ភ្នំពេញៈ តម្លៃកៅស៊ូកម្ពុជានៅលើទីផ្សារអន្តរជាតិក្នុងពេលនេះស្ថិតនៅចន្លោះពី ១ ៣៥០ ទៅ ១ ៤០០ ដុល្លារ ក្នុង ១ តោន ដោយកើនឡើងតិចតួចបើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមអ្នកនៅក្នុងវិស័យកៅស៊ូកម្ពុជា។
របាយការណ៍ក្រសួងកសិកម្ម រុក្ខាប្រមាញ់ និងនេសាទបង្ហាញថា គិតត្រឹមដំណាច់ឆមាសទី ១ ឆ្នាំ ២០២០ កម្ពុជាមានដីដាំដុះកៅស៊ូ ៤០៤ ៧០១ ហិកតា ក្នុងនោះផ្ទៃដីចៀរជ័រមានចំនួន ២៥០ ១០៧ ហិកតា និងផ្ទៃដីថែទាំកៅស៊ូមាន ១៥៤ ៥៩៤ ហិកតា។
ក្នុងឆមាសទី ១ ឆ្នាំ ២០២០ ការប្រមូលផលកៅស៊ូសម្រេចបាន ៩៧ ៩៣៦តោន កើនឡើង ១៨ ភាគរយ ឬស្មើនឹង ១៥ ២៥៨ តោន បើធៀបនឹងរយៈពេលដូចគ្នា ឆ្នាំ ២០១៩។ ចំណែកការនាំចេញសម្រេចបាន ៩៧ ១៧៥ តោនកើនឡើង ១៧ ភាគរយ។
លោក ហេង ស្រេង ប្រធានគ្រប់គ្រងទូទៅក្រុមហ៊ុន Long Sreng International Co., Ltd ដែលវិនិយោគលើចម្ការកៅស៊ូស្ថិតក្នុងខេត្តកំពង់ចាម បានប្រាប់ភ្នំពេញប៉ុស្តិ៍កាលពីថ្ងៃចន្ទថា តម្លៃកៅស៊ូពេលនេះបានកើនឡើងតិចតួចធៀបនឹងរយៈពេលដូចគ្នាឆ្នាំមុន។ លោកបន្តថា ទោះបីយ៉ាងណា ដោយសារតម្លៃដែលទទួលបានពីការដាំដុះកៅស៊ូមានកម្រិតទាបខ្លាំង ដូច្នេះចំនួននៃការវិនិយោគ និងការដាំដុះមិនបានកើនឡើងទេ។
លោកថ្លែងថា៖ «តម្លៃឆ្នាំនេះល្អជាងឆ្នាំមុនបន្តិច ដោយកើនប្រហែល ៥០ ដុល្លារ ក្នុង ១ តោន បើធៀបនឹងពេលដូចគ្នាឆ្នាំមុន»។ លោកបានបន្តថា៖ «ទោះយ៉ាងណាសម្រាប់តម្លៃទីផ្សារកៅស៊ូ គឺមិនល្អទេ»។
លោកបន្ថែមថា ស្ថានភាពនៃការដាំកៅស៊ូក្នុងពេលនេះមិនល្អទេ ដោយមានអ្នកដាំកៅស៊ូមួយចំនួនបាននាំគ្នាកាប់ដើមកៅស៊ូចោលដើម្បីយកដីទៅដាំដុះដំណាំកសិកម្មផ្សេងៗទៀតដូចជា ចេក ស្វាយ និងដំណាំហូបផ្លែមួយចំនួនទៀត។ លោកបានអះអាងថា៖ «កន្លែងខ្ញុំដើមកៅស៊ូដែលចាស់ៗ ខ្ញុំឲ្យគេកាប់ចោលដើម្បីដាក់ដាំចេកជំនួសវិញមួយចំនួន។ ដោយបច្ចុប្បន្ននេះផ្ទៃដីដាំកៅស៊ូនៅសល់ប្រមាណ ៣ ៤០០ ហិកតា និងផ្ទៃដីដាំដើមចេកមានជាង ១ ៥០០ ហិកតា»។
