ភ្នំពេញៈ ក្រសួងពាណិជ្ជកម្មបានឲ្យដឹងថា តម្លៃប្រេងឥន្ធនៈលក់រាយនៅប្រទេសកម្ពុជានឹងបន្តធ្លាក់ចុះនៅពាក់កណ្តាលខែមីនានេះ ដោយសារភាពតានតឹងពិភពលោក ជាពិសេសគឺការរីករាលដាលនៃវីរុសកូវីដ ១៩ ដែលបាននិងកំពុងរំខានខ្លាំងដល់ខ្សែចង្វាក់ផលិតកម្មសកល។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឲ្យដឹងថា តម្លៃប្រេងឥន្ធនៈលក់រាយនៅកម្ពុជាក្នុងនោះតម្លៃប្រេងសាំងនឹងមិនលើសពី ៣ ៦១០ រៀលក្នុង ១ លីត្រនៅតាមស្ថានីយប្រេងឥន្ធនៈដោយតម្លៃប្រេងម៉ាស៊ូតមិនលើសពី ៣ ៣៤៣ រៀលទេ។
លោកថ្លែងថា៖ «ខ្ញុំមានសុទិដ្ឋិនិយមថា តម្លៃប្រេងឥន្ធនៈលក់រាយនឹងបន្តធ្លាក់ដល់ពាក់កណ្ដាលខែមីនា ដោយសារភាពតានតឹងលើពិភពលោក»។
អ្នកលក់មួយរូបនៅដេប៉ូកាល់តិចព្រមទាំងដេប៉ូតេលានៅតាមបណ្ដោយផ្លូវជាតិលេខ ២ បានឲ្យដឹងថា តម្លៃប្រេងឥន្ធនៈធ្លាក់ចុះចាប់តាំងពីថ្ងៃទី ១ ខែមីនា មក។
អ្នកលក់ខាងលើរូបនេះបាននិយាយថា៖ «ខ្ញុំសង្កេតឃើញថា តម្លៃនៃការលក់រាយកំពុងធ្លាក់ចុះជាបណ្ដើរៗក្នុងរយៈពេល ២-៣ សប្ដាហ៍ចុងក្រោយនេះ»។
លោកបានប្រាប់ទៀតថា បច្ចុប្បន្ននេះស្ថានីយប្រេងឥន្ធនៈនៅប្រទេសកម្ពុជា លក់ប្រេងសាំងធម្មតាក្នុងតម្លៃ ៣ ៤៥០ រៀលក្នុង ១ លីត្រ និងប្រេងម៉ាស៊ូតមានតម្លៃ ៣ ១៥០ រៀល។
តម្លៃប្រេងឥន្ធនៈនៅទីផ្សារពិភពលោកបានធ្លាក់ចុះយ៉ាងខ្លាំងកាលពីថ្ងៃពុធ បន្ទាប់ពីក្រុមហ៊ុនផលិតសំខាន់ៗនៅប្រទេសអារ៉ាប៊ីសាអ៊ូឌីត និងអារ៉ាប់រួមអេមីរ៉ាតបានប្ដេជ្ញាថា នឹងបង្កើនការផលិត។ នេះបើយោងតាមទីភ្នាក់ងារព័ត៌មាន Market Insider រាយការណ៍កាលពីថ្ងៃព្រហស្បតិ៍។
តម្លៃប្រេងឆៅបានធ្លាក់ចុះ ៣,៦ ភាគរយមកនៅត្រឹម ៣៥,៨៧ ដុល្លារក្នុង ១ បារ៉ែលនៅម៉ោង ៨:៤០ នាទីព្រឹកនៅទីក្រុងញូវយ៉ក ខណៈតម្លៃប្រេងឆៅ West Texas Intermediate បានធ្លាក់ចុះ ៣,៧ ភាគរយមកនៅត្រឹម ៣៣,០៨ ដុល្លារក្នុង ១ បារ៉ែល។ តម្លៃប្រេងបានកើនឡើង ១១ ភាគរយកាលពីថ្ងៃអង្គារ បន្ទាប់ពីការធ្លាក់ចុះខ្លាំងកាលពីថ្ងៃមុន។ នេះបើយោងតាម Market Insider។
បច្ចុប្បន្ននៅកម្ពុជាមានស្ថានីយប្រេងឥន្ធនៈសរុប ៤០០០ កន្លែងដែលកំពុងមានប្រតិបត្តិការនៅទូទាំងប្រទេសនេះ ប៉ុន្តែមានតែស្ថានីយប្រេងឥន្ធនៈ ប្រហែល ៧០០ ប៉ុណ្ណោះមានវិញ្ញាបនបត្រអនុញ្ញាតពីក្រសួង។ នេះបើយោងតាមរបាយការណ៍របស់ក្រសួងរ៉ែ និងថាមពល។
ប្រទេសកម្ពុជា ត្រូវបានរំពឹងថានឹងអាចទាញយកតំណក់ប្រេងជាលើកដំបូងរបស់ខ្លួនត្រឹមឆ្នាំ ២០២០ ស្ថិតនៅក្រោមប្រតិបត្តិការរបស់ក្រុមហ៊ុន KrisEnergy Ltd ដែលមានមូលដ្ឋាននៅប្រទេសសិង្ហបុរី ហើយកំពុងធ្វើប្រតិបត្តិការអណ្ដូងប្រេងប្លុក A នៅក្នុងសមុទ្រកម្ពុជា៕LA