បច្ចុប្បន្នតម្លៃមាសស្ថិតនៅក្នុងតម្លៃ ១ ៨៥០ ដុល្លារក្នុង ១ អោនស៍ ស្មើនឹង ២ ២២០ ដុល្លារអាមេរិកក្នុង ១ តម្លឹង ហើយតម្លៃមាសអាចនឹងមានការកើនឡើងរហូតដល់តម្លៃ ២ ០៧០ ដុល្លារក្នុង ១ អោនស៍ក្នុងខែកុម្ភៈខាងមុខនេះ ដោយសារបទបញ្ជាទាំង ១០ ចំណុចរបស់ប្រធានាធិបតីអាមេរិក Joe Biden នេះបើយោងតាមការវិភាគរបស់លោក ចេង តារាវុធ ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល។
បន្ទាប់ពីបានស្បថចូលកាន់តំណែងជាប្រធានាធិបតីសហរដ្ឋអាមេរិកទី ៤៦ ជាផ្លូវការកាលពីថ្ងៃទី ២០ ខែមករា ឆ្នាំ ២០២១ ថ្មីៗនេះលោក Joe Biden បានសម្រេចចុះហត្ថលេខាលើបទបញ្ជាសំខាន់ៗចំនួន ១០ ចំណុចដែលមានសេចក្ដីលម្អិតចំនួន ២៣ ទំព័រស្ដីពីការដោះស្រាយ និងគ្រប់គ្រងការរីករាលដាលជំងឺកូវីដ១៩ ដែលបានសម្លាប់មនុស្សជាមធ្យម ៣ ០៥៤ នាក់ក្នុង ១ ថ្ងៃ និងមានអ្នកឆ្លងជាមធ្យម ១៩៤ ២៥២ នាក់ក្នុង ១ ថ្ងៃនៅក្នុងសហរដ្ឋអាមេរិកគិតត្រឹមរយៈពេល ១ សប្ដាហ៍ចុងក្រោយនេះ ដោយយោងតាមការចេញផ្សាយរបស់សារព័ត៌មាន CNBC កាលពីថ្ងៃព្រហស្បតិ៍ សប្ដាហ៍មុន។
តាមការចេញផ្សាយរបស់សារព័ត៌មាន CNBC ដដែលនេះលោក Joe Biden បានស្នើឱ្យសភាអនុម័តទៅលើកញ្ចប់ថវិកាស្ដារសេដ្ឋកិច្ចដែលមានចំនួន ១,៩ ពាន់ពាន់លានដុល្លារអាមេរិកបន្ថែមទៀត ដើម្បីប្រយុទ្ធប្រឆាំងនឹងបញ្ហាជំងឺរាតត្បាតនេះ និងជួយឧបត្ថម្ភដល់ប្រជាជនដែលបាត់បង់ការងារធ្វើ។
ជាទូទៅ ការធ្វើចរាចរណ៍រូបិយប័ណ្ណលើទីផ្សារកាន់តែច្រើននោះអតិផរណានៃរូបិយប័ណ្ណកាន់តែកើនឡើង ដែលជាកត្ដាធ្វើឱ្យតម្លៃមាសកាន់តែឡើងថ្លៃ ព្រោះមាសគឺជាលោហធាតុមានតម្លៃដែលប្រទេសនីមួយៗនៅទូទាំងពិភពលោកត្រូវការសម្រាប់ទប់ស្កាត់ហានិភ័យនៃអស្ថិរភាពណាមួយនៅក្នុងប្រទេស ជាពិសេសពេលមានវិបត្តិសេដ្ឋកិច្ច វិបត្តិនយោបាយ និងសង្គ្រាមជាដើម។
យោងតាមការវិភាគរបស់លោក តារាវុធ តម្លៃមាសអាចនឹងមានការកើនឡើងបន្ថែមទៀតក្នុងដើមឆ្នាំ ២០២១ នេះ។ សម្រាប់អ្នកជួញដូរដែលចង់ជួញដូរលើតម្លៃមាសក្នុងរយៈពេលវែង គួរទិញក្នុងតម្លៃ ១ ៨៣០ ដុល្លារ ក្នុង ១ អោនស៍ ដោយកំណត់មុខងារយកប្រាក់ចំណេញនៅតម្លៃ ២ ០០០ ដុល្លារក្នុង ១ អោនស៍ និងកំណត់មុខងារបញ្ឈប់ហានិភ័យនៅតម្លៃ ១ ៧៥០ ដុល្លារក្នុង ១ អោនស៍៕