ភ្នំពេញ: តម្លៃម្រេចទូទៅរបស់ប្រទេសកម្ពុជា បានហក់ឡើងយ៉ាងលឿន បន្ទាប់ពីមានតម្រូវការពីទីផ្សារវៀតណាម ក្រោយបញ្ចប់រដូវប្រមូលផលដែលបង្ហាញឲ្យឃើញថា ទិន្នផលម្រេចឆ្នាំនេះបានធ្លាក់ចុះ ហើយវៀតណាមត្រូវការទិញដើម្បីបំពេញឃ្លាំងសន្និធិ។
តម្លៃម្រេចក្រៅតំបន់ដែលបានទទួលស្គាល់ជាផលិតផលសម្គាល់ភូមិសាស្ត្រ (GI: ម្រេចកំពត) បានធ្លាក់ថ្លៃជាបន្តបន្ទាប់ចាប់តាំងពីឆ្នាំ ២០១៨ រហូតបណ្តាលឲ្យកសិករជាច្រើនខកចិត្ត និងបោះបង់ការថែទាំ ការប្រមូលផល ដែលជាកត្តាចម្បងធ្វើឲ្យទិន្នផលម្រេចឆ្នាំនេះបានធ្លាក់យ៉ាងខ្លាំង។
លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជាដែលបានបង្កើតឡើងកាលឆ្នាំ ២០១៨ ដោយមានសហគមន៍ និងសមាគម ១៧ និងក្រុមហ៊ុនឯកជន ៩ ជាសមាជិកបានប្រាប់ភ្នំពេញប៉ុស្តិ៍ថាតម្លៃម្រេចបានងើបឡើងវិញគួរកត់សម្គាល់នៅរយៈពេលចុងក្រោយនេះ បន្ទាប់ពីតម្រូវការម្រេចរបស់វៀតណាមកើនឡើងខ្ពស់។
លោកបន្តថា តម្លៃម្រេចបានកើនឡើងពី ៩ ០០០ រៀលដល់ ១១ ០០០ រៀល ក្នុង ១ កញ្ចប់ ទម្ងន់ ៥៥០ ក្រាម បើធៀបនឹងរយៈពេលដូចគ្នាកាលពីឆ្នាំមុន។ តម្លៃម្រេចរបស់កម្ពុជាបានងើបឡើងវិញចាប់តាំងពីដើមខែឧសភា ក្រោយពីការប្រមូលផលម្រេចរបស់វៀតណាមបានបិទបញ្ចប់កាលពីខែមេសា។
លោកថ្លែងថា៖ «ខ្ញុំគិតថា វាប្រហែលជាការប្រមូលផលម្រេចរបស់វៀតណាមឆ្នាំនេះទំនងជាទទួលបានផលទាប ហើយវៀតណាមបារម្ភបញ្ហាកង្វះម្រេចក្នុងស្តុកព្រោះវៀតណាមជាអ្នកចែកចាយទីផ្សារធំ អ៊ីចឹងធ្វើឲ្យវៀតណាមសម្រុកទិញពីយើងចូលក្នុងស្តុក ទើបធ្វើឲ្យតម្លៃម្រេចយើងងើបឡើងវិញយ៉ាងលឿននៅពេលនេះ»។
លោកបន្តថា៖ «ការងើបឡើងវិញនូវតម្លៃម្រេចនេះនាពេលនេះជាសញ្ញាវិជ្ជមានសម្រាប់ជំរុញឲ្យកសិករកម្ពុជាងាកមកពង្រឹងបច្ចេកទេស និងការថែទាំដំណាំម្រេចនេះឡើងវិញ»។
បើយោងតាមសារព័ត៌មាន Vietnam News តម្លៃម្រេចនៅវៀតណាមបានកើនឡើងខ្ពស់កាលពីសប្តាហ៍មុនធៀបនឹងឆ្នាំមុនដោយសារតម្រូវការពីទីផ្សារចិន និងអាជីវកម្មក្នុងប្រទេសវៀតណាមមានការកើនឡើង។
