The Phnom Penh Post Search

Search form

Logo of Phnom Penh Post newspaper Phnom Penh Post - ជប៉ុន​វិនិយោគ​៥លាន​ដុល្លារ​បង្កើត​រោងចក្រ​ផលិត​បាល់




ជប៉ុន​វិនិយោគ​៥លាន​ដុល្លារ​បង្កើត​រោងចក្រ​ផលិត​បាល់

ជប៉ុន​វិនិយោគ​៥លាន​ដុល្លារ​បង្កើត​រោងចក្រ​ផលិត​បាល់

កោះកុងៈ សាជីវកម្ម មីកាហ្សា របស់​ជប៉ុន​ជា​ក្រុមហ៊ុន​ផលិត​បាល់​ដ៏​ល្បី​ទូទាំង​ពិភពលោក​សម្រេច​វិនិយោគ​ជាង​៥​លាន​ដុល្លារ​បង្កើត​រោងចក្រ​ផលិត​បាល់​នៅ​តំបន់​សេដ្ឋកិច្ច​ពិសេស​កោះកុង។ នេះ​បើ​តាម​ការ​អះអាង​ពី​មន្ត្រី។

មន្ត្រី​និយាយ​ថា រោងចក្រ​នេះ​គ្រោង​នឹង​ចាប់​ផ្តើម​ការ​សាង​សង់​នៅ​ដើម​ឆ្នាំ​ក្រោយ​។

គេហទំព័រ​របស់​ក្រុមហ៊ុន​បាន​ឲ្យ​ដឹង​ថា​ក្រុមហ៊ុន​មីកាហ្សា បាន​កំពុង​ផលិត​បាល់​គ្រប់​ភេទ​ដូចជា បាល់​បោះ បាល់​លើ​ឆ្នេរ​ខ្សាច់ បាល់ទាត់ បាល់ទះ បាល់​ហ្វូតសាល​ប៉ូឡូ​លើ​ទឹក បាល់​ឱប​បុរស បាល់​ឱប​នារី បាល់​គប់​និង​សម្ភារ​កីឡា​ជាច្រើន​ទៀត​។

លោក Suzuki Horoshi នាយក​ប្រតិបត្តិ​វិទ្យាស្ថាន​ស្រាវជ្រាវ​អាជីវកម្ម​ប្រចាំ​នៅ​កម្ពុជា​បាន​និយាយ​ថា ក្រុមហ៊ុន​នឹង​ធ្វើ​ការ​វិនិយោគ​លើ​ដើម​ទុន​៥,១២​លាន​ដុល្លារ​ក្នុង​ការ​សាង​សង់​រោងចក្រ​មួយ​នៅ​តំបន់​សេដ្ឋកិច្ច​ពិសេស​កោះកុង​។ លោក​បាន​បញ្ជាក់​ថា៖

«​ក្រុម​ហ៊ុន​នឹង​ចាប់​ផ្តើម​សាង​សង់​រោងចក្រ​នា​ដើម​ឆ្នាំ​ក្រោយ​នេះ​ហើយ​នឹង​បញ្ចប់​រួច​រាល់​ក្នុង​ខែ​តុលា​»។ លោក​ថ្លែង​ថា៖​«​ក្រុមហ៊ុន​នេះ​មាន​កេរ្តិ៍​ឈ្មោះ​ល្បី​ល្បាញ​ជុំវិញ​ពិភពលោក​នៅ​ក្នុង​វិស័យ​ផលិត​បាល់​ហើយ​វា​ជា​ការ​ល្អ​សម្រាប់​ប្រទេស​កម្ពុជា​»​។

រោងចក្រ​មួយ​នឹង​ផលិត​គ្រប់​ផ្នែក និង​គ្រប់​សម្ភារ​បាល់​សម្រាប់​ការ​នាំ​ចេញ​ទៅ​ផលិត​ជា​ផលិត​ផល​សម្រេច​នៅ​ក្នុង​រោងចក្រ​ធំ​របស់​ខ្លួន​នៅ​ប្រទេស​ថៃ​។

