.jpg)
ភ្នំពេញៈ ក្រុមហ៊ុនពហុអាជីវកម្មក្នុងស្រុក ជីប ម៉ុងគ្រុប ថ្មីៗនេះបានសម្រេចពង្រីកពាណិជ្ជកម្មរបស់ខ្លួនទៅដល់វិស័យហិរញ្ញវត្ថុ បន្ថែមលើអាជីវកម្មជាច្រើនប្រភេទដែលមានស្រាប់ តាមរយៈការបង្កើតធនាគារពាណិជ្ជថ្មីមួយឈ្មោះថា ធនាគារពាណិជ្ជ ជីប ម៉ុង។
ក្រុមហ៊ុន ជីប ម៉ុងគ្រុប មិនទាន់បានផ្សព្វផ្សាយព័ត៌មានពីដំណើរការធនាគារពាណិជ្ជថ្មីនេះជាសាធារណៈនៅឡើយ ប៉ុន្តែកាលពីសប្តាហ៍មុនបានផ្សព្វផ្សាយដំណឹងស្វែងរកបុគ្គលិកនៅលើគេហទំព័ររបស់ខ្លួន ដោយបញ្ជាក់ថាធនាគារពាណិជ្ជជីប ម៉ុងគឺជាធនាគារពាណិជ្ជថ្មីមួយដែលទើបបង្កើតឡើងនៅកម្ពុជា។
បុគ្គលិកមួយរូបនៅក្រុមហ៊ុន ជីប ម៉ុង គ្រុប ដែលបានទទួលទូរស័ព្ទ ភ្នំពេញ-ប៉ុស្ដិ៍ កាលពីម្សិលមិញ បានបញ្ជាក់ថា ធនាគារពាណិជ្ជ ជីប ម៉ុង ត្រូវបានផ្ដល់អាជ្ញាប័ណ្ណធនាគារពាណិជ្ជពីធនាគារជាតិនៃកម្ពុជា (NBC) ហើយនៅពេលនេះកំពុងអភិវឌ្ឍក្រុមការងារ ដើម្បីបង្កើតធនាគារនេះ។
មន្ដ្រីប្រតិបត្តិរបស់ក្រុមហ៊ុន ជីប ម៉ុង គ្រុប និងតំណាងរបស់ NBC មិនអាចទាក់ទងសុំការអត្ថាធិប្បាយបានទេកាលពីម្សិលមិញ។ ប៉ុន្តែធនាគារពាណិជ្ជជីប ម៉ុងបានចុះបញ្ជីរួចហើយនៅក្រសួងពាណិជ្ជកម្មកម្ពុជាកាលពីថ្ងៃទី ១៥ ខែមិថុនា ឆ្នាំ ២០១៨ ដោយលោកស្រី ភាព ហៀក ត្រូវបានតែងតាំងជាប្រធានក្រុមប្រឹក្សាភិបាលរួមជាមួយនឹងលោក លាង ឃុន និងលោក លាង ម៉េង ជានាយករបស់ធនាគារនេះ។
របាយការណ៍ពាក់កណ្ដាលឆ្នាំសម្រាប់ឆ្នាំ ២០១៨ របស់ NBC បង្ហាញថា ប្រទេសកម្ពុជាមានធនាគារពាណិជ្ជ ៣៩ និងធនាគារឯកទេស ១៥។ ដើម្បីប្រតិបត្តិការជាធនាគារពាណិជ្ជនៅក្នុងប្រទេសកម្ពុជា NBC តម្រូវឲ្យប្រតិបត្តិករត្រូវមានមូលធនអប្បបរមាស្មើនឹង ៧៥ លានដុល្លារ។
លោក ង៉ែត ជូ ទីប្រឹក្សាជាន់ខ្ពស់នៅក្រុមហ៊ុន Emerging Markets Consulting (EMC) ជាអ្នកជំនាញហិរញ្ញវត្ថុកម្ពុជាបានឲ្យដឹងថា វាមិនមែនជាការភ្ញាក់ផ្អើលសម្រាប់សមត្ថភាពរបស់ជីប ម៉ុង ក្នុងការបំពេញតាមតម្រូវការរបស់ NBC ក្នុងការបង្កើតធនាគារពាណិជ្ជទេ ដោយសារតែក្រុមហ៊ុននេះបានបង្កើតក្រុមហ៊ុនបុត្រសម្ព័ន្ធមួយចំនួនជាមួយនឹងមូលធនវិនិយោគរាប់រយលានដុល្លារ។ ប៉ុន្តែលោកថាវាជាវិធានការដ៏ល្អមួយដែលបង្ហាញសមត្ថភាពកាន់តែខ្លាំងរបស់ក្រុមហ៊ុនកម្ពុជាដែលអាចបង្កើតធនាគារពាណិជ្ជបាន។
ខណៈក្រុមហ៊ុនជីប ម៉ុង មានក្រុមហ៊ុនបុត្រសម្ព័ន្ធជាច្រើន ហើយក្រុមហ៊ុនទាំងអស់នោះកំពុងរីកចម្រើនលោក ង៉ែត ជូ ព្យាករថាក្រុមហ៊ុនទាំងនោះត្រូវការសេវាហិរញ្ញវត្ថុកាន់តែច្រើន ហើយជីប ម៉ុង អាចមើលឃើញថានេះជាឱកាសមួយក្នុងការចូលទីផ្សារហិរញ្ញវត្ថុ។
លោកថ្លែងថា៖ «ក្រុមហ៊ុនបុត្រសម្ព័ន្ធរបស់ជីប ម៉ុង ដូចជា ជីប ម៉ុងលែន បានផ្ដល់សេវាកម្ចីទិញផ្ទះដល់អតិថិជន ដូច្នេះអាចមានចក្ខុវិស័យថា សេវានេះនឹងស្ថិតក្រោមធនាគារពាណិជ្ជ នៅពេលអនាគត»។
លោកបន្តថា៖ «ទំហំនៃតម្រូវការហិរញ្ញវត្ថុក្នុងចំណោមក្រុមហ៊ុនបុត្រសម្ព័ន្ធរបស់ ជីប ម៉ុង អាចធំគ្រប់គ្រាន់ក្នុងការគាំទ្រដល់ក្រុមហ៊ុននេះដើម្បីបង្កើតធនាគារមួយ»។
អាជីវកម្មរបស់ជីប ម៉ុង រួមមានសំណង់ និងសម្ភារសំណង់ ទំនិញរបស់ប្រើប្រាស់ ការអភិវឌ្ឍអចលនទ្រព្យ ភេសជ្ជៈ ឧស្សាហកម្មទូទៅ បដិសណ្ឋារកិច្ច លក់រាយ និងចំណីសត្វ៕ LA
