្វើឲ្យចិនក្លាយជាភ្ញៀវទេសចរអន្តរជាតិច្រើនជាងគេនៅកម្ពុជា វ៉ាដាច់ភ្ញៀវទេសចរជនជាតិវៀតណាមមកទស្សនាកម្ពុជា។
ទិន្នន័យពាណិជ្ជកម្មចិនបានបង្ហាញថាគិតមកទល់ពេលនេះមានក្រុមហ៊ុនចិនជាង ២ ០០០ បានដាក់ទុនវិនិយោគនៅកម្ពុជា ដោយមានទុនវិនិយោគសរុបយ៉ាងហោចណាស់ចំនួន ១២,៥ ពាន់លានដុល្លារអាមេរិក។
កាលពីឆ្នាំ ២០១៧ វិនិយោគផ្ទាល់ចិននៅកម្ពុជាមានទឹកប្រាក់ប្រមាណ ១,២ ពាន់លានដុល្លារស្មើនឹងមួយភាគបួននៃវិនិយោគបរទេសសរុបនៅកម្ពុជា។ ទំហំពាណិជ្ជកម្មទ្វេភាគីវិញសម្រេចបាន ៥,៧ ពាន់លានដុល្លារកាលពីឆ្នាំ ២០១៧ កើនឡើងពី ៤,៧ ពាន់លានដុល្លារកាលពីឆ្នាំ ២០១៦។
ឯកអគ្គរដ្ឋទូតកាលពីម្សិលមិញក៏បានឆ្លើយតបនឹងការរាយការណ៍ដែលធ្លាប់មានថាទុនវិនិយោគចិននៅកម្ពុជាគឺការលាងលុយកខ្វក់ហើយបានលើកឡើងថាសេចក្តីរាយការណ៍បែបនេះគឺមិនពិត និងមានចរិតបែបនយោបាយ។
ការកត់សម្គាល់នេះគឺជាការជំទាស់ចំពោះរឿង New York Times ដែលបានចេញផ្សាយកាលពីខែមុនដែលបានដកស្រង់សម្តីរបស់លោក George McLeod អ្នកពិគ្រោះយោបល់ផ្នែកហានិភ័យនយោបាយប្រចាំនៅទីក្រុង Bangkok ដែលនិយាយថា «ខ្ញុំជឿជាក់ថាការលាងលុយពី P.R.C. [សាធារណរដ្ឋប្រជាមានិតចិន] គឺជាផ្នែកមួយនៃការវិនិយោគអចលនទ្រព្យនៅភ្នំពេញ»៕ LA