លោក ប៊ុន លើត អភិបាល​ខេត្ត​កោះកុង​បញ្ជាក់​ដែរ​ថា ក្រុមហ៊ុន​មីកាហ្សា​បាន​ពិភាក្សា​ជា​មួយ​តំបន់​សេដ្ឋកិច្ច​ពិសេស​កោះកុង​រួច​ហើយ អំពី​ការ​ចាប់​ផ្តើម​ការ​សាង​សង់​រោងចក្រ​នេះ​។​លោក​បន្ត​ថា៖ «​ខ្ញុំ​មិន​បាន​ជួប​ជាមួយ​ខាង​ក្រុមហ៊ុន​ទេ ប៉ុន្តែ​ម្ចាស់​តំបន់​សេដ្ឋកិច្ច​ពិសេស​កោះកុង​បាន​ប្រាប់​ខ្ញុំ​ថា ក្រុមហ៊ុន​នឹង​ចាប់​ផ្តើម​ការ​សាង​សង់​រោងចក្រ​នា​ខែ​មករា ឆ្នាំ​២០១៣​»​។

ថ្មី​ៗ​នេះ​ប្រទេស​កម្ពុជា​បាន​ទាក់​ទាញ​ក្រុមហ៊ុន​ជប៉ុន​កាន់​តែ​ច្រើន​ឲ្យ​មក​វិនិយោគ​ដូច​ជា ក្រុមហ៊ុន Yazaki ជា​ក្រុមហ៊ុន​រោង​ចក្រ​ផលិត​គ្រឿង​បន្លាស់​រថយន្ត​នៅ​តំបន់​សេដ្ឋកិច្ច​ពិសេស​កោះកុង​និង​ក្រុមហ៊ុន​អ៊ីអន ម៉ល ជាដើម។

ការ​វិនិយោគ​របស់​ជប៉ុន​នៅ​កម្ពុជា​មាន​៧៥​លាន​ដុល្លារ​កាល​ពី​ឆ្នាំ​២០១១​ខណៈ​២០១០​មាន​ត្រឹម​តែ​៣៥​លាន​ដុល្លារ។ នេះ​បើ​តាម​ការ​ឲ្យ​ដឹង​ពី​ស្ថានទូត​ជប៉ុន​។

លោក​នាយក​រដ្ឋមន្ត្រី ហ៊ុន សែន ថ្លែង​ក្នុង​ពិធី​ដំណើរ​ការ​រោងចក្រ​ផលិត​គ្រឿង​បន្លាស់​រថយន្ត​របស់​Yazaki Corporation កាល​ពី​ថ្ងៃ​ចន្ទ​ថា​កម្ពុជា​មាន​ស្ថិរភាព​នយោបាយ​ដ៏​រឹង​មាំ និង​មាន​ការ​ទំនាក់​ទំនង​ល្អ​ជាមួយ​ប្រទេស​ជិត​ខាង​ព្រម​ទាំង​មាន​ច្បាប់​វិនិយោគ​បើក​ចំហ​។ លោក​បន្ត​ថា៖​«​ទំនុក​ចិត្ត​ធ្វើ​ឲ្យ​លោក Yasaki​ក៏​ដូចជា​អ្នក​វិនិយោគ​ផ្សេង​ទៀត​មក​វិនិយោគ​នៅ​ទីនេះ​គឺ​ថា​ទីមួយ​កម្ពុជា​មាន​ស្ថិរភាព​នយោបាយ និង​ទី​ពីរ​ការ​មាន​ទំនាក់​ទំនង​ល្អ​រវាង​កម្ពុជា​និង​ថៃ​»​។ តាម​ទិន្នន័យ​សមាគម​អាជីវកម្ម​ជប៉ុន​នៅ​កម្ពុជា​ក្រុមហ៊ុន​ជប៉ុន​បាន​កើន​ពី​៥០​កាល​ពី​ឆ្នាំ​ទៅ​ដល់​១០០​ក្រុមហ៊ុន​គិត​ត្រឹម​ខែ​កុម្ភៈ៕CC

អត្ថបទគួរចាប់អារម្មណ៍