អាមេរិកៈ ជម្លោះមានតម្លៃរាប់ពាន់លានដុល្លាររវាងក្រុមហ៊ុន Facebook និងអាជ្ញាធរពន្ធអាមេរិក ជុំវិញប្រាក់ចំណេញដែលបានផ្លាស់ប្តូរទៅក្រុមហ៊ុនបុត្រសម្ព័ន្ធមួយរបស់ប្រទេស អៀរឡង់ បានចាប់ផ្ដើមដំណើរការនៅមុខចៅក្រមកាលពីថ្ងៃអង្គារ។
សេវាប្រាក់ចំណូលផ្ទៃក្នុង (IRS) អះអាងថា ក្រុមហ៊ុន Facebook បានគេចការបង់ពន្ធប្រហែល ៩ ពាន់លានដុល្លារ ខណៈបណ្ដាញសង្គមឈានមុខគេមួយនេះឲ្យដឹងថា ពិតប្រាកដណាស់ខ្លួនបានជំពាក់ប្រាក់បំណុល។ នេះបើយោងតាមសេចក្ដីរាយការណ៍របស់ប្រព័ន្ធព័ត៌មានអាមេរិក។
លោក Bertie Thomson អ្នកនាំពាក្យបានឲ្យដឹងនៅក្នុងអ៊ីមែលឆ្លើយតបនឹងសំណួររបស់ទីភ្នាក់ងារព័ត៌មាន AFP ថា៖ «ការវិនិច្ឆ័យនេះគឺនិយាយអំពីប្រតិបត្តិការដែលបានកើតឡើងកាលពីឆ្នាំ ២០១០ នៅពេលក្រុមហ៊ុន Facebook មិនមានប្រាក់ចំណូលពីការផ្សាយពាណិជ្ជកម្មតាមទូរស័ព្ទ អាជីវកម្មអន្តរជាតិរបស់ខ្លួនបានចាប់ផ្ដើម ហើយផលិតផលការផ្សាយពាណិជ្ជកម្មរបស់ខ្លួនមិនបានបង្ហាញភ័ស្ដុតាងនោះទេ»។
លោកបន្តថា៖ «យើងទន្ទឹងរង់ចាំការបង្ហាញករណីរបស់យើងនៅក្នុងតុលាការ និងបញ្ចប់ជម្លោះដែលអូសបន្លាយរយៈពេលជាច្រើនឆ្នាំនេះ»។
ចៅក្រមនឹងស្ដាប់ការបង្ហាញពីមន្ដ្រីប្រតិបត្តិក្រុមហ៊ុន Facebook ក្នុងអំឡុងពេលដំណើរការនីតិវិធីនេះ។
ការផ្លាស់ប្តូរប្រាក់ចំណេញទៅប្រទេសមានពន្ធទាប គឺជាការអនុវត្តជាធម្មតាដោយក្រុមហ៊ុនអន្តរជាតិ ហើយការសម្រេចចិត្តរបស់ចៅក្រមនៅក្នុងករណីនេះត្រូវបានគេមើលឃើញថា ជាប្រផ្នូលដែលអាចកើតឡើងថាតើយុទ្ធសាស្ដ្រនោះនឹងមិនសូវមានប្រសិទ្ធភាពដែរឬយ៉ាងណា?
អំឡុងពេលនៃការគេចពន្ធតាំងពីរយៈពេលជិត ១ ទសវត្សរ៍មុនពេលដែល Facebook បានក្លាយជាក្រុមហ៊ុនពាណិជ្ជកម្មសាធារណៈ។
IRS អះអាងថា ក្រុមហ៊ុន Facebook បានបន្ទាបតម្លៃបច្ចេកវិទ្យាដែលខ្លួនបានផ្ដល់អាជ្ញាប័ណ្ណដល់ក្រុមហ៊ុនបុត្រសម្ព័ន្ធនៅប្រទេសអៀរឡង់របស់ខ្លួន ដូច្នេះហើយបានធ្វើឲ្យប្រាក់ពន្ធទៅអាមេរិកត្រូវបានកាត់បន្ថយ។
ក្រុមហ៊ុន Facebook បានប្រឆាំងតបថា ខ្លួនគួរតែឲ្យតម្លៃបច្ចេកវិទ្យាទាបជាងនេះ និងបន្ថយប្រាក់ដែលបានបង់ដោយក្រុមហ៊ុនបុត្រសម្ព័ន្ធបន្ថែមទៀត ដូច្នេះវាជាចំនួនទឹកប្រាក់ដែលត្រូវបង់ពន្ធនៅអាមេរិក។
លោក Thomson ថ្លែងថា៖ «ពេញមួយប្រវត្តិសាស្ដ្ររបស់ក្រុមហ៊ុន Facebook យើងបានធ្វើការងារជាមួយ IRS និងបានគោរពតាមច្បាប់ពន្ធជាធរមានទាំងអស់»។ លោកបន្តថា៖ «អាជីវកម្មយើងបានរងផលប៉ះពាល់ និងខកខាន ប៉ុន្តែយើងឈរនៅពីក្រោយសកម្មភាពដែលបានធ្វើឡើងនៅក្នុងរយៈពេល ១ ទសវត្សរ៍ចុងក្រោយក្នុងអំឡុងពេលមានហានិភ័យខ្ពស់បំផុត និងភាពមិនច្បាស់លាស់សម្រាប់ក្រុមហ៊ុនមួយនេះ»៕ LA