ទីក្រុងតូក្យូៈ ផ្សារហ៊ុនទីក្រុងតូក្យូបានបើកជួញដូរជាមួយតម្លៃទាបជាងកាលពីថ្ងៃចន្ទ ដោយសារការព្រួយបារម្ភបានកើនឡើងជុំវិញរលកទី ២ នៃការឆ្លងវីរុសកូរ៉ូណា ហើយអ្នកវិនិយោគរង់ចាំអ៊ុតទិន្នន័យរបស់ចិនដែលចេញយឺត។
សន្ទស្សន៍ភាគហ៊ុន Nikkei 225 បានធ្លាក់ចុះចំនួន ០,៦៨ ភាគរយ ឬក៏ ១៥២,២៦ ពិន្ទុនៅត្រឹម ២២ ១៥៣,២២ ពិន្ទុក្នុងការជួញដូរដំបូងទី ខណៈសន្ទស្សន៍នៃភាគហ៊ុន Topix ដែលធំជាងបានធ្លាក់ចុះ ០,៥១ ភាគរយ ឬក៏ ៧,៩៥ ពិន្ទុនៅត្រឹម ១ ៥៦២,៧៣ ពិន្ទុ។
ក្រុមហ៊ុនឈ្មួញជើងសាអនឡាញ Okasan បាននិយាយក្នុងការអត្ថាធិប្បាយថា៖ «ក្តីព្រួយបារម្ភជុំវិញរលកទី ២ នៃការឆ្លងកំពុងកើនឡើង ពេលបណ្តុំនៃការឆ្លងថ្មីៗត្រូវបានគេរាយការណ៍នៅក្នុងប្រទេសអាមេរិក និងចិន ខណៈចំនួននៃករណីឆ្លងថ្មីៗកើនឡើងនៅទីក្រុងតូក្យូ»។
កាលពីថ្ងៃអាទិត្យ មន្ត្រីរដ្ឋាភិបាលនៃទីក្រុងតូក្យូបានរាយការណ៍ពីករណីកើនឡើងនៃការឆ្លងរហូតដល់ទៅ ៤៧ នាក់ ដែលជាចំនួនច្រើនបំផុតចាប់តាំងពីការដាក់ប្រទេសក្នុងគ្រាអាសន្នត្រូវបានដកចេញកាលពីថ្ងៃទី ២៥ ខែឧសភា។
ប្រទេសចិន ត្រូវគេរាយការណ៍ថា ចំនួនឆ្លងវីរុសកូរ៉ូណាថ្មីៗប្រចាំថ្ងៃកើនឡើងខ្ពស់បំផុតក្នុងខែនេះកាលពីថ្ងៃអាទិត្យ ដោយបង្កើនក្តីបារម្ភចំពោះរលកទី២ នៃការឆ្លងវីរុសកូរ៉ូណា។
អ្នកវិភាគបាននិយាយថា ពាណិជ្ជកម្មត្រូវបានរងគ្រោះផងដែរ ដោយសារក្រុមវិនិយោគិនកំពុងទន្ទឹងរង់ចាំលទ្ធផលការផលិត និងទិន្នន័យលក់រាយរបស់ប្រទេសចិនដែលចេញផ្សាយយឺត ១ ថ្ងៃ។
ក្រុមហ៊ុនអាកាសចរណ៍ក៏ធ្លាក់ចុះដល់កម្រិតទាបផងដែរ ដោយក្រុមហ៊ុន ANA Holdings មានតម្លៃជួញដូរធ្លាក់ចុះ ១,២៣ ភាគរយ មានតម្លៃ ២ ៦៤០,៥ យ៉េន និងអាកាសចរណ៍ជប៉ុនបានធ្លាក់ចុះ ១,៧៥ ភាគរយ ស្មើនឹង ២,១៨៩ យ៉េន៕ RR