ភ្នំពេញៈ អ្នកនៅក្នុងវិស័យទុរេន បានឲ្យដឹងថា ទុរេនខ្មែរនឹងមានទីផ្សារក្នុងស្រុកល្អប្រសើរនៅឆ្នាំនេះ ដោយសារការរឹតត្បិតនៅតាមព្រំដែនដែលនាំឲ្យពិបាកដល់ការនាំចូលទុរេនពីប្រទេសជិតខាងកម្ពុជា។
លោក ឃឹម ប៊ុនឡេង ស្ថាបនិកហាងទុរេន «ស្តេចទុរេន» ប្រាប់ភ្នំពេញប៉ុស្តិ៍ថា ហាងរបស់លោកមានផែនការប្រមូលទិញទុរេនពីកសិករប្រមាណ ២០០ តោន ដើម្បីចែកចាយនៅលើទីផ្សារនៅទីក្រុងភ្នំពេញ។
ហាងទុរេន «ស្តេចទុរេន» មានចំនួន ២ ទីតាំងស្ថិតនៅសង្កាត់ចោមចៅ ១ ខណ្ឌពោធិ៍សែនជ័យ និសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ហើយលោកក៏ជាម្ចាស់ចម្ការទុរេននៅខេត្តកំពតផងដែរ។
លោកឲ្យដឹងថា៖ «តាមគោលដៅ ខ្ញុំចង់លក់ទុរេនឲ្យបាន ២០០ តោននៅឆ្នាំនេះ ព្រោះខ្ញុំចង់ជួយរកទីផ្សារឲ្យទុរេនខ្មែរ ហើយឆ្លៀតឱកាសនេះអប់រំគាត់ឲ្យស្គាល់ពីគុណតម្លៃទុរេនខ្មែរ»។
លោកជឿថា ការរឹតត្បិតនៅច្រកព្រំដែននៃវិធានការការពារ និងទប់ស្កាត់ជំងឺកូវីដ១៩ ព្រមទាំងការបិទផ្សារនាគមាស និងផ្សារដើមគដែលជាផ្សារបោះដុំធំជាងគេនៅទីក្រុងភ្នំពេញនឹងធ្វើទីផ្សារទុរេនក្នុងស្រុកកាន់ល្អប្រសើរនៅឆ្នាំនេះ។
លោកបញ្ជាក់ថា៖ «ទីផ្សារទុរេនខ្មែរមានការគាំទ្រយ៉ាងខ្លាំង ប៉ុន្តែភាគច្រើនអ្នកលក់មួយចំនួនបាននាំចូលទុរេនពីវៀតណាម និងថៃ ដែលភាគច្រើនទុរេនមិនសូវល្អ។ ចំណែកការផលិតទុរេននៅកម្ពុជាបានផ្តោតលើសុវត្ថិភាព និងគុណភាព ព្រោះយើងមានដីទំនេរច្រើន បើធៀបនឹងប្រទេសជិតខាង។
លោកឲ្យដឹងទៀតថា ប្រសិនបើ គ្មានការយកចិត្តទុកដាក់លើការលើកកម្ពស់ទីផ្សារទុរេនវានឹងធ្វើកសិករបាក់ទឹកចិត្តដែលនាំឲ្យពួកគេនឹងបោះបង់ចោលអាជីពពីវិស័យកសិកម្ម។
លោកថា៖ «ខ្ញុំសង្កេតឃើញថា ប្រទេសយើងមិនទាន់អាចផលិតផលិតផលកសិកម្មក្នុងតម្លៃដើមទាបនៅឡើយទេ ព្រោះជី ថ្នាំកសិកម្ម យើងនាំចូលទាំងអស់ ហើយបច្ចេកទេសក៏យើងនៅមានកម្រិតផងដែរ»។
លោកបន្ថែមថា តម្លៃទុរេនលក់រាយឆ្នាំនេះចន្លោះពី ២៥ ០០០ រៀល ទៅ ២៨ ០០០ រៀល ក្នុង ១ គីឡូក្រាមដែលតម្លៃនេះមិនមានការប្រែប្រួលនោះទេ។
លោកនិយាយថា៖ «ខ្ញុំមើលឃើញទីផ្សារទុរេនល្អដែលអាចនាំចេញនៅអនាគត ហើយវាមានការគាំទ្រពីអ្នកក្នុងស្រុកយ៉ាងខ្លាំង ប៉ុន្តែប្រសិនបើ យើងប្រលែងឲ្យផលិតផលពីប្រទេសជិតខាងចូលវាយលុកទីផ្សាររបស់ប្រជាកសិករច្រើនហួសហេតុពេកវានឹងនាំឲ្យកសិករខាតបង់ប្រាក់ចំណេញយ៉ាងច្រើន»។
សព្វថ្ងៃ ដំណាំទុរេនត្រូវបានដាំដុះច្រើនជាងគេនៅខេត្តកំពត កំពង់ចាម បាត់ដំបង ខេត្តកោះកុង និងខេត្តពោធិ៍សាត់។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង ឲ្យដឹងថា ទុរេនផលិតនៅស្រុកសំឡូត ខេត្តបាត់ដំបងក៏ជាទុរេនជាប់លំដាប់ល្អជាងគេមួយដែរក្នុងចំណោមទុរេនល្បីៗពីកំពត និងកំពង់ចាម ឬក៏តំបន់ផ្សេងទៀត។ ទីផ្សារទុរេននៅស្រុកសំឡូតត្រូវបានផ្គត់ផ្គង់តែសម្រាប់ទីផ្សារក្នុងស្រុកទាំងស្រុកគឺមិនទាន់មានការនាំចេញនៅឡើយទេ។
លោកឲ្យដឹងទៀតថា៖ «ទុរេនស្រុកសំឡូតលក់តែក្នុងស្រុក ហើយជាទូទៅភ្ញៀវទៅទិញដល់ចម្ការតែម្តង និងម៉ៅឲ្យអ្នកនៅទីក្រុងភ្នំពេញ»។
លោកបន្ថែមថា តម្លៃបោះដុំទុរេននៅសំឡូតនៅឆ្នាំនេះហាក់ល្អប្រសើរជាងឆ្នាំមុនបន្តិចគឺចន្លោះពី ១៨ ០០០ រៀល ទៅ ២២ ០០០ ក្នុង ១ គីឡូក្រាម។
លោកនិយាយថា៖ «ចំនួនផលិតបានទុរេនសំឡូតនៅឆ្នាំនេះ បានតិចជាងឆ្នាំមុន ព្រោះបញ្ហាបម្រែបម្រួលអាកាសធាតុដែលមិនអំណោយផលដល់ដំណាំទុរេន»។
បើតាមក្រសួងកសិកម្ម រុក្ខាប្រមាញ់ និងនេសាទ ទុរេនពូជម៉នថងអាចប្រមូលបានក្នុងរយៈពេលចន្លោះពី ១៤០ ទៅ ១៥០ ថ្ងៃ និងទុរេនកានយ៉ាវមានរយៈពេល ១២០ ទៅ ១៣៥ ថ្ងៃ ដោយគិតចាប់ពីក្រោយពេលផ្ការីករហូតដល់ថ្ងៃដែលទុរេនចាស់៕