.jpg)
សន្តិសុខម្នាក់ដើរមុខក្រុមហ៊ុនផ្សារមូលបត្រកម្ពុជា (ផ.ម.ក) ។ ហេង ជីវ័ន
ភ្នំពេញៈ ក្រុមហ៊ុនផ្សារមូលបត្រកម្ពុជា (ផ.ម.ក) បានសម្រេចជាគោលការណ៍លើកពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិនៅទីផ្សារកំណើនរបស់ក្រុមហ៊ុន ឌី ប៊ី ឌី អ៊ិនជីនារីង ម.ក.។ នេះបើតាមសេចក្តីជូនដំណឹងរបស់ ផ.ម.ក បានផ្សាយកាលពីថ្ងៃទី ៨ ខែមេសា។
សេចក្តីជូនដំណឹង ឲ្យដឹងទៀតថា ដើម្បីអាចចុះបញ្ជី និងដាក់ឲ្យជួញដូរភាគហ៊ុនរបស់ខ្លួននៅ ផ.ម.ក ក្រុមហ៊ុន ឌី ប៊ី ឌី អ៊ិនជីនារីង ត្រូវតែទទួលបានការអនុញ្ញាតឲ្យបោះផ្សាយលក់មូលបត្រកម្មសិទ្ធិជាសាធារណៈពីនិយ័តករមូលបត្រកម្ពុជា និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធនឹងការចុះបញ្ជីនៅ ផ.ម.ក។
សេចក្តីជូនដំណឹងបន្តថា ក្រុមហ៊ុននេះ គឺជាក្រុមហ៊ុនទី១ ដែលទទួលបានឯកភាពលើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិនៅទីផ្សារកំណើនរបស់ ផ.ម.ក ហើយក៍ជាក្រុមហ៊ុនទី១ ដែលរំពឹងថានឹងចុះបញ្ជីលក់មូលបត្រកម្មសិទ្ធិក្នុងឆ្នាំ ២០២១ នេះ។
សេចក្តីជូនដំណឹងបញ្ជាក់ថា៖ «ក្រុមហ៊ុន ឌី ប៊ី ឌី អ៊ិនជីនារីង បានប្រតិបត្តិការធុរកិច្ចរបស់ខ្លួនជាង ២ ទសវត្សកន្លងមកដែលជាក្រុមហ៊ុនឈានមុខគេមួយក្នុងវិស័យវិស្វកម្ម និង សំណងដោយផ្តោតលើផ្តល់សេវាកម្មផ្នែក មេកានិច អគ្គិសនី ប្រព័ន្ធបំពង់ទឹក និងសំណងស៊ីវិល ទៅដល់អតិថិជនធំៗជាច្រើននៅកម្ពុជា»។
សេចក្តីជូនដំណឹងនេះ បានឲ្យដឹងទៀតថា ជាមួយគ្នានេះ ផ.ម.ក ក៏បានសម្រេចលើកលែងការយកថ្លៃសេវាទៅលើការពិនិត្យលទ្ធភាពអាចចុះបញ្ជី និងថ្លៃសេវាចុះបញ្ជីលក់មូលបត្រកម្មសិទ្ធិលើកដំបូងដល់ក្រុមហ៊ុន ឌី ប៊ី ឌី អ៊ិនជីនារីង ដែលជាសកម្មភាពមួយដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការជួយជំរុញ និងគាំទ្រដល់សហគ្រាសធុនតូច និងមធ្យមឲ្យកាន់តែរីកចម្រើន និងអាចឈានដល់ការប្រកួតប្រជែងជាមួយក្រុមហ៊ុននៅក្នុងតំបន់៕
