.jpg)
កម្មកររោងចក្រផលិតម៉ាស់មុខសម្រាប់នាំចេញនៅខេត្ត Jiangsu។ AFP
ទីក្រុងប៉េកាំងៈ ក្រុមហ៊ុនផលិតម៉ាស់ដែលបានរីកដុះដាលដូចផ្សិតរាប់ម៉ឺនកន្លែង ពេលចាប់ផ្តើមនៃការរីករាលដាលវីរុសកូរ៉ូណា ប៉ុន្តែក្រុមហ៊ុនជាច្រើនកំពុងតស៊ូ ដើម្បីរស់ពេលពួកគេប្រឈមវិធានការគ្រប់គ្រងគុណភាពកាន់តែតឹងរ៉ឹងឡើង និងតម្រូវការក្នុងស្រុកកំពុងធ្លាក់ចុះ។
ប្រទេសចិន បានដាក់ចេញនូវការខិតខំប្រឹងប្រែងដ៏ខ្លាំង ដើម្បីផលិតសម្ភារការពារបំពេញនូវការខ្វះខាតអំឡុងពេលនៃការផ្ទុះឡើងដែលបានកើតឡើងដំបូងនៅក្នុងប្រទេសនេះកាលពីចុងឆ្នាំមុន មុនរាលដាលទៅពាសពេញពិភពលោក។
ក្រុមហ៊ុនជាង ៧៣ ០០០ បានចុះឈ្មោះជាក្រុមហ៊ុនផលិតម៉ាស់ក្នុងឆមាសដំបូងនៃឆ្នាំនេះ រួមទាំងក្រុមហ៊ុនជាង ៣៦ ០០០ ថ្មីដែលបានចុះបញ្ជីក្នុងខែមេសាជាពេលដែលតម្លៃ និងតម្រូវការកើនឡើងខ្ពស់។
ប៉ុន្តែលំហូរចូលយ៉ាងគំហុកនៃក្រុមហ៊ុនថ្មីៗនាំឲ្យ «មានការថយចុះនូវគុណភាព និងការកើនឡើងនៃការបោកប្រាស់»។ នេះបើយោងតាមក្រុមអ្នកស្រាវជ្រាវដែលមានមូលដ្ឋាននៅប្រទេសចិននៅនៃក្រុមហ៊ុន Daxue Consulting។
ពេលនេះការផ្ទុះឡើងដល់កម្រិតធំ ប៉ុន្តែស្ថិតនៅក្រោមការគ្រប់គ្រងនៅក្នុងចិនដីគោកតម្រូវការម៉ាស់ក្នុងស្រុកបានធ្លាក់ចុះយ៉ាងខ្លាំងរុញច្រានឲ្យតម្លៃដាំក្បាលចុះផងដែរ។
លោក Yang Hao នាយកផ្នែកលក់នៃក្រុមហ៊ុន CCST ជាក្រុមហ៊ុនស្ថិតនៅភាគខាងត្បូងនៃទីក្រុង Shenzhen ដែលផលិតឧបករណ៍បន្សុទ្ធខ្យល់ ប៉ុន្តែបានបន្ថែមការផលិតម៉ាស់ទៅក្នុងតារាងផលិតកម្មបាននិយាយថា៖ «ការបញ្ជាទិញរបស់យើងបានធ្លាក់ចុះខ្លាំងដល់ទៅ ៥ ឬ ៦ ដងចាប់ពីខែមេសា»។
លោកបន្ថែម៖ «យើងមិនត្រូវការផលិតម៉ាស់ទាំងថ្ងៃទាំងយប់ជារៀងរាល់ថ្ងៃទៀតនោះទេ»។
ក្រុមហ៊ុនមួយចំនួនដែលបានបោះជំហានចូលក្នុងឧស្សាហកម្មនេះកំពុងដង្ហោយរកការគាំទ្រ។
ព្រឹត្តិបត្រការងាររបស់ប្រទេសចិនដែលតាមដានការបាត់បង់សណ្តាប់ធ្នាប់របស់កម្មករក្នុងចិនដីគោកបានឲ្យដឹងថា មានការតវ៉ាមួយចំនួនក្នុងខែថ្មីៗនេះដោយសាររោងចក្រផលិតម៉ាស់មួយចំនួនបានបិទភ្លាមៗ និង មិនបើកប្រាក់ខែឲ្យបុគ្គលិក។
ក្រុមហ៊ុនមួយចំនួនបានឲ្យដឹងថា ការបញ្ជាទិញបានធ្លាក់ចុះខ្លាំង និងខ្លះទៀតអះអាងថា ពួកគេរៀបចំអាជីវកម្មសាជាថ្មី។
នាយកផ្នែកលក់ដែលប្រាប់ឈ្មោះត្រកូល Xu នៅក្រុមហ៊ុនផលិតផលិតផលពេទ្យនៅភាគខាងជើងខេត្ត Hebei បាននិយាយថា៖ «ក្រុមហ៊ុនយើងមានចង្វាក់ផលិតកម្មច្រើន យើងបង្កើនល្បឿនផលិតកម្មម៉ាស់ ពេលការរីករាលដាលប៉ះពាល់ចិនខ្លាំង ប៉ុន្តែយើងនឹងប្តូរទៅកាន់ផលិតកម្មផ្សេងវិញក្នុងពេលអនាគត»។
លោក Xu បាននិយាយថា៖ «ក្រុមហ៊ុននាពេលនេះលក់ម៉ាស់ ១ ថ្លៃ ០,៤ យន់ (ប្រហែល ៦ សេនដុល្លារ) ប្រហែល ១ ភាគ ៤ នៃតម្លៃដែលគេលក់នៅពេលការផ្ទុះឡើងខ្ពស់នៅប្រទេសចិនកាលពីដើមឆ្នាំ»។
បន្ទាប់ពីការរិះគន់ជាអន្តរជាតិអំពីផលិតផលគុណភាពទាប អាជ្ញាធរចិនពេលនេះទាមទារនូវវិញ្ញាបនបត្របញ្ជាក់គុណភាពសម្រាប់ក្រុមហ៊ុននាំចេញម៉ាស់ដែលបណ្តាលឲ្យប៉ះពាល់ដល់ក្រុមហ៊ុនផលិតម៉ាស់ខ្នាតតូចជាច្រើនផងដែរ។
ចន្លោះពីខែមីនាដល់ឧសភា ចិនបាននាំចេញម៉ាស់មុខច្រើនជាង ៥០ ពាន់លាន ដែលកើនឡើង ១០ ដងប្រៀបធៀបទៅនឹងផលិតកម្មសរុបក្នុងឆ្នាំ ២០១៩ មុនកើតកូវីដ ១៩៕ RR
