ភ្នំពេញៈ អនុប្រធានផ្សារមូលបត្រកម្ពុជា (CSX) លោក Jong Weon Ha បានថ្លែងថាស្របពេលសេដ្ឋកិច្ចរបស់ប្រទេសកម្ពុជាកំពុងងើបឡើងវិញពីផលប៉ះពាល់នៃការរីករាលដាលនៃជំងឺកូវីដ១៩ វានឹងផ្តល់ឱកាសល្អសម្រាប់វិនិយោគិនសាធារណៈក្នុងការទិញភាគហ៊ុនដែលកំពុងមិនសូវមានសម្ទុះ ដើម្បីទទួលបានផលចំណេញនាពេលខាងមុខ។
កាលពីពាក់កណ្តាលខែធ្នូ ឆ្នាំ ២០២០ ធនាគារពិភពលោកបានព្យាករថា សេដ្ឋកិច្ចរបស់ប្រទេសកម្ពុជានឹងស្ទុះងើបឡើងវិញដល់ ៤ ភាគរយនៅឆ្នាំនេះ បន្ទាប់ពីការធ្លាក់ចុះ ដក ១,៩ ភាគរយក្នុងឆ្នាំ ២០២០។
យោងតាមរបាយការណ៍ពី CSX បានបិទកាលពីថ្ងៃសុក្រសប្តាហ៍មុនសន្ទស្សន៍របស់ផ្សារនេះបានកើនឡើង ០,៣ ភាគរយសម្រេចបានដល់ ៦៤០,១៧ ពិន្ទុហើយតម្លៃនៃការជួញដូរភាគហ៊ុនបានបិទក្នុងតម្លៃសរុប ២១៦ ៤៤៦ ៤៧០ រៀល។
ភាគហ៊ុនរបស់ធនាគារអេស៊ីលីដា (ABC) បានកើនឡើង ៦០ រៀលដោយមានតម្លៃរហូតដល់ ១៦ ៨៦០ រៀលក្នុងមួយហ៊ុន។ រដ្ឋាករទឹកស្វយ័តក្រុងភ្នំពេញ (PWSA) កើនបាន ២០ រៀលដោយបិទនៅតម្លៃ ៦ ១០០ រៀលក្នុង ១ ភាគហ៊ុន ខណៈភាគហ៊ុនរបស់កំពង់ផែស្វយ័តភ្នំពេញ (PPAP) ក៏កើនឡើងក្នុងតម្លៃដូចគ្នាផងដែរ ដោយបានកើនឡើង ៨០ រៀលដោយបិទនៅតម្លៃ ១១ ៧៨០ រៀលក្នុង ១ ហ៊ុន ខណៈភាគហ៊ុន Pestech (PEPC) បានបិទក្នុងតម្លៃពិសេស ២៧៧០ រៀលក្នុងមួយហ៊ុនការកើនឡើង ២០ រៀលលើតម្លៃមូលដ្ឋាន និងតម្លៃហ៊ុនរបស់ Grand Twins (GTI) និងតំបន់សេដ្ឋកិច្ចពិសេសភ្នំពេញ (PPSP) ថយចុះមកនៅត្រឹម ៣២៩០ រៀល និង ១១៦០ រៀលក្នុងមួយហ៊ុន ដោយធ្លាក់ចុះ ១០ និង ២០ រៀលរៀងៗគ្នា ប៉ុន្តែសម្រាប់កំពង់ផែស្វយ័តក្រុងព្រះសីហនុ (PAS) នៅរក្សាបានស្ថិរភាពនៅតម្លៃ ១៤ ១០០ រៀល។
លោក Jong Weon Ha បានមានប្រសាស៍មកកាន់ ភ្នំពេញ ប៉ុស្តិ៍ ថា ជំងឺកូវីដ ១៩ នឹងមិនងាយបញ្ចប់ក្នុងពេលឆាប់ៗនេះទេ ទោះបីជាមានវត្តមាននៃវ៉ាក់សាំងក៏ដោយ។ ទោះយ៉ាងណាអ្វីៗកាន់តែប្រសើរឡើង។
