ភ្នំពេញ៖ វិបត្តិនៃការឆ្លងរាលដាលជំងឺកូវីដ ១៩ បានធ្វើឱ្យទឹកប្រាក់នៃការនាំចូលរថយន្តពីបរទេសមកកម្ពុជាក្នុងឆ្នាំ ២០២០ មានតម្លៃប្រមាណជិត ១,១ ពាន់លានដុល្លារ ធ្លាក់ចុះជាង ៣៦ ភាគរយ បើធៀបនឹងឆ្នាំ ២០១៩។ នេះបើយោងតាមរបាយការណ៍ក្រសួងពាណិជ្ជកម្ម។
របាយការណ៍បូកសរុបលទ្ធផលការងារពាណិជ្ជកម្មឆ្នាំ ២០២០ និងទិសដៅការងារឆ្នាំ ២០២១ របស់ក្រសួងពាណិជ្ជកម្មឱ្យដឹងថា កម្ពុជាបានចំណាយប្រាក់ ១ ០៩៩,៥៦ លានដុល្លារ ទៅលើការនាំចូលរថយន្តពីទីផ្សារអន្តរជាតិក្នុងឆ្នាំ ២០២០ ដែលចំនួននេះធ្លាក់ចុះពី ១ ៧៣៤,៣១ លានដុល្លារក្នុងឆ្នាំ ២០១៩ ឬស្មើនឹង ៣៦,៦ ភាគរយ។
របាយការណ៍ឱ្យដឹងទៀតថា រថយន្តគឺជាប្រភេទទំនិញទី៧ ដែលកម្ពុជាបានចំណាយប្រាក់ច្រើនលើការនាំចូល ដែលនាំមុខដោយផលិតផលវាយនភ័ណ្ឌ, សម្ភារសំណង់, ដែក, ស៊ីម៉ងត៍, ទឹក (ទឹករ៉ែ និងទឹកមានឧស្ម័ន), និងស្រាបៀរ និងស្រាចម្រុះ។ ក្នុងឆ្នាំ ២០២០ កម្ពុជាបានចំណាយប្រាក់លើការនាំចូលទំនិញពីទីផ្សារអន្តរជាតិ សរុប ១៨ ៥៩០,៤៨ លានដុល្លារ ធ្លាក់ចុះ ៧,៨៤ ភាគរយពីចំនួន ២០ ១៧១,៨១ លានដុល្លារ កាលពីឆ្នាំ ២០១៩។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់បានប្រាប់ ភ្នំពេញ ប៉ុស្តិ៍ថា ក្នុងអំឡុងពេលនៃការរីករាលដាលជំងឺកូវីដ ១៩ ការចំណាយប្រាក់ដែលមិនចាំបាច់ត្រូវបានកាត់បន្ថយ ខណៈការនាំទំនិញឆ្លងកាត់ព្រំដែនក៏មានការរឹតត្បិតជាងពេលមុនផងដែរ។ លោកបន្ថែមថា ក្រៅពីផលិតផលចាំបាច់សម្រាប់ការរស់នៅប្រចាំថ្ងៃ ការនាំចូលផលិតផលផ្សេងៗទៀត គឺភាគច្រើនបានធ្លាក់ចុះ។ សកម្មភាពបែបនេះ គឺកើតមានដូចៗគ្នានៅគ្រប់ប្រទេសលើពិភពលោក។
ទោះយ៉ាងណា សម្ទុះនៃការនាំចូលនេះនឹងមានកំណើនឡើងវិញនៅពេលជំងឺកូវីដ ១៩ អាចគ្រប់គ្រងបាន ពិសេសការចាក់វ៉ាក់សាំងដល់ប្រជាជនភាគច្រើន។ នេះបើតាមលោក លឹម ហេង។
ការធ្លាក់ចុះនៃចំនួនទឹកប្រាក់នាំចូលរថយន្ត បានធ្វើឱ្យការប្រមូលចំណូលពន្ធគយរបស់កម្ពុជាក្នុងឆ្នាំ ២០២០ ធ្លាក់ចុះប្រមាណ ៣០,២៦ លានដុល្លារ។ នេះបើតាមលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងឆ្នាំ ២០២០ អង្គភាពនេះប្រមូលចំណូលបាន ២ ៤១៩,៦ លានដុល្លារ ធ្លាក់ចុះ ២៤,៨ ភាគរយធៀបនឹងឆ្នាំ ២០១៩ ក្នុងនោះមុខទំនិញរថយន្តដែលជាប្រភពចំណូលគយដ៏សំខាន់។
ដើម្បីជំរុញ និងលើកកម្ពស់ការប្រមូលចំណូលពន្ធគយ រដ្ឋាភិបាលកម្ពុជា បានសម្រេចកាត់បន្ថយអត្រាពន្ធគយចន្លោះពី ១០ ដល់ ២០ ភាគរយ ដោយបានចាប់ផ្តើមអនុវត្តចាប់តាំងពីដើមខែមីនា ឆ្នាំ ២០២១ តទៅ៕