The Phnom Penh Post Search

Search form




Logo of Phnom Penh Post newspaper Phnom Penh Post - ដំណាំ​ម្រេច​ជា​សរសៃ​ឈាម​កសិករ​កំពត

ដំណាំ​ម្រេច​ជា​សរសៃ​ឈាម​កសិករ​កំពត

ដំណាំ​ម្រេច​ជា​សរសៃ​ឈាម​កសិករ​កំពត

20140221_13
កសិករ ងួន ព្រឿង ជាកសិករដាំម្រេចកំពុងឈរនៅក្នុងចម្ការម្រេចរបស់លោកកាលពីថ្ងៃម្សិលមិញ Marta Soszynska

កែបៈ វា​គ្រាន់​តែ​ជា​ចម្ការ​ម្រេច​តូច​មួយ​ក្នុង​ចំណោម​ចម្ការ​ម្រេច​ជាច្រើន ទៀត​របស់​កសិករ​ស្ថិត​ក្នុង​ស្រុក ដំណាក់​ចង្អើរ ក្នុង​ខេត្ត កែប។

លោក ងួន ព្រឿង ពិត​ជា​មាន​មោទនភាព​ណាស់​ចំពោះ​កិច្ច​ប្រឹង​ប្រែង​របស់​លោក​ដែល​សម្រេច​បាន​ចម្ការ​ម្រេច​កន្លះ​ហិកតា​នេះ។

កសិករ​រូប​នេះ​និយាយ​ថា៖ «យើង​នឹង​ត្រូវ​ត្រៀម​ខ្លួន​ដើម្បី​ប្រមូល​ផល​ម្រេច​ក្នុង​រយៈ​ពេល ប្រហែល​ពី ១៨ ដល់ ២០ ខែ»។ លោក ព្រឿង ដែល​ជា​អ្នក​ដាំ​ម្រេច​ជំនាន់​ក្រោយ​មួយ​រូប​និយាយ​ថា ម្រេច​ក្នុង​ឈាម​របស់​លោក។

គ្រួសារ​របស់​លោក​ក៏​ដូច​ជា​អ្នក​ផ្សេង​ទៀត​ជាច្រើន​ទៀត​ដែរ​បាន​ដាំ​ម្រេច កំពត ចាប់​តាំង​ពី​ទសវត្សរ៍ ១៩៣០ ជា​សម័យ​អាណានិគម​និយម​បារាំង​មក​ម៉្លេះ។ បន្ទាប់​ពី​ត្រូវ​បាន​គេ​បង្ខំ​ឲ្យ​ឈប់​ដាំ​ដុះ​ក្នុង​អំឡុង​សម័យ​ខ្មែរ​ក្រហម គ្រួសារ​ជាច្រើន​បាន​ត្រឡប់​ដាំ​ម្រេច​វិញ​នៅ​ទសវត្សរ៍ ៨០ ហើយ​ស៊ូ​ទ្រាំ​នឹង​តម្លៃ​ទាប​អស់​រយៈ​ពេល​ជាច្រើន​ទសវត្សរ៍។ ប៉ុន្តែ​សព្វ​ថ្ងៃ​នេះ ដោយ​សារ​ការ​ទទួល​បាន​ពី​ការ​បញ្ជាក់​ជា​ផលិតផល​សម្គាល់​ទីតាំង​ភូមិសាស្ត្រ GI កាល​ពីឆ្នាំ ២០១០ ពី​អង្គការ​ពាណិជ្ជកម្ម​ពិភពលោក​ធ្វើ​ស្ថានភាព​ល្អ​ប្រសើរ​ឡើង។ អ្នក​ដាំ​ម្រេច​នៅ​តំបន់​នេះ​កំពុង​ទទួល​បាន​រង្វាន់​សម្រាប់​ការ​តស៊ូ​របស់​ពួកគេ​ខណៈ​អ្នក​មក​ថ្មី​កំពុង​សម្លឹង​មើល​ដើម្បី​ចាប់​យក​ចំណែក​ទីផ្សារ​នៅ​ទីនេះ។

