ភ្នំពេញៈ ទោះបីតម្លៃជ្រូកក្នុងស្រុកបានកើនឡើង ២ ដងចាប់ពីត្រីមាសទី ២ ក៏កសិករ និងអ្នកចិញ្ចឹមជ្រូកទ្រង់ទ្រាយតូច បង្ហាញពីការមិនទុកចិត្ត ខណៈទីផ្សារនេះមិនត្រូវបានយកចិត្តទុកដាក់ពីរដ្ឋាភិបាល។ នេះបើយោងតាមអ្នករកស៊ីក្នុងឧស្សាហកម្មជ្រូក។
អ្នករកស៊ីនៅក្នុងឧស្សាហកម្មនេះបានថ្លែងថា ការកើនឡើងតម្លៃដោយសារការធ្លាក់ចុះការនាំចូលពីវៀតណាមក្នុងរយៈពេលចុងក្រោយនេះ។
តម្លៃជ្រូក កើនឡើងពី ១,១ ដុល្លារក្នុងមួយគីឡូក្រាមដល់ ២,២ ដុល្លារក្នុងមួយគីឡូក្រាម បច្ចុប្បន្នតម្លៃត្រូវបានចាត់ទុកថាជាប្រាក់ចំណេញ សម្រាប់អ្នកផ្គត់ផ្គង់ក្នុងស្រុក ប៉ុន្តែការកើនឡើងនេះមិនត្រូវបានស្វាគមន៍ដោយកសិករក្នុងស្រុក និង វិស័យឯកជននោះទេ ដោយសារពួកគេបានរងនូវការខាតបង់អស់រយៈពេលជាច្រើនឆ្នាំមកដោយមិនមានអន្តរាគមន៍ណាមួយពីរដ្ឋាភិបាល ពេលទីផ្សារ និងការផ្គត់ផ្គង់ត្រូវពឹងលើបណ្ដាប្រទេសជិតខាង។
យោងតាមលោក លី ឡាវីល អ្នកគ្រប់គ្រងទូទៅនៅក្រុមហ៊ុន M’s Pig ACMC (Cambodia) Co.,Ltd ជាកសិដ្ឋានចិញ្ចឹមសត្វជ្រូករបស់ក្រុមហ៊ុន ម៉ុង ឫទ្ធី គ្រុប តម្លៃជ្រូកបានធ្លាក់ចុះតាំងពីពាក់កណ្ដាលឆ្នាំ ២០១៥ រហូតដល់ត្រីមាសទី ១ ឆ្នាំ ២០១៨។
លោកថ្លែងថា៖ «ទោះបីជាតម្លៃជ្រូកកើនឡើង ២ ដងក៏ដោយ ក៏វានៅតែមិនត្រូវបានស្វាគមន៍ដោយកសិករក្នុងស្រុកនោះទេ ដោយសារពួកគេរងការខាតបង់ជាច្រើនឆ្នាំមកហើយ រដ្ឋាភិបាលមិនអាចជួយគ្រប់គ្រងតម្លៃសម្រាប់កសិករនោះទេ»។
លោកបន្តថា ៣០ ភាគរយនៃកសិករក្នុងស្រុកបានបោះបង់ចោលការចិញ្ចឹមជ្រូកក្នុងអំឡុងជួបប្រទះនៃការតម្លៃធ្លាក់ចុះនេះ។
លោកបានថ្លែងថា៖ «កសិករក្នុងស្រុកកំពុងរង់ចាំមើលទីផ្សារជ្រូក តើវាមានស្ថិរភាពដូចម្ដេច? ពួកគេខ្លាចមិនហ៊ានចាប់ផ្ដើមកសិដ្ឋានចិញ្ចឹមជ្រូកជាថ្មីទេ»។ លោកបន្តថា៖ «ទីផ្សារបសុសត្វរបស់យើងត្រូវពឹងលើទីផ្សារប្រទេសជិតខាង វាពិបាកសម្រាប់ការបង្កើនការជឿជាក់សម្រាប់កសិករចិញ្ចឹមជ្រូកណាស់»។
លោកបញ្ជាក់ថាតម្លៃជ្រូកក្នុងស្រុកធ្លាក់ចុះជាង ៣ ឆ្នាំចាប់តាំងពីឆ្នាំ ២០១៥ នៅពេលវៀតណាមមិនអាចនាំចេញទៅប្រទេសចិន ហើយផ្ទុយទៅវិញពួកគេនាំចេញកាន់តែច្រើនមកកម្ពុជាក្នុងតម្លៃទាបដែលធ្វើឲ្យប៉ះពាល់ដល់តម្លៃក្នុងស្រុក។
