ភ្នំពេញៈ តំណាងក្រុមហ៊ុនជប៉ុនធំៗ១៤០នាក់បានមកដល់ប្រទេសកម្ពុជាកាលពីម្សិលមិញដើម្បីជួបថ្នាក់ដឹកនាំកម្ពុជានិងតំណាងស្ថាប័នពាក់ព័ន្ធនឹងការវិនិយោគជាច្រើនផ្សេងទៀតដើម្បីសិក្សាពីសក្តានុពលវិនិយោគនៅកម្ពុជាដែលកំពុងទទួលបានចំណាប់អារម្មណ៍កាន់តែខ្លាំងពីសំណាក់វិនិយោគិនជប៉ុន។ មន្រ្តីអ្នកនាំពាក្យរបស់ស្ថានទូតជប៉ុនប្រចាំកម្ពុជាបានប្រាប់ភ្នំពេញ ប៉ុស្តិ៍កាលពីថ្ងៃម្សិលមិញថាគណៈប្រតិភូវិនិយោគិនទាំងនោះបានមកដល់កម្ពុជានៅរសៀលថ្ងៃម្សិលមិញ។ មន្រ្តីរូបនោះឲ្យដឹងថា៖ «អ្នកទាំងនោះគឺជាវិនិយោគិនដែលមានសក្តានុពលនិងជាអ្នកវិនិយោគពិតប្រាកដ។ពួកគេនឹងជួបលោកនាយករដ្ឋមន្រ្តី ហ៊ុន សែន និង មនុស្សសំខាន់ៗជាច្រើនផ្សេងទៀត។» វិនិយោគិនទាំងនោះជាតំណាងឲ្យក្រុមហ៊ុនវិនិយោគធំៗនៅជប៉ុន ដែលមានជំនាញខាងវិស័យកសិកម្មឧស្សាហកម្មកែច្នៃផលិតផលនិងឧស្សាហកម្មធុនធ្ងន់ជាច្រើនផ្សេងទៀត។ យោងតាមទិន្នន័យបានពីក្រសួងសេដ្ឋកិច្ច និងហិរញ្ញវត្ថុកម្ពុជាបានឲ្យដឹងថាចាប់ពីឆ្នាំ២០១០ដល់ឆ្នាំ ២០១២ ប្រទេសកម្ពុជាបាននាំចេញទៅជប៉ុនគិតជាទឹកប្រាក់៤៣៦,៥លានដុល្លារដែលភាគច្រើននៃផលិតផលនាំចេញរបស់កម្ពុជារួមមានសម្លៀកបំពាក់ស្បែកជើងនិងផលនេសាទ។ ក្នុងបញ្ញីវិនិយោគិនកំពូលក្នុងឆ្នាំ២០១២នៃវិនិយោគបរទេសដោយផ្ទាល់មកប្រទេសកម្ពុជារបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថាប្រទេសជប៉ុនជាវិនិយោគគិនធំជាងគេលំដាប់ទី៣ ក្នុងព្រះរាជាណាចក្រកម្ពុជាបន្ទាប់ពីប្រទេសចិន។ កូរ៉េខាងត្បូងជាប្រទេសឈរលំដាប់ទីមួយ។ ទិន្នន័យបង្ហាញថាការវិនិយោគសរុបរបស់ជប៉ុនពីឆ្នាំមុនមានប្រហែល២១២,៣ លានដុល្លារ៕ PB