កាល​ពី​ឆ្នាំ ២០១២ សមាគម​នេះ​បាន​នាំ​ចេញ​ម្រេច ២០ តោន​ដែល​ចំនួន​នេះ​កើន​ឡើង​បន្តិច​ដល់ ២២ តោន​ពី​ឆ្នាំ ២០១៣។ នៅ​រដូវ​ប្រមូល​ផល​ឆ្នាំ​នេះ​ចំនួន​ម្រេច​ទទួល​បាន​សរុប​បាន​ពី​ការ​ប្រមូល​ផល​ត្រូវ​បាន​រំពឹង​ថា នឹង​កើន​ឡើង​ដល់ ៣០ តោន។

ម្រេច កំពត ត្រូវ​បាន​លក់​នៅ​ក្នុង​ប្រភេទ ៤ ផ្សេងៗ​គ្នា​គឺ ម្រេច​ខ្ចី ពណ៌​ខ្មៅ ពណ៌​ក្រហម និង​ពណ៌​ស។ ម្រេច​ខ្មៅ​ត្រូវ​បាន​ផលិត​ដោយ​ការ​ហាល​ម្រេច​បៃតង​ឲ្យ​ស្ងួត ខណៈ​ម្រេច​ពណ៌​ស ត្រូវ​បាន​ធ្វើ​ឡើង​ដោយ​ការ​ស្ងោរ​ម្រេច​ពណ៌​ក្រហម។

សព្វ​ថ្ងៃ​នេះ ម្រេច​ខ្មៅ​ខេត្ត កំពត ត្រូវ​បាន​លក់​ក្នុង​តម្លៃ ១១ ដុល្លារ​ក្នុង​មួយ​គីឡូ​ក្រាម ដែល​កើន​ឡើង​ពី ៤,៥ ដុល្លារ កាល​ពី​ឆ្នាំ ២០០៩ មុន​ពេល​ទទួល​បាន​វិញ្ញាបនបត្រ GI ត្រូវ​បាន​ផ្ដល់​ដល់​តំបន់​នេះ។ ម្រេច​ពណ៌​ស ត្រូវ​បាន​លក់​ក្នុង​តម្លៃ ១៣ ដុល្លារ កើន​ឡើង​ពី ៨ ដុល្លារ កាល​ពី ២០០៩ ហើយ​ម្រេច​ក្រហម​ត្រូវ​បាន​លក់​ក្នុង​តម្លៃ ២០ ដុល្លារ ក្នុង​មួយ​គីឡូក្រាម​កើន​ឡើង​ពី ១០ ដុល្លារ​កាល​ពី​ឆ្នាំ ២០០៩។

ម្រេច មួយ​ជន្លង់​ទទួល​បាន​ទិន្នផល​ចន្លោះ​ពី ១ ដល់ ១,៥ គីឡូក្រាម។

ចាប់​ពី​ខែ មករា ដល់​ខែ ឧសភា ជា​រដូវ​ប្រមូល​ផល​សម្រាប់​កសិករ​មាន​ដើម​ទុន​តិច​តួច​ជិត ២០០ នាក់​នៅ​ក្នុង​ខេត្ត កំពត។ គេ​រំពឹង​ថា នឹង​ទទួល​ផល​ច្រើន​នៅ​ក្នុង​ឆ្នាំ​នេះ។ ប៉ុន្តែ​សម្រាប់​កសិករ​ដូចជា​លោក ព្រឿង ការ​ដាំ​ដុះ​បាន​ចាប់​ផ្តើម​យឺត ហើយ​ការ​ប្រមូល​ផល​អាច​នឹង​នៅ​ឆ្នាំ ២០១៥ ឬ មុន។

នៅ​មិន​ឆ្ងាយ​ពី​ដី​ឡូត៍​របស់​លោក ព្រឿង ប្រមាណ​ជា ១៥ គីឡូម៉ែត្រ មាន​ក្រុមហ៊ុន ជប៉ុន មួយ​ឈ្មោះ​ថា ក្រុមហ៊ុន​វិនិយោគ ជប៉ុន ដោយ​វិនិយោគ​ដាំ​ម្រេច​លើ​ផ្ទៃ​ដី​ជាង ៦០ ហិកតា។

