.jpg)
ទិដ្ឋភាពកសិកររង់ចាំរថយន្តមកដឹកស្រូវយកទៅលក់ឲ្យឈ្មួញនៅក្នុងខេត្តកំពង់ឆ្នាំងកាលពីពេលថ្មីៗនេះ។ រូបថត រ៉ាហ៊ីម
ភ្នំពេញៈ ម្ចាស់រោងម៉ាស៊ីនកិនស្រូវ និងឈ្មួញប្រមូលទិញស្រូវក្នុងខេត្តព្រៃវែង បានលើកឡើងថា ទោះបីជាប្រមុខរដ្ឋាភិបាលប្រកាសឲ្យផ្អាកការនាំចេញស្រូវ និងអង្ករសចាប់ពីចុងសប្តាហ៍នេះ និងបានជំរុញឲ្យអ្នកនៅក្នុងស្រុកបង្កើនការប្រមូលទិញស្រូវយកមកស្តុកទុកក៏ដោយ ប៉ុន្តែការប្រមូលទិញស្រូវជាក់ស្តែងរបស់ពួកគាត់គឺមិនមានកំណើននោះទេ។
លោកនាយករដ្ឋមន្ត្រី ហ៊ុន សែន កាលពីថ្ងៃទី ៣០ ខែមីនា បានចេញបញ្ជាឲ្យផ្អាកការនាំចេញស្រូវ និងអង្ករស ជាបណ្តោះអាសន្នទៅបរទេសចាប់ពីថ្ងៃទី ៥ ខែ មេសា ឆ្នាំ ២០២០ ក្រោមហេតុផលដើម្បីធានាបានសន្តិសុខស្បៀងក្នុងកាលៈទេសៈនៃការរីករាលដាលនៃជំងឺកូវីដ ១៩។ ទន្ទឹមនឹងនេះលោកក៏បានស្នើឲ្យរោងម៉ាស៊ីនកិនស្រូវទាំងអស់ត្រូវយកចិត្តទុកដាក់ប្រមូលទិញស្រូវនៅតាមទីកន្លែងដែលប្រជាជនធ្វើការច្រូតកាត់ដោយរក្សាតម្លៃស្រូវឲ្យបានល្អ ចៀសវាងការបង្អាប់ថ្លៃផងដែរ។
លោក ឈុន ធំ ប្រធានរោងម៉ាស៊ីនកិនស្រូវ ឈុន ធំ ដែលស្ថិតនៅស្រុកស្វាយអន្ទរ ខេត្តព្រៃវែង បានប្រាប់ភ្នំពេញប៉ុស្តិ៍កាលពីថ្ងៃអង្គារថា ទោះបីជារដ្ឋាភិបាលប្រកាសឲ្យរោងម៉ាស៊ីនកិនស្រូវបង្កើនការយកចិត្តទុកដាក់ប្រមូលទិញស្រូវពីប្រជាកសិករក៏ដោយ តែលោកសង្កេតឃើញថា ការប្រមូលទិញមិនមានអ្វីប្រែប្រួលទេ។
លោកបន្តថា កត្តាដែលធ្វើឲ្យការប្រមូលទិញស្រូវពីប្រជាកសិករមិនមានការប្រែប្រួលនាពេលនេះគឺដោយសារផលស្រូវត្រូវបានកសិករប្រមូលជិតអស់ហើយ និងម្យ៉ាងទៀតពួកគេក៏នៅមានឱកាសយកស្រូវទៅលក់នៅព្រំដែនរហូតដល់ចុងសប្តាហ៍នេះដែរ។
លោកថ្លែងថា៖ «ផលស្រូវនៅពេលនេះជិតអស់ហើយ (ស្រូវស្រាល) ហេតុនេះសកម្មភាពនៃការប្រមូលទិញរបស់រោងម៉ាស៊ីនកិនស្រូវខ្ញុំក៏មិនមានច្រើនដែរ។ ការប្រមូលទិញមិនសូវមានសកម្មភាពខ្លាំងក៏អាចមានទាក់ទងនឹងតម្លៃខ្លះដែរ»។
បើតាមលោក ឈុន ធំ គិតត្រឹមថ្ងៃត្រង់ថ្ងៃទី ៣១ ខែមីនា តម្លៃស្រូវស្រាល (សើម) នៅខេត្តព្រៃវែងមានតម្លៃពី ៩០០-៩៥០ រៀលក្នុង ១ គីឡូក្រាម ចំណែកស្រូវ (ស្ងួត) មានតម្លៃពី ១ ០៥០ ទៅ ១ ១០០ រៀល។
ម្ចាស់រោងម៉ាស៊ីនមួយកន្លែងក្នុងខេត្តព្រៃវែងដែលសុំមិនបញ្ចេញឈ្មោះបាននិយាយថា បន្ទាប់ពីរដ្ឋាភិបាលប្រកាសផ្អាកការនាំចេញស្រូវមានឈ្មួញវៀតណាមជាច្រើនបានសម្រុកមកប្រមូលទិញស្រូវពីប្រជាកសិករខ្មែរដោយឲ្យតម្លៃខ្ពស់ជាងពេលធម្មតា ហេតុនេះឈ្មួញក្នុងស្រុក និងរោងម៉ាស៊ីន មិនទាន់មានសកម្មភាពអ្វីគួរឲ្យកត់សម្គាល់ទេ។
