ភ្នំពេញ: តម្លៃជ័រកៅស៊ូកំពុងហក់ឡើងខ្ពស់គួរឱ្យកត់សម្គាល់ចាប់ពីដើមខែតុលានេះ ដោយសារតែតម្រូវការវត្ថុធាតុដើមក្នុងឧស្សាហកម្មដែលងើបឡើងវិញក្រោយភាពយឺតយ៉ាវបង្កឡើងដោយក្តីបារម្ភនៃការឆ្លងរាតត្បាតជំងឺកូវីដ ១៩ ស្របជាមួយប្រទេសផលិតជ័រកៅស៊ូជាច្រើនកំពុងរងគ្រោះដោយសារទឹកជំនន់។ យោងតាមអ្នកជំនាញក្នុងវិស័យកៅស៊ូ។
លោក ម៉ុង ឫទ្ធី ប្រធានក្រុមប្រឹក្សាភិបាលក្រុមហ៊ុន ម៉ុង ឫទ្ធីគ្រុប ដែលវិនិយោគលើដាំដុះកៅស៊ូ ដូងប្រេង និងស្វាយបានឱ្យដឹងថា គិតត្រឹមថ្ងៃចន្ទ ទី ១៩ ខែតុលា តម្លៃកៅស៊ូសន្លឹក RSS3 បានហក់ឡើងរហូតដល់ ២ ២០០ ដុល្លារក្នុង ១ តោន កៅស៊ូ CSR L មានតម្លៃ ១ ៥៣០ ដុល្លារ ក្នុង ១ តោន កៅស៊ូ CSR5 តម្លៃ ១ ៥០០ ដុល្លារ ក្នុង ១ តោន និងកៅស៊ូ CSR10 តម្លៃ ១ ៤០០ ដុល្លារ ក្នុង ១ តោន។
យោងតាមអគ្គនាយកដ្ឋានកៅស៊ូកម្ពុជា តម្លៃកៅស៊ូជាមធ្យមក្នុងខែកញ្ញាគឺ ១ ៣១៤ ដុល្លារ ក្នុង ១ តោន។
លោកថ្លែងថា៖ «នេះជាដំណឹងល្អសម្រាប់ប្រជាកសិករខ្នាតតូច មធ្យម និងខ្នាតធំដែលប្រកបរបររកស៊ីលើវិស័យកសិកម្ម កសិឧស្សាហកម្មកៅស៊ូ»។
ទោះជាបែបនេះក្តីលោក ម៉ុង ឫទ្ធី កត់សម្គាល់ថា វិស័យនេះប្រឈមនឹងស្ថានភាពលំបាកដោយសារខ្វះកម្លាំងពលកម្មសម្រាប់ប្រមូលផលកៅស៊ូ។
លោកបានពន្យល់ថា តម្លៃកៅស៊ូហក់ឡើងនៅពេលនេះដោយសារតម្រូវការទីផ្សារកៅស៊ូច្រើននៅលើទីផ្សារអន្តរជាតិ ខណៈដែលការផ្គត់ផ្គង់ថយចុះក្នុងអំឡុងពេលប្រទេសផលិតកៅស៊ូនៅក្នុងតំបន់ជួបគ្រោះទឹកជំនន់។
លោកនិយាយថា៖ «ឥទ្ធិពលគ្រោះធម្មជាតិទឹកជំនន់ធ្វើឱ្យប៉ះពាល់ដល់ការប្រមូលផលជ័រកៅស៊ូ ដែលនាំឱ្យការផ្គត់ផ្គង់កៅស៊ូលើទីផ្សារមិនគ្រប់គ្រាន់បានជំរុញឱ្យតម្លៃកៅស៊ូហក់ឡើងនៅពេលនេះ»។
លោក គូរ ផល្លី អនុប្រធាននាយកដ្ឋានអភិវឌ្ឍន៍កៅស៊ូនៃអគ្គនាយកដ្ឋានកៅស៊ូ ប្រាប់ភ្នំពេញប៉ុស្តិ៍កាលពីថ្ងៃអង្គារថា តម្លៃកៅស៊ូគ្រួសារក៏ឡើងថ្លៃគួរឱ្យកត់សម្គាល់ក្នុងរយៈពេលចុងក្រោយនេះ ដោយតម្លៃកៅស៊ូកកកើនពី ២ ១០០ រៀលក្នុង ១ គីឡូក្រាមដល់ចន្លោះពី ២ ៥០០ រៀលទៅ ២ ៧០០ រៀលក្នុង ១ គីឡូក្រាម។