លោក ម៉ុច ស៊ុម អ្នក​គ្រប់​គ្រង​ចម្ការ​ម្រេច​បាន​ឲ្យ​ដឹង​ថា មាន​អាង​ស្ដុក​ទឹក​ចំនួន ៥ មាន​ទឹក​៣០ ០០០ លីត្រ​នៅ​ចន្លោះ​ចម្ការ​ទាំង​ពីរ​នេះ​ត្រូវ​បាន​ប្រើ​ប្រាស់​សម្រាប់​ស្រោច​ដំណាំ​ម្រេច​ចំនួន ១២ ៧៥០ ជន្លង់ នៅ​លើ​ផ្ទៃ​ដី ៨ ហិកតា​នៅ​ទី​នោះ​ក្នុង​ចំណោម​ផ្ទៃ​ដី ៦០ ហិកតា​របស់​ពួក​គេ។ តាម​រយៈ​ប្រព័ន្ធ​ស្រោច​ស្រព​ចម្ការ ដែល​ជា​ការ​រីក​ចម្រើន​ដ៏​សំខាន់​របស់​ឧស្សាហកម្ម​កំពុង​កើន​ឡើង​នៅ​លើ​ចម្ការ​មាន​ផ្ទៃ​ដី​តូច។ ផែនការ​កំពុង​ដំណើរការ​ជាច្រើន​ហិកតា​ទៀត។

ការ​ពង្រីក​ត្រូវ​បាន​គ្រោង​រួច​រាល់​ហើយ ប៉ុន្តែ​មិន​ត្រូវ​បាន​បញ្ជាក់​ពី​ឆ្នាំ​នឹង​ត្រូវ​ចាប់​ផ្តើម​នោះ​ទេ ដូច្នេះ​ចំនួន​ប្រមូល​ផល​មាន​ការ​លំបាក​ក្នុង​ការ​ព្យាករ។ ដើម​ម្រេច​អាច​ត្រូវ​បាន​កាត់​ចេញ​បន្ទាប់​ពី​រយៈ​ពេល ១២ខែ ដើម្បី​ដាំ​សា​ជា​ថ្មី។

លោក ម៉ុច ស៊ុម បាន​ថ្លែង​ថា៖ «ក្រុមហ៊ុន​នេះ​កំពុង​គិត​គូរ​ថា​តើ​យើង​ប្រមូល​ផល​នៅ​ឆ្នាំ ២០១៥ ឬ​ក៏​យើង​នឹង​កាត់​ដើម​ម្រេច​ដើម្បី​ពង្រីក​តំបន់​ដាំ​ដុះ​របស់​យើង។ ដូច​ដែល​អ្នក​មើល​ឃើញ​ហើយ ពេល​នេះ​ខ្ញុំ​កំពុង​រៀបចំ​ដី​សម្រាប់​ការ​ដាំ​បន្ថែម​ទៀត ប៉ុន្តែ​យើង​នឹង​ត្រូវ​តែ​គិត​មើល​សិន»។

ស្ថិត​នៅ​ក្នុង​ស្រុក ដំណាក់​ចង្អើរ ក្នុង​ខេត្ត កែប ចម្ការ​ម្រេច​ឈាន​មុខ​គេ​មួយ​ផ្សេង​ទៀត​ត្រូវ​បាន​ដាំ​តាំង​ពី​ខែ កញ្ញា ឆ្នាំ​មុន។ ចម្ការ​នេះ​គឺជា​ការ​វិនិយោគ​រួម​ដោយ​ក្រុមហ៊ុន ៤ មក​ពី​ប្រទេស សិង្ហបុរី ម៉ាឡេស៊ី ហុងកុង និង​ប្រទេស ចិន។ ក្រុមហ៊ុន​ទាំង ៤ នេះ​មាន​ឈ្មោះ​ថា ក្រុមហ៊ុន Valley of Pepper ក្រុមហ៊ុន Valley of Diamonds ក្រុមហ៊ុន Valley of Rubi និង​ក្រុមហ៊ុន Valley of Sapphire។

