ភ្នំពេញៈ ចាប់ពីក្រុមហ៊ុន ហេងអភិវឌ្ឍន៍ ប្រកាសកាលពីខែ មករាថា នឹងផលិតរថយន្តម៉ាក អង្គរ EV ២០១៣ ដើម្បីដាក់លក់នាឆ្នាំ ២០១៣ នេះ ដំណើរការផលិតរថយន្តប្រភេទនេះ នៅមិនទាន់ចេញជារូបរាងច្បាស់លាស់នៅឡើយទេ មកទល់ពេលនេះ ដោយសារកង្វះដើមទុនវិនិយោគ។
លោកស្រី សៀង ចាន់ហេង អគ្គនាយកក្រុមហ៊ុន ហេងអភិវឌ្ឍន៍ដែលជាក្រុមហ៊ុនផលិតរថយន្តម៉ាក EV ២០១៣ បានប្រាប់ ភ្នំពេញ ប៉ុស្តិ៍ កាលពីម្សិលមិញថា គម្រោងវិនិយោគនេះនៅមិនទាន់ដំណើរការល្អទេ ដោយសារកង្វះទុនដើម្បីការអភិវឌ្ឍ។ គម្រោងនេះត្រូវការទំហំទុនវិនិយោគប្រមាណ ១០០ លានដុល្លារដែលបច្ចុប្បន្នកំពុងស្វែងរកដៃគូសហការ។
លោកស្រីថ្លែងថា៖ «យើងពិតជាមានបំណងធ្វើឲ្យគម្រោងនេះដំណើរការមែនទែន យើងកំពុងពិចារណាក្នុងការទទួលកម្ចីពីធនាគារ។ វាជាការល្អបើរដ្ឋាភិបាលជួយជ្រោមជ្រែង ឬមានអ្នកមានប្រាក់អាចចូលមកវិនិយោគក្នុងគម្រោងនេះ»។
កាលពីខែ មីនា ឆ្នាំ ២០១១ ក្រុមហ៊ុន ហេង អភិវឌ្ឍន៍ បានចុះហត្ថលេខាលើកិច្ចព្រមព្រៀងត្រីភាគី ជាមួយក្រុមហ៊ុន Chou Leang Alliance Group និងលោក ញាណ ផល្លឹក ដែលជាអ្នកប្រឌិតថ្មីរថយន្តម៉ាកអង្គរកម្ពុជា ក្នុងការផលិតរថយន្តនេះនៅកម្ពុជា។ តែបន្ទាប់មកក្រុមហ៊ុន Chou Leang Alliance Group បានដកខ្លួនពីគម្រោងវិនិយោគនេះវិញ។
លោក ស្រី ចាន់ហេង បន្តថា៖ «រថយន្តដែលយើងបានផលិតនាពេលនេះគឺធ្វើឡើងដោយដៃ មិនទាន់មានឧបករណ៍ទំនើបដើម្បីដំឡើងនៅឡើយទេ ព្រោះដើមទុនរបស់យើងមិនគ្រប់គ្រាន់»។
ក្រុមហ៊ុនមិនបញ្ជាក់ថា បានផលិតរថយន្តប៉ុន្មាននៅឡើយនោះទេក្នុងអំឡុងពេលនេះតែលើកឡើងថា មានចំនួនតិចតួចដែរ។ លោកស្រី ចាន់ហេង ឲ្យដឹងថា នៅពេលរថយន្តដាក់លក់ វាអាចមានតម្លៃជិត ១០ ០០០ ដុល្លារ ក្នុងមួយគ្រឿង។
បើរថយន្ត អង្គរ EV ២០១៣ នេះត្រូវបានដាក់លក់ក្នុងពេលឆាប់ៗខាងមុខនេះមែននោះវានឹងចូលរួមក្នុងទីផ្សាររថយន្តនៅប្រទេស កម្ពុជា ដែលមានការ ប្រកួតប្រជែងខ្លាំង។
ខណៈដែលតម្រូវការរថយន្តនៅលើទីផ្សារកំពុងមានការកើនឡើងនៅកម្ពុជា ចំណែកទីផ្សារសម្រាប់លក់រថយន្តថ្មីនៅមានតិចតួចប៉ុណ្ណោះគឺ មានតែប្រមាណពី ៨ ទៅ ១០ ភាគរយក្នុងចំណោមទីផ្សាររថយន្តសរុប។ ចំណែកប្រមាណ ៩០ ភាគរយ ជារថយន្តជជុះ។
លោក សេង វឹង ប្រធានគ្រប់គ្រងផ្នែករថយន្ត Ford ប្រចំាកម្ពុជាមានប្រសាសន៍ថា ក្នុងរយៈពេល ៦ ខែឆ្នាំនេះ សន្ទុះនៃការលក់រថយន្តថ្មីមានការកើនឡើងប្រមាណ ២៥ ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
តាមការស្រាវជ្រាវរបស់ក្រុមហ៊ុន Ford នៅកម្ពុជាដែលបានធ្វើឡើងកាលពីឆ្នាំមុនទីផ្សាររថយន្តថ្មីមានប្រមាណពី ២ ៥០០ គ្រឿងទៅ ៣ ០០០ គ្រឿងក្នុងមួយឆ្នាំ ហើយក្នុងនោះក្រុមហ៊ុនលក់រថយន្តដែលមានអាជ្ញាប័ណ្ណត្រឹមត្រូវមានប្រហែល ១០ ក្រុមហ៊ុន៕
