.jpg)
ស្លាកសញ្ញាបង្ហាញតម្លៃប្រេងសាំងដាក់លក់នៅភ្នំពេញកាលពីថ្ងៃម្សិលមិញ។ ហុង មិនា
ភ្នំពេញៈ តម្លៃប្រេងឥន្ធនៈលក់រាយនៅកម្ពុជាបានហក់ឡើងចាប់តាំងពីដើមឆ្នាំ ២០២១ មកដែលអ្នកជំនាញជឿថា ការចាប់ផ្តើមចាក់វ៉ាក់សាំងកូវីដ ១៩ បាននាំឱ្យតម្លៃប្រេងឆៅនៅលើទីផ្សារអន្តរជាតិហក់ឡើងវិញជាបន្តបន្ទាប់។
សេចក្តីជូនដំណឹងរបស់ក្រសួងពាណិជ្ជកម្មបង្ហាញថា ថ្លៃប្រេងលក់រាយប្រេងឥន្ធនៈនៅកម្ពុជាចាប់ពីថ្ងៃទី ១ ដល់ ១៥ ខែ មីនា ឆ្នាំ ២០២១ គឺ ៣ ៧០០ រៀល ក្នុង ១ លីត្រ សម្រាប់សាំងធម្មតា (EA92) និង ៣ ៣៥០ រៀល ក្នុង ១ លីត្រសម្រាប់ប្រេងម៉ាស៊ូត។
សេចក្តីជូនដំណឹងបន្តថា ការអនុវត្តតម្លៃប្រេងឥន្ធនៈលក់រាយនៅកម្ពុជាត្រូវបានធ្វើឡើងចំនួន ២ ដង ក្នុង ១ ខែនៅក្នុងខែនីមួយៗ ដែលចេញដោយក្រសួងពាណិជ្ជកម្ម។ ទោះបីយ៉ាងណាក្រសួងពាណិជ្ជកម្មមិនមែនជាអ្នកកំណត់តម្លៃប្រេងឥន្ធនៈនោះទេ គឺគ្រាន់តែជាអ្នកស្រង់តម្លៃឡើងចុះទៅតាមតម្លៃប្រេងនៅលើទីផ្សារអន្តរជាតិមកគណនាប៉ុណ្ណោះ។
តម្លៃលក់រាយនេះត្រូវបានរដ្ឋាភិបាលបញ្ចុះតម្លៃរួចហើយចំនួន ៤ សេនដុល្លារ ក្នុង ១ លីត្រ ដើម្បីជួយសម្រួលដល់ជីវភាពរបស់ប្រជាជន។ ការចុះតម្លៃនេះមានការចូលរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជា។
តម្លៃប្រេងលក់រាយនៅកម្ពុជាបានហក់ឡើងចាប់តាំងពីថ្ងៃទី ១ ខែមករា គឺចន្លោះពី ៣ ២០០ រៀល ដល់ ៣ ៣៥០ រៀល ក្នុង ១ លីត្រសម្រាប់សាំងធម្មតា និងប្រេងម៉ាស៊ូតមានតម្លៃចន្លោះពី ២ ៩៥០ រៀល ដល់ ៣ ០០០ រៀល ក្នុង ១ លីត្រ។
ដោយឡែក តម្លៃប្រេងឥន្ធនៈនៅក្នុងខែកុម្ភៈស្ថិតនៅចន្លោះពី ៣ ៤០០ រៀល ដល់ ៣ ៥០០ រៀល សម្រាប់សាំងធម្មតា និងប្រេងម៉ាស៊ូតមានតម្លៃចន្លោះពី ៣ ០៥០ រៀល ដល់ ៣ ២០០ រៀល ក្នុង ១ លីត្រ។
អ្នកលក់ប្រេងឥន្ធនៈម្នាក់ឱ្យដេប៉ូក្រុមហ៊ុន តូតាល់ នៅរាជធានីភ្នំពេញ បានឱ្យដឹងថា ស្ថានីយអ្នកស្រីតែងតែអនុវត្តតម្លៃលក់រាយតាមការណែនាំរបស់ក្រសួងពាណិជ្ជកម្មគឺសាំងស៊ូពែរមានតម្លៃ ៤ ២០០ រៀល ក្នុង ១ លីត្រ សាំងធម្មតា ៣ ៧០០ រៀល និងប្រេងម៉ាស៊ូត ៣ ៣៥០ រៀល ក្នុង ១ លីត្រ។