បើតាមលោក ហេង ស្រេង បច្ចុប្បន្នជ័រកៅស៊ូលេខ ១ របស់កម្ពុជាមានតម្លៃចន្លោះពី ១ ៣៥០ ដុល្លារ ទៅ ១ ៤០០ ដុល្លារ ក្នុង ១ តោន នៅពេលដឹកទៅដល់ប្រទេសចិន ឬម៉ាឡេស៊ី។
ដោយមិនសូវមានសុទិដ្ឋិនិយមចំពោះតម្លៃកៅស៊ូនៅទីផ្សារអន្តរជាតិលោក ម៉ែន សុភក្តិ ប្រធានក្រុមហ៊ុនវិនិយោគ សុភក្តិនីកា បានប្រាប់ថា តម្លៃកៅស៊ូឆ្នាំនេះមានភាពប្រហាក់ប្រហែល ឬធ្លាក់ចុះបន្តិចបើធៀបនឹងរយៈពេលដូចគ្នាឆ្នាំមុនដោយបច្ចុប្បន្នកៅស៊ូដែលដឹកទៅលក់ដល់កំពង់ផែក្រុងហូជីមិញ (វៀតណាម) មានតម្លៃប្រមាណ ១ ៣៦០ ដុល្លារ ក្នុង ១ តោន។
លោកបន្តថា បញ្ហាតម្លៃបានធ្វើឲ្យការវិនិយោគលើកៅស៊ូនៅកម្ពុជាធ្លាក់ចុះជាបន្តបន្ទាប់ ទាំងផ្ទៃដីដាំដុះ និងការវិនិយោគ។ លោកប្រាប់ថា៖ «សម្រាប់ស្ថានភាព ២-៣ ឆ្នាំចុងក្រោយនេះផ្ទៃដីដាំកៅស៊ូមិនបានកើនទេ ខណៈមានរោងចក្រកែច្នៃកៅស៊ូមួយចំនួនបានផ្អាក ឬបិទដំណើរការតែម្តង»។
លោកលើកឡើងទៀតថា បើទោះបីកម្ពុជាមានផ្ទៃដីដាំដុះកៅស៊ូច្រើនក៏ដោយ ប៉ុន្តែទិន្នផលដែលប្រមូលបានមិនត្រូវបានយកមកប្រើប្រាស់ ឬកែច្នៃជាផលិតផលក្នុងស្រុកនោះទេ។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីកាលពីសប្តាហ៍មុន បាននិយាយថា តាមការរំពឹងទុកក្នុងឆ្នាំ ២០២០ នេះកម្ពុជាអាចនឹងនាំចេញកៅស៊ូទៅកាន់ទីផ្សារអន្តរជាតិក្នុងបរិមាណ ៣០ ម៉ឺនតោន ព្រោះកៅស៊ូនឹងផ្តល់ផលច្រើននៅ ៤ ខែចុងក្រោយនៃឆ្នាំនីមួយៗ។
លោកបន្តថា តម្លៃកៅស៊ូកម្ពុជាបានកើនឡើងបន្តិចចាប់ពីចុងខែកក្កដា និងដើមខែសីហានេះ ដោយមានតម្លៃប្រមាណ ១ ៤០០ ដុល្លារ ក្នុង ១ តោន។
ខណៈបច្ចុប្បន្ននេះមានអ្នកវិនិយោគមួយចំនួនបានកាប់ដើមកៅស៊ូចោល ដើម្បីដាំដំណាំផ្សេងៗទៀតនោះលោក សុផា បានអះអាងថា៖ «កិច្ចការនេះយើងកុំបារម្ភពេក ដោយរហូតមកដល់ពេលនេះវាមិនទាន់មានផលប៉ះពាល់អ្វីនោះទេ»។
បើតាមលោក សុផា កៅស៊ូកម្ពុជាត្រូវបានទៅទីផ្សារវៀតណាម សិង្ហបុរី ម៉ាឡេស៊ី ចិន និងអឺរ៉ុប៕ LA