លោកថ្លែងថា៖ «វិបត្តិជ្រូកនៅក្នុងប្រទេសកម្ពុជា ដោយសារការហូរចូលជ្រូកមកពីប្រទេសវៀតណាមក្នុងតម្លៃទាប ខណៈវាត្រូវបានហាមឃាត់ទៅទីផ្សារប្រទេសចិន»។ លោកបន្ថែមថា៖ «ចាប់តាំងពីការផ្គត់ផ្គង់ជ្រូកនៅក្នុងប្រទេសវៀតណាមត្រូវបានគ្រប់គ្រង នៅពេលនេះទីផ្សារជ្រូកមានស្ថិរភាព ហើយតម្លៃត្រឡប់ទៅរកភាពធម្មតា និងប្រាក់ចំណេញសម្រាប់កសិករ»។
យោងតាមលោក ឡាវីល ជ្រូករស់ប្រហែលពី ៨ ០០០ ក្បាល ទៅ ១០ ០០០ ក្បាលត្រូវបានលក់ជារៀងរាល់ថ្ងៃទូទាំងប្រទេសក្នុងចំណោមនោះតិចជាងពាក់កណ្ដាលត្រូវបានចិញ្ចឹមនៅក្នុងស្រុកដែលមិនអាចផ្គត់ផ្គង់តម្រូវការទីផ្សារបាន។
លោក ជេត ភិរម្យ អនុប្រធានសមាគមចិញ្ចឹមសត្វក្នុងស្រុកកម្ពុជាបានថ្លែងថា ទីផ្សារជ្រូកត្រូវបានកើនឡើង មិនមែនដោយសារការអន្តរាគមន៍ណាមួយពីរដ្ឋាភិបាលនោះទេ វាដោយសារទីផ្សារប្រទេសជិតខាងប៉ុណ្ណោះ។
លោកថ្លែងថា៖ «តម្លៃជ្រូកត្រូវបានកើនឡើង មិនមែនកើតចេញពីការជួយពីរដ្ឋាភិបាល ឬ អន្តរាគមន៍ណាមួយពីរដ្ឋាភិបាលនោះទេ វាដោយសារតែការកើនឡើងតម្លៃនៅប្រទេសជិតខាង ទោះបីកសិករចិញ្ចឹមជ្រូកយើងមិនទទួលបានប្រាក់ចំណេញពីការកើនឡើងតម្លៃនោះក៏ដោយ តែពួកគេបានបោះបង់ចោលរួចហើយតាំងពីតម្លៃបានធ្លាក់ចុះម្ល៉េះ»។
លោក សឿន វីរៈ កសិករចិញ្ចឹមជ្រូកនៅខេត្តតាកែវដែលបានបោះបង់កសិដ្ឋានចិញ្ចឹមជ្រូករបស់លោកកាលពីឆ្នាំមុនបានថ្លែងថា វាពិបាកក្នុងការចាប់ផ្ដើមកសិដ្ឋានចិញ្ចឹមជ្រូកជាថ្មី ដោយសារតែទីផ្សារនេះត្រូវបានប្រែប្រួល។
លោកថ្លែងថា៖ «វាមិនងាយស្រួលសម្រាប់ពួកយើងជាកសិករនោះទេ ដោយសារតែពួកយើងធ្លាប់ទទួលរងផលប៉ះពាល់ពីទីផ្សារនេះ»។ លោកបន្តថា៖ «វាពិបាកក្នុងការស្ដារជាថ្មីនូវការខាតបង់នេះ ទោះបីជាតម្លៃបានកើនឡើងក៏ដោយ ដូចជាមិនមានទំនុកចិត្តលើទីផ្សារនេះទេ រយៈពេលខាតបង់យូរជាងរយៈពេលទទួលបានប្រាក់ចំណេញ»។
លោក សៀង សុខលីន ប្រធានផ្នែកផលិតផលសត្វនៅក្នុងក្រសួងកសិកម្ម បានបដិសេធធ្វើអត្ថាធិប្បាយអំពីទីផ្សារនេះ៕ LA