អ្នកស្រីបន្ត៖ «គេតែងតែរអ៊ូថាប្រេងសាំងឡើងថ្លៃទៀតហើយ យើងមិនមែនជាអ្នកកំណត់តម្លៃសាំងទេ យើងអនុវត្តតែតាមការណែនាំរបស់ក្រសួងប៉ុណ្ណោះ។ បើយើងមិនអនុវត្តតាម យើងនឹងរងការពិន័យ»។
លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល (Golden FX Link Capital) ដែលជាក្រុមហ៊ុនឈ្មួញជើងសាឧបករណ៍និស្សន្ទឈានមុខនៅកម្ពុជាប្រាប់ភ្នំពេញប៉ុស្តិ៍ថា តម្លៃប្រេងលក់រាយនៅកម្ពុជាឡើងថ្លៃនៅពេលនេះមានទំនាក់ទំនងទៅនឹងតម្លៃប្រេងឆៅនៅលើទីផ្សារអន្តរជាតិដែលហក់ឡើងខ្ពស់រហូតដល់ ៦៣ ដុល្លារ ក្នុង ១ បារ៉ែលក្នុងទីផ្សារនាពេលនេះ។
លោកកត់សម្គាល់ថា ហេតុផលផ្សេងទៀតដែលនាំឱ្យប្រេងឆៅលើទីផ្សារអន្តរជាតិឡើងថ្លៃគឺដោយសារការចាក់វ៉ាក់សាំងកូវីដ ១៩ ដែលគេរំពឹងថានឹងមានការងើបឡើងនៃសេដ្ឋកិច្ចពិភពលោក ពិសេសនៅសហរដ្ឋអាមេរិក។ អាមេរិកមានតម្រូវការប្រើប្រាស់ប្រេងឆៅក៏មានការកើនឡើងកត់សម្គាល់គឺចន្លោះពី ១ លានបារ៉ែលទៅ ៨,៧៦ លានបារ៉ែល ក្នុង ១ ថ្ងៃកាលពីសប្តាហ៍មុន។
លោកបន្តថា៖ «វាទំនងជាការបញ្ជាទិញប្រេងពីខាងក្រៅ [របស់កម្ពុជា] មកក្នុងតម្លៃថ្លៃ ដូច្នេះតម្លៃលក់រាយទៅវិញក៏ឡើងថ្លៃទៅតាមនោះដែរ»។
ប្រេងឆៅម៉ាក Brent មានតម្លៃ ៦២,៩៩ ដុល្លារ ក្នុង ១ បារ៉ែលកាលពីថ្ងៃអង្គារ បន្ទាប់ពីធ្លាក់ចុះ ១,១ ភាគរយ កាលពីថ្ងៃចន្ទ។
ចំណែកប្រេងឆៅអាមេរិកម៉ាក WTI (West Texas Intermediate) មានតម្លៃ ៥៩,៩៣ ដុល្លារ ក្នុង ១ បារ៉ែល បន្ទាប់ពីធ្លាក់ចុះ ១,៤ ភាគរយកាលពីថ្ងៃចន្ទ។
គិតត្រឹមឆ្នាំ ២០២០ នៅកម្ពុជាមានស្ថានីយប្រេងឥន្ធនៈសរុប ៤ ០០០ កន្លែង ដែលកំពុងប្រតិបត្តិការលក់រាយ ប៉ុន្តែមានតែស្ថានីយប្រេងឥន្ធនៈ ប្រហែល ៧០០ ប៉ុណ្ណោះមានវិញ្ញាបនបត្រអនុញ្ញាត។ នេះបើយោងតាមរបាយការណ៍របស់ក្រសួងរ៉ែ និងថាមពល។
លោកនាយករដ្ឋមន្ត្រី ហ៊ុន សែន បានអះអាងថា អណ្តូងប្រេងអប្សរានៅប្លុក A ក្នុងបាសាំងខ្មែរ វិនិយោគដោយក្រុមហ៊ុនរុករកប្រេង និងឧស្ម័ន KrisEnergy Ltd របស់សិង្ហបុរីបូមប្រេងឆៅបានចន្លោះពី ៧ ០០០ ទៅ ៧ ៥០០ បារ៉ែល ប្រសិនបើអណ្តូងប្រេងទាំង ៥ ត្រូវបានដំណើរការ៕ LA
វីដេអូ៖
