ភ្នំពេញៈ តម្លៃកូនក្រពើនៅដើមរដូវឆ្នាំ ២០១៨ បានកើនឡើងជិត ៣០ ភាគរយបើធៀបនឹងឆ្នាំមុន ដែលជំរុញដោយតម្រូវការពីប្រទេសវៀតណាម ខណៈមន្ត្រីរដ្ឋាភិបាលបានហៅអាជីវកម្មលក់កូនក្រពើជាការខាតបង់មួយដ៏ធំសម្រាប់ម្ចាស់កសិដ្ឋាន។
តម្លៃកូនក្រពើដែលឈ្មួញដើរប្រមូលទិញតាមកសិដ្ឋានដើម្បីនាំចេញទៅវៀតណាមបានកើនឡើងពី ១៤ ដុល្លារក្នុង ១ ក្បាលកាលពីឆ្នាំទៅរហូតដល់ ១៨ ដុល្លារ។ នេះបើយោងតាមម្ចាស់កសិដ្ឋាន។
លោក គីរី សុខុម ម្ចាស់កសិដ្ឋានចិញ្ចឹមក្រពើ ១ កន្លែងនៅក្នុងខេត្តសៀមរាបបានឲ្យដឹងថាតម្លៃនៅដើមដូងនេះពិតជាល្អ។
បើទោះបីយ៉ាងនេះក្តីលោកមានជំនឿថាតម្លៃនេះនឹងធ្លាក់ចុះវិញនៅពេលកូនក្រពើកាន់តែច្រើននឹងត្រូវបានផ្គត់ផ្គង់ក្នុងទីផ្សារ។ លោកថ្លែងថា៖ «នៅពេលលក់ដំបូងតែងតែបានតម្លៃខ្ពស់តែនៅពេលចុងក្រោយតម្លៃវាបានធ្លាក់ចុះយ៉ាងច្រើនដែលអាចធ្វើឲ្យអ្នកចិញ្ចឹមមួយចំនួនប្រឈមមុខនឹងការខាតបង់ទៀតផង»។
បច្ចុប្បន្នលោក សុខុម ចិញ្ចឹមក្រពើប្រហែល ៥០០ ក្បាលដែលភ្ញាស់បានកូនចន្លោះពីជាង ២ ០០០ ទៅ ៣០០០ ក្បាល។
លោក លឹម រិទ្ធី សមាជិកសមាគមអ្នកចិញ្ចឹមក្រពើខេត្តសៀមរាប និងជាម្ចាស់កសិដ្ឋានចិញ្ចឹមក្រពើ ១ កន្លែងដែលមានក្រពើជិត ៥០០ ក្បាលដែរ នោះបានឲ្យដឹងថានៅដើមរដូវនេះឈ្មួញកំពុងសម្រុកទិញដើម្បីយកទៅវៀតណាម។
លោកថ្លែងថា៖ «កូនក្រពើត្រូវបានគេប្រមូលទិញពីកម្ពុជាយកទៅលក់ឲ្យអ្នកចិញ្ចឹមនៅប្រទេសវៀតណាម។ ការចិញ្ចឹមនៅវៀតណាមគឺគេចិញ្ចឹមយកស្បែកលក់ទៅឲ្យប្រទេសចិន»។
លោក វិចិត្រ ដែលជាឈ្មួញប្រមូលទិញកូនក្រពើបាននិយាយថា ជារៀងរាល់ឆ្នាំលោកតែងតែប្រមូលទិញកូនក្រពើពីកម្ពុជាយកទៅលក់នៅប្រទេស វៀតណាមតាមការបញ្ជាទិញពីម្ចាស់កសិដ្ឋាននៅវៀតណាម។ លោកបន្តថា៖ «តម្លៃកូនក្រពីត្រូវបានកំណត់ដោយអ្នកចាំទទួលទិញនៅវៀតណាម»។
អ្នកចិញ្ចឹមក្រពើភាគច្រើននៅកម្ពុជាមិនបានផ្តោតលើការចិញ្ចឹមយកស្បែកទេ ទោះបីវាបានផ្តល់តម្លៃខ្ពស់ក៏ដោយ ប៉ុន្តែការចិញ្ចឹមសម្រាប់តែការផ្គត់ផ្គង់ក្រពើរស់ទៅប្រទេសជិតខាងប៉ុណ្ណោះ។
មន្ត្រីរដ្ឋាភិបាលបានចាត់ទុកការធ្វើអាជីវកម្មបែបនេះជាការខាតបង់តម្លៃដ៏ធំនៅក្នុងវិស័យនេះ។
លោក ណៅ ធួក រដ្ឋលេខាធិការនៃក្រសួងកសិកម្មរុក្ខាប្រមាញ់ និងនេសាទ បានឲ្យដឹងថាកូនក្រពើកម្ពុជាភាគច្រើននាំចេញទៅវៀតណាម ថៃ និងតិចតួចទៅចិន។
ខណៈលោកស្វាគមន៍ពីកំណើនតម្លៃកូនក្រពើនៅឆ្នាំនេះលោកចាត់ទុកថា ការចិញ្ចឹមយកស្បែកនឹងផ្តល់តម្លៃកាន់តែខ្ពស់។ លោកថ្លែងថា៖ «ជាធម្មតាតម្លៃស្បែកក្រពើតែងត្រូវបានកំណត់ដោយទីផ្សារអន្តរជាតិ។ ផលិតផលពីស្បែកក្រពើមិនចុះតម្លៃទេគឺមានតែការកើនឡើង»។
លោកបានបន្តថា៖ «ពួកគេអាចរកចំណូលបានចន្លោះពី ២០០ ទៅ ៣០០ ដុល្លារសម្រាប់ស្បែកក្រពើ ១ ក្បាល បើពួកគេចិញ្ចឹមយកស្បែក»។ លោកលើកឡើងថា៖ «បើតាមខ្ញុំដឹងមានតែប្រទេសកម្ពុជាទេដែលមានទម្លាប់ចិញ្ចឹមក្រពើដើម្បីយកកូនទើបញាស់លក់ ខណៈប្រទេសផ្សេងៗទៀតគេចិញ្ចឹមយកស្បែកដែលមានតម្លៃខ្ពស់សម្រាប់នាំចេញ»។
យោងសេចក្តីរាយការណ៍របស់ភ្នំពេញ ប៉ុស្តិ៍កន្លងមកមានកសិដ្ឋានចិញ្ចឹមក្រពើសរុប ២១ ត្រូវបានទទួលស្គាល់ដោយអនុសញ្ញាអន្តរជាតិដែលជាអនុសញ្ញា (Cites) ដើម្បីការនាំចេញស្បែកក្រពើដោយស្របច្បាប់ទៅទីផ្សារអន្តរជាតិ។ យោងតាមទិន្នន័យរបស់ក្រសួងកសិកម្មមានកសិដ្ឋានចិញ្ចឹមក្រពើប្រហែល ៧០០ កន្លែងនៅកម្ពុជាក្នុងនោះមានកសិដ្ឋានចិញ្ចឹមក្រពើ ៤៤៥ កន្លែងត្រូវបានចុះបញ្ជីនៅក្រសួងកសិកម្ម។
គ្រាន់តែនៅក្នុងខេត្តសៀមរាបមួយមានក្រពើចន្លោះពី ៣០-៤០ ម៉ឺនក្បាល។ នេះបើយោងតាម លឹម រិទ្ធី៕LA