ព្រុយណេៈ ជនជាតិម៉ាឡេស៊ី បួននាក់ និងអ្នកមានសិទ្ធិរស់នៅអចិន្រ្តៃយ៍ម្នាក់ ត្រូវបានឃាត់ខ្លួនដោយមន្រ្តីនគរបាលរបស់ប្រទេស ព្រុយណេ ពីបទពាក់ព័ន្ធនឹងសកម្មភាពល្បែងស៊ីសងតាមអនឡាញ SCR888 ក្នុងអំឡុងការចុះបង្ក្រាបក្នុងផ្ទះមួយនៅ Kampong Junjongan កាលពីយប់ថ្ងៃព្រហស្បតិ៍។
ក្នុងអំឡុងពេលចុះបង្រ្កាបនេះ ម៉ាស៊ីនល្បែងស៊ីសង និងកុំព្យូទ័រយួរដៃ ៦ គ្រឿងដែលមានផ្ទុកល្បែងភ្នាក់ SCR888 ត្រូវបានរឹបអូសយកទៅនាយកដ្ឋានស៊ើបអង្កេតឧក្រិដ្ឋកម្មសម្រាប់ការស៊ើបអង្កេតបន្ថែម។
ករណីនេះកំពុងត្រូវបានស៊ើបអង្កេតក្រោមច្បាប់ប្រឆាំងល្បែងស៊ីសងមាត្រា ៤ជំពូក ២៨ នៃច្បាប់ល្បែងស៊ីសង ដែលត្រូវប្រឈមការដាក់ពន្ធនាគាររយៈពេល ១២ ខែ និងពិន័យចំនួន ២០ ០០០ ដុល្លារព្រុយណេ (ជិត ១៥ ០០០ ដុល្លារអាមេរិក) និងមាត្រា ៦(១)សម្រាប់អ្នកដែលចូលរួមក្នុងល្បែងស៊ីសង ដែលត្រូវដាក់ពន្ធនាគាររយៈពេល ៦ ខែនិងពិន័យជិត ៧ ៥០០ ដុល្លារអាមេរិក។
នគរបាលព្រុយណេបានឲ្យដឹងក្នុងសេចក្តីថ្លែងការណ៍មួយថា ខ្លួននឹងបន្តពិនិត្យមើល និងតាមដានបុគ្គលដែលកំពុងប្រព្រឹត្តសកម្មភាពឧក្រិដ្ឋកម្មណាមួយក្នុងប្រទេសតាមរយៈនាយកដ្ឋានស៊ើបអង្កេតឧក្រិដ្ឋកម្មក្នុងស្រុកនីមួយៗ។
សេចក្តីថ្លែងការណ៍នេះបន្តថា កិច្ចសហប្រតិបត្តិការរវាងទីភ្នាក់ងារសាធារណៈ និងទីភ្នាក់អនុវត្តច្បាប់ក្នុងការផ្តល់ព័ត៌មាន មានសារៈសំខាន់ក្នុងការលុបបំបាត់សកម្មភាពខុសច្បាប់ក្នុងប្រទេស៕ ANN/NS