.jpg)
កូនក្រពើទើបញាស់នៅក្នុងកសិដ្ឋានចិញ្ចឹម ១ កន្លែង។ ហេង ជីវ័ន
ភ្នំពេញៈ តម្លៃកូនក្រពើទើបញាស់បានធ្លាក់ចុះទាបបំផុតមិនធ្លាប់មាននាអំឡុងពេលនេះ ខណៈអ្នកចិញ្ចឹមបានស្នើឲ្យរដ្ឋាភិបាលជួយរកទីផ្សារអន្តរជាតិសម្រាប់ការនាំចេញដោយផ្ទាល់ ដើម្បីចៀសវាងពីការពឹងផ្អែកលើការប្រមូលទិញពីសំណាក់ឈ្មួញប្រទេសជិតខាង។
កូនក្រពើទើបញាស់ពេលនេះ (ថ្ងៃចន្ទ) មានតម្លៃក្រោម ២,៥ ដុល្លារក្នុង ១ ក្បាល ដែលនេះជាការធ្លាក់ចុះខ្លាំងបំផុតមិនធ្លាប់មាននាពេលកន្លងមក ខណៈក្នុងអំឡុងពេលនេះកាលពីឆ្នាំមុន កូនក្រពើមានតម្លៃចន្លោះពី ៧-១០ ដុល្លារ។
ជាធម្មតាក្រពើមេ តែងពងកូនចាប់ពីចុងខែកុម្ភៈរហូតដល់ខែឧសភា និងចាប់ផ្តើមញាស់ចាប់ពីខែមេសារហូតដល់ខែកក្កដារៀងរាល់ឆ្នាំ។
សមាជិកសមាគមអ្នកចិញ្ចឹមក្រពើខេត្តសៀមរាបលោក រាជ ច័ន្ទថន ដែលមានចិញ្ចឹមក្រពើធំៗប្រមាណជាង ៥០០ ក្បាល បានប្រាប់ភ្នំពេញប៉ុស្តិ៍កាលពីថ្ងៃចន្ទថា អ្នកចិញ្ចឹមក្រពើកំពុងប្រឈមនឹងការខាតបង់ធ្ងន់ធ្ងរ ដោយតម្លៃកូនក្រពើបានធ្លាក់ចុះយ៉ាងគំហុក ហើយមិនមានអ្នកទិញទៀតផង។ លោកបន្តថា តាមពិតទៅតម្លៃកូនក្រពើបានធ្លាក់ចុះប្រមាណ ៣ ឆ្នាំមកហើយ ប៉ុន្តែ ២ ឆ្នាំមុនវាមិនបានធ្លាក់ចុះខ្លាំងដូចឆ្នាំនេះទេ។
ជាមួយបទពិសោធចិញ្ចឹមក្រពើជាង ៣០ ឆ្នាំលោក ច័ន្ទថន បានប្រាប់ថា៖ «ក្រពើឥឡូវស៊ីមាស និងស៊ីប្លង់ដីខ្លះហើយ ព្រោះតម្លៃកូនក្រពើឆ្នាំនេះធ្លាក់ចុះជាគំហុកដែលធ្វើឲ្យអ្នកចិញ្ចឹមត្រូវខាតបង់ជាច្រើន»។
លោកបន្ថែមថា តម្លៃទទួលបានពីការលក់កូនយ៉ាងច្រើនអាចយកទៅទិញចំណីឲ្យក្រពើធំៗស៊ីបាន ៣ ខែប៉ុណ្ណោះ។
យោងតាមលោក ច័ន្ទថន មានកត្តាចម្បង ២ ដែលធ្វើឲ្យតម្លៃកូនក្រពើធ្លាក់ចុះ គឺការមិនមានទីផ្សារអន្តរជាតិផ្ទាល់ និងការក្រឡុកទីផ្សាររបស់ឈ្មួញមកពីប្រទេសវៀតណាម ខណៈប្រទេសថៃមិនបានមកប្រមូលទិញដូចពេលមុនទេ។
លោកថ្លែងថា៖ «ប្រសិនបើមានការជួយពីអាជ្ញាធរដែលអនុញ្ញាតឲ្យកម្ពុជាអាចនាំចេញក្រពើទៅប្រទេសចិនដោយផ្ទាល់ ខ្ញុំគិតថាវានឹងល្អ និងបានតម្លៃខ្ពស់ ព្រោះចិនជាទីផ្សារធំ មានតម្រូវការស្បែកក្រពើច្រើន ព្រមទាំងអាចចៀសផុតពីការបង្អាប់ថ្លៃរបស់ឈ្មួញទៀតផង»។
