.jpg)
ស្ត្រីឥណ្ឌូនេស៊ីកំពុងចម្អិនតៅគ័រ។ សណ្តែកសៀងជាបញ្ហាធំមួយក្នុងជម្លោះពាណិជ្ជកម្ម។ AFP
ក្រុងនុសាឌួៈ មូលនិធិរូបិយវត្ថុអន្តរជាតិ (IMF) បានឲ្យដឹងថា ភាពតានតឹងផ្នែកពាណិជ្ជកម្មដែលនៅតែបន្ត អាចកាត់បន្ថយកំណើនសេដ្ឋកិច្ចរបស់អាស៊ីរហូតដល់ ០,៩ ភាគរយក្នុងពេលជាច្រើនឆ្នាំខាងមុខ ហើយជំរុញឲ្យអ្នកបង្កើតគោលនយោបាយនៅក្នុងតំបន់នេះ ត្រូវធ្វើសេរីភាវូបនីយកម្មទីផ្សារ ដើម្បីប៉ះប៉ូវការធ្លាក់ចុះការនាំចេញ។ នេះបើតាម Reuters។
ក្នុងរបាយការណ៍ដែលចេញផ្សាយ ២ ដងក្នុងមួយឆ្នាំរបស់ខ្លួនស្តីពីតំបន់អាស៊ីប៉ាស៊ីហ្វិក មូលនិធិ IMF បានព្រមានថា ភាពចលាចលទីផ្សារត្រូវបានមើលឃើញនៅតាមប្រទេសកំពុងអភិវឌ្ឍន៍ខ្លាំង អាចកាន់តែអាក្រក់ខ្លាំង បើធនាគារកណ្ដាលអាមេរិក និងធនាគារកណ្ដាលធំៗផ្សេងទៀត រឹតបន្តឹងគោលនយោបាយរូបិយវត្ថុលឿនជាងការរំពឹងទុក។
របាយការណ៍នេះបានឲ្យដឹងថា៖ «ភាពចលាចលដែលត្រូវបានគេមើលឃើញរួចហើយក្នុងសេដ្ឋកិច្ចទីផ្សារប្រទេសកំពុងអភិវឌ្ឍន៍ខ្លាំងមួយចំនួន អាចកាន់តែអាក្រក់ខ្លាំងឡើង ដោយសារផលប៉ះពាល់អវិជ្ជមានរីករាលដាលទៅកាន់អាស៊ី តាមរយៈការកាត់បន្ថយលំហូរមូលធន និងការចំណាយលើការទទួលបានមូលនិធិកាន់តែខ្ពស់»។
យោងតាមទីភ្នាក់ងារព័ត៌មាន Reuters លោក Changyong Rhee ប្រធាននាយកដ្ឋានអាស៊ី និងប៉ាស៊ីហ្វិករបស់ IMF ថ្លែងថា នៅអាស៊ី នឹងគ្មានអ្នកឈ្នះពីជម្លោះពាណិជ្ជកម្មពិភពលោកនោះទេ ខណៈប្រទេសផ្សេងទៀត នឹងមិនអាចទទួលបានការប៉ះប៉ូវពេញលេញសម្រាប់ការកាត់ផ្ដាច់ចង្វាក់ផ្គត់ផ្គង់នៅចិន និងអាមេរិក ដែលជាប្រទេសមានសេដ្ឋកិច្ចធំទាំង ២ របស់ពិភពលោកឡើយ។
លោកថ្លែងក្នុងសន្និសីទខ្លីស្តីពីរបាយការណ៍នេះថា៖ «ឧបសគ្គចំពោះកំណើនបច្ចុប្បន្ន រាប់ចាប់ពីការរឹតបន្តឹងទីផ្សារហិរញ្ញវត្ថុរហូតដល់ភាពតានតឹងផ្នែកពាណិជ្ជកម្ម អាចបន្តកើតមានក្នុងរយៈពេលណាមួយ»។
លោកបន្ថែមថា៖ «ដោយហេតុនេះ វានឹងមានសារៈសំខាន់សម្រាប់អ្នកបង្កើតគោលនយោបាយក្នុងការសន្សំសព្វាវុធរបស់ខ្លួនទុកសម្រាប់ពេលណាដែលវាត្រូវការប្រើប្រាស់ពិតប្រាកដ»។
មូលនិធិ IMF បានរក្សាការព្យាកររបស់ខ្លួនថា សេដ្ឋកិច្ចរបស់អាស៊ីនឹងកើនឡើង ៥,៦ ភាគរយនៅឆ្នាំនេះ ប៉ុន្តែបានកាត់បន្ថយការព្យាកររបស់ខ្លួនសម្រាប់ឆ្នាំក្រោយមកនៅត្រឹម ៥,៤ ភាគរយ ដែលធ្លាក់ ០,២ ភាគរយធៀបនឹងខែមេសា។
មូលនិធិមួយនេះបានឲ្យដឹងទៀតថា ការទម្លាក់ការព្យាករនេះ គឺដោយសារតែផលប៉ះពាល់នៃភាពតានតឹងទីផ្សារហិរញ្ញវត្ថុ និងការរឹតបន្តឹងរូបិយវត្ថុនៅក្នុងប្រទេសមួយចំនួន ព្រមទាំងការខូចខាតដោយសារវិធានការពន្ធនាំចូលសងសឹកគ្នារវាងអាមេរិក និងចិន។
មូលនិធិ IMF បានបន្តថា ពន្ធនាំចូលសងសឹកគ្នាដែលជាធរមានត្រូវស្នើឡើងនិងថ្មី អាចបណ្ដាលឲ្យបាត់បង់ ផ.ស.ស ខ្លាំងរហូតដល់ ១,៦ ភាគរយនៅចិន និងជិត ១ ភាគរយនៅអាមេរិក៕ AFP/LA