លោកថា៖ «យើងបានសង្កេតឃើញថា សន្ទស្សន៍នៃផ្សារហ៊ុនមួយចំនួនបានកើនឡើងក្នុងឆ្នាំ ២០២០។ ដូច្នេះខ្ញុំរំពឹងថានឹងទទួលបានវិនិយោគិនបរទេសបន្ថែមទៀតនៅឆ្នាំ ២០២១ និងឆ្នាំក្រោយព្រោះយើងជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចខ្ពស់បំផុត។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជាក៏បានលើកឡើងថាទីផ្សារមូលបត្របានក្លាយជាជម្រើសដ៏ប្រសើរសម្រាប់ម្ចាស់អាជីវកម្ម និងសហគ្រាសនៅកម្ពុជាដែលមានបំណងប្រមូលដើមទុនរយៈពេលវែងសម្រាប់ការពង្រីកអាជីវកម្មរបស់ពួកគេ។
លោកបានថ្លែងយ៉ាងដូច្នេះថា៖«អត្ថប្រយោជន៍នៃការធ្វើដូច្នេះគឺមានច្រើនជាងការបង្កើតមូលធនដែលជាគន្លឹះនៅក្នុងក្រុមហ៊ុនដែលជាកូនសោរសម្រាប់កំណើនប្រកបដោយចីរភាពនៃអាជីវកម្មណាមួយដែលត្រូវបានបង្កើនដោយការបង្ហាញតម្លាភាព។ នៅឆ្នាំ ២០២១ យើងរំពឹងថានឹងមានក្រុមហ៊ុនចុះបញ្ជី ២ បន្ថែមទៀតនៅផ្សារមូលបត្រកម្ពុជា និងមើលឃើញពីការកើនឡើងនូវសកម្មភាពជួញដូរ»។
លោក Jong Weon Ha បានថ្លែងថានៅក្នុងស្ថានភាពទីផ្សារភាគហ៊ុនកម្ពុជាបច្ចុប្បន្នវិនិយោគិនបរទេសអាចជំរុញនិន្នាការទីផ្សារ។ ពួកគេអាចជាអ្នកទិញដំបូងគេដែលទិញ ឬលក់ភាគហ៊ុនក្នុងចំនួនដ៏ច្រើនហើយនាំឱ្យមានចលនាផ្លាស់ប្តូរតម្លៃដ៏ធំ។
លោកបន្តថា៖ «អាជីវកម្មរបស់ក្រុមហ៊ុនចុះបញ្ជីរបស់យើងកំពុងធ្វើបានល្អប្រសើរឡើងៗក្នុងការស្ទុះងើបសេដ្ឋកិច្ចឡើងវិញ។ នៅក្នុងនិន្នាការបច្ចុប្បន្ននៃការអភិវឌ្ឍឧស្សាហកម្ម កំពង់ផែដូចជា PPAP និង PAS ភាគច្រើនទំនងជាទទួលបានកំណើនអាជីវកម្មខ្ពស់បំផុត»។
បច្ចុប្បន្ននេះមានក្រុមហ៊ុនចុះបញ្ជីចំនួន ១៣ នៅផ្សារមូលបត្រកម្ពុជាដែលក្នុងនោះមានក្រុមហ៊ុនចំនួន ៧ ជាក្រុមហ៊ុនចុះបញ្ជីមូលបត្រកម្មសិទិ្ធ និងក្រុមហ៊ុនចំនួន ៦ ផ្សេងទៀតបានចុះបញ្ជីសញ្ញាបណ្ណសាជីវកម្ម។ ទិន្នន័យរបស់ CSX ក៏បានបង្ហាញថា ក្រុមហ៊ុនទាំង ១៣ បានប្រមូលទុនជាទឹកប្រាក់សរុបចំនួន ២៥៣ លានដុល្លារ ហើយសន្ទស្សន៍ភាគហ៊ុនបានកើនឡើងជាង ៥៧ ភាគរយកាលពីឆ្នាំ ២០១៩ ប្រៀបធៀបនឹងឆ្នាំ ២០១៨។
ក្នុងរយៈពេល ៩ ខែដំបូងនៃឆ្នាំ ២០២០ ក្រុមហ៊ុនចំនួន ២ បានចុះបញ្ជីមូលបត្រកម្មសិទ្ធិ និងចំនួន ៣ ចុះបញ្ជីសញ្ញាបណ្ណសាជីវកម្មនៅផ្សារមូលត្រកម្ពុជា។ ទិន្នន័យបានបង្ហាញថាក្រុមហ៊ុនទាំង ៥ បានប្រមូលទុនជាសាច់ប្រាក់សរុបចំនួន ៩២ លានដុល្លារ៕