ក្នុង ១ ឆ្នាំ ការចិញ្ចឹមក្រពើនៅកម្ពុជាអាចបានកូនចន្លោះពី ៨០ ម៉ឺនទៅ ១ លានក្បាល។ នេះបើតាមលោក ច័ន្ទថន។
លោក ចក់ សុជាតិ ដែលមានចិញ្ចឹមក្រពើមេជាង ២០០ ក្បាល ក្នុងខេត្តសៀមរាបបាននិយាយថា ក្រពើនៅពេលនេះគឺមិនមានទីផ្សារតែម្តងដោយធ្វើឲ្យអ្នកចិញ្ចឹមខាតបង់ប្រាក់ជាច្រើន ខណៈត្រីចំណីក្រពើក៏កើនឡើងដែរ។ លោកបន្តថា តម្លៃទទួលបានក្នុងរង្វង់ ២,៥ ដុល្លារនេះធ្វើឲ្យអ្នកចិញ្ចឹមត្រូវចំណាយលើសលប់ទៅវិញលើចំណីរបស់វា។
លោកប្រាប់ថា៖ «ជាមួយនឹងស្ថានភាពបែបនេះ បើមានអ្នកប្រមូលទិញ ខ្ញុំនឹងលក់ក្រពើទាំងអស់តែម្តង ព្រោះបើទុកកាន់តែយូរ ការចំណាយលើចំណីនឹងកាន់តែច្រើន»។
តាមលោក សុជាតិ ត្រីចំណីក្រពើមានតម្លៃជាង ២ ០០០ រៀល ក្នុង ១ គីឡូក្រាម។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញ-ប៉ុស្តិ៍ថា ក្រសួងមិនដែលព្រងើយកន្តើយនៅក្នុងការស្វះស្វែងរកទីផ្សារអន្តរជាតិ ដើម្បីនាំចេញសត្វក្រពើដោយផ្ទាល់ពីកម្ពុជាទេ ប៉ុន្តែបញ្ហានៅត្រង់ផលិតផលនេះមិនមានការបញ្ជាទិញ។
លោកបន្តថា ការធ្លាក់ចុះតម្លៃ និងគ្មានទីផ្សារនៅពេលនេះអាចបណ្តាលមកពីកត្តាមួយចំនួនដូចជា ភាពស្ងប់ស្ងាត់នៅទីផ្សារអន្តរជាតិ គុណភាពស្បែកក្រពើកម្ពុជាមិនត្រូវតាមស្តង់ដា និងការចិញ្ចឹមក្រពើមានច្រើននៅស្ទើរគ្រប់ប្រទេសក្នុងពិភពលោក។ លោកបានថ្លែងថា៖ «តម្លៃក្រពើនៅកម្ពុជាគឺអាស្រ័យលើទីផ្សារអន្តរជាតិ ហេតុនេះបើមិនមានការបញ្ជាទិញពីអន្តរជាតិតម្លៃក៏ធ្លាក់ចុះទៅតាមនោះដែរ»។
លោកប្រាប់ទៀតថា លោកតែងខិតខំធ្វើការផ្សព្វផ្សាយពីសក្តានុពលរបស់កម្ពុជាទៅកាន់អ្នកវិនិយោគ ដើម្បីទាក់ទាញឲ្យពួកគេចូលមកបណ្តាក់ទុន ឬក៏រៀបចំការចិញ្ចឹមដែលមានលក្ខណៈស្តង់ដាស្របតាមការចង់បានរបស់អ្នកបញ្ជាទិញ ខណៈការចិញ្ចឹមក្រពើនៅកម្ពុជាភាគច្រើនជាការអនុវត្តតៗគ្នា ដែលធ្វើឲ្យស្បែកក្រពើមិនមានលក្ខណៈល្អគ្រប់គ្រាន់។
លោកបន្ថែមថា៖ «ការចិញ្ចឹមបែបនេះបានធ្វើឲ្យស្បែកក្រពើយើងមិនត្រូវតាមស្តង់ដាដែលគេចង់បាន»។
របាយការណ៍ឆ្នាំ ២០១៩ ពីក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ការចិញ្ចឹមក្រពើនៅកម្ពុជាសម្រេចបាន ៤២១ ៨១១ ក្បាល ស្មើនឹង ១៣៧,៦៧ ភាគរយ នៃផែនការ ៣០០ ០០០ ក្បាល បើធៀបនឹងឆ្នាំ ២០១៨ កើនឡើង ២ ៨១១ ក្បាល៕ LA
វីដេអូ៖
