ភ្នំពេញៈ តម្លៃដំឡូងមីតាមបណ្តាខេត្តជាប់ព្រំដែនកម្ពុជា និងប្រទេសជិតខាងនារដូវប្រមូលផលឆ្នាំ ២០២០-២០២១ នេះបានកើនឡើងដែលជះឥទ្ធិពលពីការធ្លាក់ចុះនៃបរិមាណផ្គត់ផ្គង់ធៀបនឹងរដូវកាលកន្លងមក។ នេះបើតាមប្រធានមន្ទីរពាណិជ្ជកម្មយ៉ាងហោច ២ នៃខេត្តជាប់ព្រំដែន។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបងបានប្រាប់ភ្នំពេញប៉ុស្តិ៍ថា ការនាំចេញដំឡូងមីក្នុងខែមករា និងកុម្ភៈកន្លងមកទៅកាន់ទីផ្សារប្រទេសថៃបានប្រមាណ ១០ ម៉ឺនតោន ជាមួយតម្លៃប្រសើរជាងរដូវកាលកន្លងមក។
លោកអះអាងថា នៅដើមឆ្នាំនេះដំឡូងមីមានតម្លៃល្អជាងឆ្នាំមុន ដោយដំឡូងមីស្ងួតមានតម្លៃ ៨៧០ រៀលក្នុង ១ គីឡូក្រាម បើធៀបនឹងរយៈពេលដូចគ្នាពីឆ្នាំមុនតម្លៃកើន ២០០ រៀលក្នុង ១ គីឡូក្រាម។ ទិន្នផលដំឡូងមីខេត្តបាត់ដំបងប្រមាណ ៨០ ភាគរយត្រូវបាននាំចេញទៅកាន់ប្រទេសថៃ។
លោកប្រាប់ថា៖ «គ្រោះទឹកជំនន់នាពេលកន្លងមកបាននាំឱ្យទិន្នផលដំឡូងមីធ្លាក់ចុះ និងធ្វើឱ្យដំឡូងមីមានទីផ្សារ និងតម្លៃល្អប្រសើរនៅឆ្នាំនេះ»។
យោងតាមក្រសួងកសិកម្មកាលពីថ្ងៃទី ៤ ខែមីនា កម្ពុជាបាននាំចេញដំឡូងមីក្រៀមចំនួន ៤ ២០០ តោនទៅកាន់ប្រទេសថៃតាមច្រកអន្តរជាតិភ្នំដី នៃស្រុកសំពៅលូន ខេត្តបាត់ដំបង ដោយមានតម្លៃ ៨០ ម៉ឺនរៀល (២០០ ដុល្លារ) ក្នុង ១ តោន។
ដំឡូងមីត្រូវបានគេចាប់ផ្តើមដាំក្នុងខែឧសភា និងចាប់ផ្តើមប្រមូលផលបន្តបន្ទាប់ចាប់ពីខែវិច្ឆិការហូតដល់ចុងខែកុម្ភៈក្នុងឆ្នាំបន្ទាប់។
លោក តូច សុខន ប្រធានមន្ទីរពាណិជ្ជកម្មខេត្តត្បូងឃ្មុំជាប់ព្រំដែនកម្ពុជា-វៀតណាមបានឱ្យដឹងថា ក្នុងខេត្តត្បូងឃ្មុំ ដំឡូងមីស្រស់នាពេលបច្ចុប្បន្នមានតម្លៃពី ៥០០ ទៅ ៦០០ រៀល ដែលហក់ឡើងពីចន្លោះជាង ២០០ ទៅ ៣៦០ រៀលក្នុង ១ គីឡូក្រាមក្នុងរដូវកាលនៃឆ្នាំមុន ហើយបច្ចុប្បន្នដំឡូងមីស្ងួតមានតម្លៃ ៩០០ រៀលក្នុង ១ គីឡូក្រាមដែលនេះជាតម្លៃលក់នៅច្រកព្រំដែន។
លោកបន្តថា លំហូរពាណិជ្ជកម្មតាមព្រំដែនកំពុងមមាញឹកខ្លាំងនារដូវប្រមូលផលដែលជាមធ្យមមានឡានដឹកដំឡូងមីទៅលក់នៅព្រំដែនវៀតណាមប្រមាណ ១០០ គ្រឿងក្នុង ១ ថ្ងៃ។
លោក សុខន បានឱ្យដឹងថា៖ «តម្លៃដំឡូងមីនៅឆ្នាំនេះកើនខ្ពស់ដោយសារការប្រមូលផលទាបជាងឆ្នាំមុន ហើយម្យ៉ាងផ្ទៃដីដាំដុះក៏ថយចុះ ដែលនាំឱ្យមានតម្រូវការខ្ពស់»។
លោក វ៉ាន សំណាង កសិករដាំដុះដំឡូងមីក្នុងឃុំទំរីង ស្រុក សណ្តាន់ ក្នុងខេត្តកំពង់ធំ បានឱ្យដឹងថា លោកបញ្ចប់ការប្រមូលផលពីសប្តាហ៍មុន ដោយបានប្រហែល ១០ តោនលើដី ១០ ហិកតា។ លោកបានកត់សម្គាល់ថា តម្លៃដំឡូងមីស្រស់ឡើងជាបន្តបន្ទាប់ ដោយកាលពីខែមករា លក់ក្នុងតម្លៃ ៣០០ រៀលក្នុង ១ គីឡូក្រាម ហើយបន្តឡើងរហូតដល់ ៤៩០ រៀលក្នុង ១ គីឡូក្រាមកាលពីខែមុន។
លោកនិយាយថា៖«ខ្ញុំមើលឃើញថា ឆ្នាំនេះទីផ្សារដំឡូងមីល្អ ប៉ុន្តែទិន្នផលដែលខ្ញុំប្រមូលបានទាបជាងឆ្នាំមុន»។
យោងតាមលោក វេង សាខុន រដ្ឋមន្ត្រីក្រសួងកសិកម្ម កម្ពុជាបាននាំចេញដំឡូងមីក្នុងរយៈពី ២ ខែដើមឆ្នាំនេះ ចំនួន ៩៥៧ ២០១,៥៦ តោនក្នុងនោះដំឡូងមីស្រស់ ១៥៤ ៧៥០ តោន។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មថ្លែងក្នុងពិធីប្រកាសផ្សព្វផ្សាយជាផ្លូវការនូវគោលនយោបាយជាតិស្តីពីដំឡូងមីកាលពីមុនថា ដំណាំដំឡូងមីគឺជាដំណាំកសិឧស្សាហកម្ម និងជាផលិតផលនាំចេញដ៏សំខាន់របស់កម្ពុជាដែលបានរួមចំណែកពី ៣ ទៅ ៤ ភាគរយនៃ GDP និងក្នុង ១ ឆ្នាំៗ៕ LA