.jpg)
វិភាគដោយលោក ញឹម កុសល /ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល ។
តម្លៃប្រេងឆៅត្រូវបានគេរំពឹងថានឹងស្ទុះងើបឡើងវិញនៅសប្តាហ៍នេះ ដោយសារការស្នើកញ្ចប់ថវិការាប់ពាន់ពាន់លានដុល្លាររបស់ប្រធានាធិបតីអាមេរិកជាប់ឆ្នោត Joe Biden ដើម្បីជំរុញសេដ្ឋកិច្ចជោគជ័យនៃការចាក់វ៉ាក់សាំងកូវីដ១៩ និងការសន្យារបស់អារ៉ាប៊ីសាអ៊ូឌីតក្នុងការកាត់បន្ថយផលិតកម្មប្រេង។
យោងតាមទីភ្នាក់ងារព័ត៌មាន Reuters ប្រេងឆៅបានកើនឡើងកាលពីថ្ងៃសុក្របន្ទាប់ពីលោក Biden បានស្នើកញ្ចប់ថវិការាប់ពាន់ពាន់លានដុល្លារ ដើម្បីទប់ទល់នឹងផលប៉ះពាល់សេដ្ឋកិច្ចបណ្ដាលមកពីវីរុសកូវីដ ១៩។
ប្រការនេះបានបន្ថែមលើការកើនឡើងតម្លៃប្រេងប្រចាំសប្តាហ៍ពី ៤៧,១៣ ដុល្លារ ដល់ ៥២,៧០ ដុល្លារ ក្នុង ១ បារ៉ែល ដោយសារការសន្យារបស់អារ៉ាប៊ី សាអ៊ូឌីត ក្នុងការកាត់បន្ថយផលិតកម្មប្រេងចំនួន ១ លានបារ៉ែល ក្នុង ១ ថ្ងៃ ក្នុងខែកុម្ភៈ និងមីនា។
ការស្ទុះងើបឡើងវិញនៃតម្រូវការថាមពលពឹងផ្អែកភាគច្រើនទៅលើភាពជោគជ័យនៃការចាក់វ៉ាក់សាំងកូវីដ ១៩។ ប្រេងបានឡើងថ្លៃពី ៣៣,៦០ ដុល្លារ ដល់ ៥២,៧០ ដុល្លារ ពោលគឺកើនប្រហែល ៤៥% គិតពីដើមខែវិច្ឆិកាឆ្នាំ ២០២០ បន្ទាប់ពីការចាក់វ៉ាក់សាំងកូវីដ ១៩ បានបង្កើនសុទិដ្ឋិនិយមចំពោះការប្រើប្រាស់ប្រេង។
ប្រេងឆៅប្រហែលជាកំពុងស្វែងរកទិសដៅថ្មី បន្ទាប់ពីការកើនឡើងដ៏ខ្លាំងកាលពីសប្តាហ៍មុន។ ទីផ្សារប្រេងឆៅនៅតែមានភាពល្អប្រសើរ ខណៈដែលការសន្យារបស់លោក Biden ដែលបានស្នើថវិកាជំរុញសេដ្ឋកិច្ចនៅថ្ងៃព្រហស្បតិ៍នេះអាចនឹងបង្កើនទំនុកចិត្តកាន់តែខ្លាំងសម្រាប់ទីផ្សារ។
ដូច្នេះសម្រាប់អនុសាសន៍ជួញដូរក្នុងសប្តាហ៍នេះវិនិយោគិនគួរតែទិញប្រេងឆៅក្នុងចន្លោះតម្លៃ ៥១ ទៅ ៥២ ដុល្លារក្នុង ១ បារ៉ែល និងទទួលបានប្រាក់ចំណេញក្នុងតម្លៃ ៥៤,៥០ ដុល្លារ ជាមួយនឹងការខាតបង់នៅត្រឹមតម្លៃ ៤៩ ដុល្លារ។
