ភ្នំពេញៈ កម្ពុជាបាននាំចេញអង្ករក្នុងបរិមាណជាង ១៥ ម៉ឺនតោនទៅទីផ្សារអន្តរជាតិនៅក្នុងត្រីមាសទី១ ឆ្នាំ ២០២១ ធ្លាក់ចុះជាង ៣៣ ភាគរយធៀបនឹងត្រីមាសទី១ ឆ្នាំមុន ដោយសារតែបញ្ហាកង្វះកុងតឺន័រដែលនាំឱ្យតម្លៃដឹកជញ្ជូនទំនិញហក់ឡើងយ៉ាងគំហុកនៅក្នុងអំឡុងពេលនេះ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានឱ្យដឹងថា កម្ពុជាបាននាំចេញអង្ករ ១៥៣ ៦៨៨ តោន នៅក្នុងរយៈពេល ៣ ខែឆ្នាំ ២០២១ ថយ ៧៧ ២៦០ តោន ស្មើនឹង ៣៣,៤៥ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២០ ដែលមានចំនួន ២៣០ ៩៤៨ តោន។
លោកបន្តថា ក្នុងអំឡុងពេលនេះការនាំចេញអង្ករក្រអូបគ្រប់ប្រភេទមានបរិមាណច្រើនជាងគេ គឺ ១០៧ ៣៣៩ តោនស្មើនឹង ៦៩,៨៤ ភាគរយក្នុងនោះ អង្ករផ្ការំដួល និងអង្ករផ្កាម្លិះមានចំនួន ៥៧ ៧១៤ តោនស្មើនឹង ៣៧,៥៥ ភាគរយ។
ដោយឡែកអង្ករសគ្រប់ប្រភេទមាន ៤៣ ៧៧៧ តោនស្មើនឹង ២៨,៤៩ ភាគរយ និងអង្ករចំហុយចំនួន ២ ៥៧២ តោនស្មើនឹង ១,៦៧ ភាគរយ។
លោករដ្ឋមន្ត្រីបានបន្ថែមថា ក្នុងរយៈពេល ៣ ខែឆ្នាំនេះមានក្រុមហ៊ុននាំចេញចំនួន ៥១ ដោយបាននាំទៅកាន់ទិសដៅ ៤១ ប្រទេសក្នុងនោះទិសដៅសហភាពអឺរ៉ុប (១៩ ប្រទេស) មានបរិមាណ ៣៥ ៤៤២ តោនស្មើនឹង ២៣,០៦ ភាគរយ។
ទន្ទឹមនឹងនេះការនាំចេញទៅប្រទេសចិន មានបរិមាណ ៨៥ ៣៧០ តោន ស្មើ ៥៥,៥៥ ភាគរយ, ប្រទេសអាស៊ានចំនួន ៣ ប្រទេសបរិមាណ ១១ ៦៥៨ តោន ស្មើ ៧,៥៩ ភាគរយ និងទិសដៅដទៃទៀត ១៨ ប្រទេសក្នុងបរិមាណសរុប ២១ ២១៨ តោន ស្មើនឹង ១៣,៨ ភាគរយ។
រដ្ឋាភិបាលចិនកន្លងមកបានផ្តល់កូតាឱ្យកម្ពុជានាំអង្ករចូលទៅប្រទេសខ្លួន ៤០០ ០០០ តោន ក្នុង ១ ឆ្នាំ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) ប្រាប់ភ្នំពេញប៉ុស្តិ៍ថា ការកើនឡើងតម្លៃដឹកជញ្ជូនទំនិញទៅកាន់ទីផ្សារអន្តរជាតិ ពិសេសអឺរ៉ុបកំពុងក្លាយជាឧបសគ្គធំសម្រាប់ផែនការនាំចេញអង្ករកម្ពុជាក្នុងឆ្នាំ ២០២១។
លោកនិយាយថា៖ «បញ្ហាប្រឈមចម្បងរបស់យើងឥឡូវនេះគឺរឿងតម្លៃដឹកជញ្ជូនកំពុងបន្តឡើងលើសមុន ពិសេសតម្លៃដឹកជញ្ជូនទៅអឺរ៉ុប»។
លោក យ៉ន សុវណ្ណ ប្រធានក្រុមហ៊ុន បាយ័ន សៀរាលបានឱ្យដឹងថា ការឡើងថ្លៃដឹកជញ្ជូនបានធ្វើឱ្យប៉ះពាល់ដល់ភាពប្រកួតប្រជែង ព្រោះតម្លៃផលិតឡើងខ្ពស់។
លោក សុវណ្ណ បានប្រាប់ថា៖ «កង្វះទូកុងតឺន័របានក្លាយជាវិបត្តិសកលដែលប្រទេសនាំចេញភាគច្រើនកំពុងជួបប្រទះដូចយើងដែរ។ ខ្ញុំសង្ឃឹមថា បញ្ហានេះនឹងល្អប្រសើរឡើងវិញក្នុងពេលឆាប់ៗនេះ»។
ប្រធានគ្រប់គ្រងទូទៅក្រុមហ៊ុននាំចេញអង្ករ Signature of Asia លោក ចាន់ ពេជ្រ កាលពីចុងខែមុនបាននិយាយថា រនាំងដែលធ្វើឱ្យរាំងស្ទះដល់ការនាំចេញអង្ករពីកម្ពុជាគឺតម្លៃដឹកជញ្ជូនទៅអឺរ៉ុបដែលកំពុងបន្តហក់ឡើងខ្ពស់ខ្លាំង គឺចន្លោះពី ៤ ០០០ ទៅ ៥ ០០០ ដុល្លារក្នុង ១ កុងតឺន័រ (ប្រភេទ ២០ ហ្វីត) កើនពីចន្លោះ ៨០០ ទៅ ១០០០ ដុល្លារកាលពីឆ្នាំមុន។
លោកបន្ថែមថា៖ «ជាយោបល់ផ្ទាល់ខ្លួន ខ្ញុំគិតថាការនាំចេញអង្កររបស់កម្ពុជាក្នុងឆ្នាំនេះនឹងមិនខុសពីឆ្នាំមុនប៉ុន្មានទេ»។
ប្រទេសចិននៅតែជាទីផ្សារធំជាងគេសម្រាប់អង្ករកម្ពុជាដោយមានចំនួន ៨៥ ៣៧០ តោន បារាំង នៅលំដាប់ទី ២ ១៦ ០៦៦ តោន ម៉ាឡេស៊ី លេខ ៣ មាន ១០ ៧៩៦ តោន ហ្គាបុង លេខ ៤ មាន ៩ ០៥២ តោន ហូឡង់នៅលេខ ៥ មាន ៤ ៤៦៧ តោន។
ទិន្នន័យពីសហព័ន្ធស្រូវអង្ករកម្ពុជាបានបង្ហាញថា ក្នុងឆ្នាំ ២០២០ កម្ពុជានាំចេញអង្ករ ៦៩០ ៨២៩ តោន កើនឡើង ១១,៤០ ភាគរយធៀបនឹងឆ្នាំ ២០១៩។ ការនាំចេញអង្ករទៅចិនពីឆ្នាំ ២០២០ មាន ២៨៩ ៤៣៩ តោន ស្មើនឹង ៤១,៩០ ភាគរយនៃការនាំចេញអង្ករសរុបរបស់កម្ពុជា៕ LA