លោកថ្លែងថា៖ «តម្លៃកៅស៊ូហក់ឡើងនេះបានចាប់ផ្តើមតាំងពីដើមខែតុលានេះ ហើយឥទ្ធិពលនៃជំងឺកូវីដ ១៩ ក៏បានជំរុញឱ្យមានតម្រូវការផលិតជ័រកៅស៊ូសម្រាប់ផលិតស្រោមដៃ និងផលិតសម្បកកង់រថយន្តមានការកើនឡើង»។
បើតាមលោក ផល្លី តម្លៃកៅស៊ូក្នុងស្រុកនឹងងើបឡើងវិញនៅពេលអនាគត ដោយសារកត្តាកែប្រែផ្ទៃដីដាំដុះកៅស៊ូរបស់កម្ពុជាទៅជាដំណាំឧស្សាហកម្មផ្សេងៗ ស្របពេលប្រទេសអ្នកផលិតកៅស៊ូធំៗចន្លោះពី ៥០ ទៅ ៨០ ម៉ឺនហិកតាកំពុងប្រឈមនឹងជំងឺអុចជ្រុះស្លឹក (Pestalotionsis) លើដំណាំកៅស៊ូដែលនឹងធ្វើឱ្យការផ្គត់ផ្គង់ថយចុះ។
តម្លៃកៅស៊ូនៅកម្ពុជាបានធ្លាក់ចុះជាបន្តបន្ទាប់ចាប់តាំងពីជាង ៥ ០០០ ដុល្លារ ក្នុង ១ តោន ក្នុងឆ្នាំ ២០១១ និង ២០១២ ដល់ជាង ១ ០០០ ដុល្លារនាពេលបច្ចុប្បន្ននេះ។ នេះបើផ្អែកតាមការចេញផ្សាយរបស់ ភ្នំពេញ ប៉ុស្តិ៍។
លោក ហេង ស្រេង អ្នកចាត់ការទូទៅក្រុមហ៊ុនចម្ការកៅស៊ូបឹងកេតនៅខេត្តកំពង់ចាមបានប្រាប់ ភ្នំពេញ ប៉ុស្តិ៍ កាលពីថ្ងៃទី ៩ តុលា ថា ក្រុមហ៊ុនលោកបាននាំចេញជ័រកៅស៊ូថយចុះប្រហែល ៣០ ភាគរយ ដោយសារការប្រមូលទិន្នផលធ្លាក់ចុះ។
លោកក៏បានកត់សម្គាល់ថា ក្រុមហ៊ុនលោកកែប្រែដីចម្ការកៅស៊ូងាកទៅដាំចេកអំបូងលឿងវិញដែលមានតម្រូវការទីផ្សារខ្ពស់ ជាពិសេសទីផ្សារប្រទេសចិន។ រហូតមកដល់ពេលនេះក្រុមហ៊ុនបានកែប្រែដីជាចម្ការចេកកើនរហូតដល់ជាង ២ ០០០ ហិកតា។
ទិន្នន័យពីក្រសួងកសិកម្ម រុក្ខាប្រមាញ់ និងនេសាទបានបង្ហាញថា ការនាំចេញកៅស៊ូពីប្រទេសកម្ពុជាសម្រេចបានចំនួន ១៧៩ ៦២១ តោន ក្នុងរយៈពេល ៩ ខែដើមឆ្នាំ ២០២០ កើនឡើង ៣,៧៨ ភាគរយធៀបរយៈពេលដូចគ្នាកាលពីឆ្នាំមុន។
ទិន្នន័យក៏បង្ហាញថា កម្ពុជាមានផ្ទៃដីដាំដុះកៅស៊ូសរុប ៤០៣ ១៩៥ ហិកតា ដោយផ្ទៃដី ២៩០ ៦០៩ ហិកតា ស្មើនឹង ៧២ ភាគរយ អាចចៀរជ័របាន៕ LA