លោកបន្តថា ការសម្រុកចូលមកប្រមូលទិញនេះបានធ្វើឲ្យតម្លៃស្រូវស្ទុះឡើងជាបន្តបន្ទាប់ ជាក់ស្តែងតម្លៃស្រូវនោះនៅច្រកចក្រីក្នុងស្រុកព្រះស្តេច ខេត្តព្រៃវែង ដែលវៀតណាមប្រមូលទិញ ១ ០៧០ ទៅ ១ ០៨០ រៀលក្នុង ១ គីឡូក្រាម កាលពីថ្ងៃចន្ទបានកើនឡើងដល់ ១ ១០០ ទៅ ១ ១២០ រៀលនាថ្ងៃអង្គារនេះ។
លោកអះអាងថា៖ «តម្លៃខ្ពស់បែបនេះគឺមិនមានឈ្មួញក្នុងស្រុក ឬម្ចាស់រោងម៉ាស៊ីនក្នុងស្រុកណាហ៊ានទិញទេ»។ លោកបន្តថា៖ «ខ្ញុំមិនទាន់ទិញទេ រង់ចាំមើលឲ្យចុះថ្លៃបន្តិចសិន»។
លោកបានប្រាប់ទៀតថា ដោយសារពេលនេះជាចុងដៃទៅហើយនោះ ហេតុនេះគុណភាពស្រូវក៏មិនសូវល្អដែរ។ លោកបាននិយាយថា៖ «តម្លៃស្រូវនឹងធ្លាក់ចុះខ្លះចាប់ពីថ្ងៃទី ៦ ខែមេសា តទៅ»។
លោកប្រាប់ទៀតថា ទន្ទឹមនឹងការសម្រុកចូលមកប្រមូលទិញពីសំណាក់ឈ្មួញវៀតណាមនេះ ខាងធនាគារអភិវឌ្ឍន៍ជនបទ (ARDB) ក៏បានប្រាប់ឲ្យពួកគាត់ជួញប្រមូលទិញស្រូវយកមកស្តុកទុកដែរ ដោយ ARDB បានសន្យាថានឹងទម្លាក់ទុនខ្លះឲ្យខ្ចីយកទៅប្រើប្រាស់។
ធនាគារអភិវឌ្ឍន៍ជនបទ និងកសិកម្ម (ARDB) ដែលជាធនាគារបង្កើតឡើងដោយរដ្ឋាភិបាលកម្ពុជាកាលពីថ្ងៃទី ៣០ ខែមីនា បានចេញសេចក្តីប្រកាសព័ត៌មានមួយដោយសរសេរថា «អនុវត្តតាមអនុសាសន៍ណែនាំដ៏ខ្ពង់ខ្ពស់ និងបទបញ្ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅក្នុងសន្និសីទសារព័ត៌មាននាថ្ងៃទី ៣០ ខែ មីនា ឆ្នាំ ២០២០ ដែលសម្រេចផ្អាកការនាំចេញស្រូវ និងអង្ករសជាបណ្តោះអាសន្នទៅបរទេសចាប់ពីថ្ងៃទី ៥ ខែ មេសា ឆ្នាំ ២០២០ ម៉ោង ២៣:៥៩ នាទី តទៅក្នុងគោលបំណងដើម្បីធានាបាននូវសន្តិសុខស្បៀងក្នុងកាលៈទេសៈនៃការរីករាលដាលនៃជំងឺកូវីដ១៩ ធនាគារអភិវឌ្ឍន៍ជនបទ និងកសិកម្មសូមជំរុញ និងលើកទឹកចិត្តឱ្យក្រុមហ៊ុន និង រោងម៉ាស៊ីនទាំងអស់បន្តទិញស្រូវ OM 5451 និង IR 85 (504) ពីកសិករក្នុងតម្លៃទីផ្សារ។
អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) លោក កៅ ថាច បាននិយាយថា ក្នុងនាមជាធនាគាររដ្ឋ (ARDB) តែងតែជួយគាំទ្រដល់វិស័យកសិកម្មតាមរយៈការទម្លាក់ប្រាក់ជួយដល់រោងម៉ាស៊ីនកិនស្រូវដើម្បីឲ្យពួកគាត់មានលទ្ធភាពកាន់តែច្រើនក្នុងការប្រមូលទិញស្រូវពីប្រជាកសិករមកស្តុកទុក។ លោកបន្តថា នៅពេលដែលរដ្ឋាភិបាលកំណត់វិធានផ្អាកការនាំចេញ ARDB ត្រូវតែខិតខំដើម្បីជួយឲ្យរដ្ឋាភិបាលអាចសម្រេចបានតាមផែនការ។
លោកថ្លែងថា៖ «បច្ចុប្បន្នយើងកំពុងតែត្រៀមដើមទុនផ្ទាល់របស់ធនាគារ ដើម្បីបញ្ចេញទៅជួយដល់រោងម៉ាស៊ីនក្នុងការប្រមូលទិញស្រូវពីកសិករ»។
បើតាមលោក កៅ ថាច បច្ចុប្បន្នក្នុងចំណោមមូលធនរបស់ធនាគារអភិវឌ្ឍន៍ជនបទគឺមានប្រមាណ ៧០-៨០ ភាគរយ ដែលត្រូវបានផ្តល់ទៅឲ្យវិស័យស្រូវអង្ករ។
កាលពីឆ្នាំ ២០១៩ ការនាំចេញស្រូវទៅកាន់ប្រទេសវៀតណាម មានបរិមាណ ២,១៥ លានតោន។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ៕ LA