លោក ចាន់ សាម៉ែន អ្នក​គ្រប់​គ្រង​ទូទៅ​នៅ​ចម្ការ​នេះ ឲ្យ​ដឹង​ថា បច្ចុប្បន្ន​ការ​ដាំ​ដុះ​កំពុង​ធ្វើ​​នៅ​លើ​ផ្ទៃ​ដី ៣៩ ហិកតា។ តំបន់​បាន​ដាំ​ដុះ​ហើយ​មាន ១៥ ហិកតា ដែល​មាន​ដើម​ម្រេច​ចំនួន ៣៦ ៣២២ គុម្ព។

លោក​បាន​លើក​ឡើង​ថា៖ «យើង​រំពឹង​ថា​នឹង​ទទួល​បាន​ទិន្នផល​ម្រេច​ប្រហែល​ជា​ពី ២៥ ០០០ ទៅ ២៧ ០០០ គីឡូក្រាម​នៅ​ឆ្នាំ ២០១៦ ហើយ​ក៏​មាន​ផែនការ​ក្នុង​ការ​បង្កើន​ការ​ដាំ​ដុះ​ម្រេច​ដល់ ៧០ ០០០ ជន្លង់​នៅ​ឆ្នាំ​នេះ​ផង​ដែរ»។

លោក សាម៉ែន បាន​ឲ្យ​ដឹង​ថា ការ​ប្រមូល​ផល​របស់​ខេត្ត​នេះ​កាល​ពី​ឆ្នាំ​មុន​សម្រេច​បាន​តែ ៤០ ភាគរយ​នៃ​តម្រូវការ​ប៉ុណ្ណោះ។ ការ​នាំ​ចេញ​ភាគ​ច្រើន​ធ្វើ​តាម​រយៈ​សមាគម ហើយ​នាំ​ទៅ​កាន់​តំបន់ អឺរ៉ុប។

ការ​ចង់​បំពេញ​គម្លាត​នៃ​តម្រូវ​ការ​នៅ​ពេល​នេះ លោក ចាន់ សាម៉ែន បាន​និយាយ​ថា ក្រុមហ៊ុន​របស់​លោក​កំពុង​ស្វែង​រក​ទីផ្សារ​ថ្មីៗ​នៅ​អាស៊ី​និង​ជា​ពិសេស​នៅ​ក្នុង​ប្រទេស ចិន ដែល​ពួក​គេ​សង្ឃឹម​ថា តម្រូវការ​ជា​សកល​នឹង​កើន​ឡើង​កាន់​តែ​ច្រើន​បន្ថែម​ទៀត។

តម្លៃ​ដី​ដាំ​ដុះ​បាន​កើន​ឡើង​ចាប់​ពី ៣ ១០០ ដុល្លារ មុន​ឆ្នាំ ២០១៣ ដល់ ៦ ៥០០ ដុល្លារ​ក្នុង​មួយ​ហិកតា​នា​ពេល​បច្ចុប្បន្ន ដោយ​សារ​តែ​ការ​កើន​ឡើង​នៃ​ចំនួន​ចម្ការ​ម្រេច ហើយ​មិន​មាន​ជម្លោះ​ដីធ្លី​នៅ​ទី​នោះ​ទេ​ដោយ​សារ​កសិករ​ទទួល​បាន​តម្លៃ​តាម​ទីផ្សារ។

ត្រឡប់​មក​ដីឡូត៍​មាន​ដើម​ម្រេច​តូចៗ​របស់​លោក ព្រឿង ជា កសិករ​មាន​ដើម​ទុន​តិច​តួច ដរាប​ណា​គ្រប់​គ្នា​អនុវត្ត​តាម​ច្បាប់​របស់ GI លោក​មាន​ទំនុក​ចិត្ត​ថា អ្នក​រក​ស៊ី​កាន់​តែ​ធំ​នឹង​មិន​រំលោភ​លើ​ចំណែក​ដី​របស់​លោក​នោះ​ទេ។

លោក​បាន​និយាយ​ដោយ​ញញឹម​ថា៖ «កសិករ​ជាច្រើន​ធ្លាប់​ជិះ​កង់ ឬ​ម៉ូតូ​ចាស់ៗ​ពេល​នេះ​ពួកគេ​មាន​ម៉ូតូ​ថ្មី ហើយ​អ្នក​ខ្លះ​ថែម​ទាំង​មាន​រថយន្ត​ជិះ​ទៀត​ផង»៕ PB

អត្ថបទគួរចាប់អារម្មណ៍