.jpg)
លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល។
មួយរយៈកន្លងមកនេះ វិនិយោគិនហាក់មានការចាប់អារម្មណ៍ជាខ្លាំងទៅលើការទិញបណ្ណបំណុលសហរដ្ឋអាមេរិក ដោយតម្លៃនៃបណ្ណបំណុលរយៈពេល ១០ ឆ្នាំរបស់សហរដ្ឋអាមេរិកបានកើនឡើងពី ០.៩១៧% នាដើមខែមករា ដល់ ១.៧២៦% ក្នុងខែមីនានេះ។ សូចនាករ ១ នេះបានធ្វើឱ្យតម្លៃមាសប្រែប្រួលលើទំនោរធ្លាក់ចុះជាបន្តបន្ទាប់តាំងពីដើមត្រីមាសទី១ នៃឆ្នាំ ២០២១ ហើយស្ថិតនៅក្នុងការរំពឹងថា វានឹងធ្លាក់ចុះបន្ដទៀត។
យោងតាមសារព័ត៌មាន Reuters ដែលបានចេញផ្សាយកាលពីថ្ងៃអង្គារ ទីផ្សារបណ្ណបំណុលរបស់សហរដ្ឋអាមេរិកកំពុងតែមានសុទិដ្ឋិនិយមខ្ពស់ ស្របពេលដែលលោក Joe Biden បានទទួលជោគជ័យលើការអនុម័តកញ្ចប់ថវិកាស្ដារសេដ្ឋកិច្ចរបស់សហរដ្ឋអាមេរិក និងគោលនយោបាយសារពើពន្ធមួយចំនួនពីរតនាគារសហរដ្ឋអាមេរិក។
សម្រាប់អត្រាការប្រាក់វិញ ប្រធានធនាគារកណ្តាលសហរដ្ឋអាមេរិក លោក Jerome Powell បានបញ្ជាក់ថា ធនាគារកណ្ដាលសហរដ្ឋអាមេរិក (FED) នឹងរក្សាវាឱ្យនៅក្បែរ ០% រហូតដល់ឆ្នាំ ២០២៣ នេះបើយោងទៅតាមសន្និសីទកាសែត កាលពីសប្តាហ៍មុនស្តីអំពីការសម្រេចចិត្តរបស់ FED ទៅលើគោលនយោបាយអត្រាការប្រាក់ ដែលត្រូវបានចេញផ្សាយដោយសារព័ត៌មាន CNBC។
ជាមួយគ្នានេះដែរ ការបន្តរក្សាទុកមាសមិនមែនជាជម្រើសដ៏ល្អទៀតនោះទេ នៅពេលដែលមានឧបករណ៍ហិរញ្ញវត្ថុមួយទៀតកំពុងតែកើនឡើងលើតម្លៃ (អត្រាការប្រាក់) ខណៈដែលការរក្សាទុកមាស មិនទទួលបានអត្រាការប្រាក់ និងត្រូវចំណាយលើការបង់ថ្លៃថែរក្សាទៀតផង។ កត្ដានេះ នឹងធ្វើឱ្យវិនិយោគិនគិតគូរលក់មាសចេញ ដើម្បីយកប្រាក់ចំណេញ និងបែរមកវិនិយោគលើបណ្ណបំណុលអាមេរិកវិញ ដែលកំពុងបន្តសន្ទុះកើនឡើងលើអត្រាការប្រាក់របស់ខ្លួន។
តាមការវិភាគបច្ចេកទេសវិញ តម្លៃមាសបានរត់នៅក្នុងលំហូរធ្លាក់ចុះ ហើយរត់ក្រោមខ្សែបន្ទាត់ជាមធ្យម ៥០ ដុល្លារ។ ដូច្នេះ វិនិយោគិនអាចចាប់ឱកាសលក់មាសក្នុងចន្លោះតម្លៃ ១ ៧៥៥ ទៅ ១ ៧៤០ ដុល្លារ ក្នុង ១ អោនស៍ ដោយកំណត់មុខងារការពារហានិភ័យនៅតម្លៃ ១ ៧៦៥ និងមុខងារទាញយកផលចំណេញនៅតម្លៃ ១ ៧០០ ទៅ ១ ៦៨៥ ដុល្លារ ក្នុង ១ អោនស៍៕