លោក Nguyen Nam Hai ប្រធានសមាគមម្រេចវៀតណាម (VPA) បានឲ្យដឹងថា កសិករនៅតំបន់ខ្ពង់រាបភាគកណ្តាល និងភាគខាងត្បូងនៃប្រទេសវៀតណាម បានលក់ម្រេចក្នុងតម្លៃ ៤៨ ០០០ ទៅ ៥០ ០០០ ដុង (២,០៨-២,១៧ ដុល្លារ) ក្នុង ១ គីឡូក្រាម។
តម្លៃម្រេចកម្ពុជាបានចាប់ផ្តើមធ្លាក់ថ្លៃចាប់តាំងពី ២០១៨ ដែលកាលនោះ ដោយសារការផលិតម្រេចនៅលើពិភពលោកលើសតម្រូវការប្រើប្រាស់ដែលមានបរិមាណរហូតដល់ ៥០ ម៉ឺនតោន ក្នុង ១ ឆ្នាំ ខណៈតម្រូវការម្រេចរបស់ពិភពលោកមានត្រឹមរង្វង់ ៤៥ ម៉ឺនតោនប៉ុណ្ណោះ។ នេះបើយោងតាមលោក នី។
លោកបានឲ្យដឹងថា បច្ចុប្បន្នម្រេចរបស់កម្ពុជាបានពឹងផ្អែកលើទីផ្សាររបស់ប្រទេសវៀតណាមប្រមាណ ៨០ ភាគរយ និងទីផ្សារប្រទេសថៃ ១៥ ភាគរយ។
លោកបានប៉ាន់ប្រមាណថា ការប្រមូលផលម្រេចនៅកម្ពុជាឆ្នាំ ២០២០ នឹងធ្លាក់ចុះមកក្នុងរង្វង់ ១៦ ០០០ តោន នៅលើផ្ទៃដីដាំដុះសរុបប្រមាណ ៧ ៤០០ ហិកតា ខណៈឆ្នាំមុនកម្ពុជាទទួលផលម្រេចចំនួន ២១ ០០០ តោន។
លោកនិយាយថា៖ «ទិន្នផលម្រេចរបស់យើងទទួលបានទាបជាងឆ្នាំមុន ព្រោះកសិករមួយចំនួនបានបោះបង់ការថែទាំចម្ការម្រេចដែលមកពីតម្លៃម្រេចចុះថោកពេកនាឆ្នាំកន្លងមក ហើយកត្តាអាកាសធាតុមិនអំណោយផលល្អដល់ដំណាំប្រភេទនេះ ក៏ជាហេតុផលនាំឲ្យទិន្នផលធ្លាក់ចុះផងដែរ»។
លោក នេត អង្គារ អ្នកគ្រប់គ្រងទូទៅរបស់ក្រុមហ៊ុន K.C.C.V Plantation Co., Ltd ដែលជាក្រុមហ៊ុនដាំដុះ និងនាំចេញម្រេចបានប្រាប់ភ្នំពេញប៉ុស្តិ៍ថា តម្លៃម្រេចក្នុងស្រុកពិតជាបានហក់ឡើងយ៉ាងខ្លាំងនៅក្នុងរដូវប្រមូលផលឆ្នាំនេះ។
លោកបន្តថា៖ «បច្ចុប្បន្នតម្លៃម្រេចរបស់ក្រុមហ៊ុនលក់រាយក្នុងទីផ្សារក្នុងស្រុកថ្លៃ ១,៨០ ដុល្លារក្នុង ១ កញ្ចប់ដែលមានទម្ងន់ ១០០ ក្រាម និង ៨ ដុល្លារ ក្នុង ១ កញ្ចប់ដែលមានទម្ងន់ ៥០០ ក្រាម»។
កសិករ និងអ្នកមានទ្រព្យសម្បត្តិជាច្រើនបានបោះទុនវិនិយោគដាំម្រេចយ៉ាងច្រើនស្ទើរតែគ្រប់ខេត្តទាំងអស់ បន្ទាប់ពីស្ថិរភាពតម្លៃម្រេចជាច្រើនឆ្នាំ។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបង្ហាញថា ការនាំចេញម្រេចសរុបទាំងម្រេចសម្គាល់ភូមិសាស្ត្រ និងនៅក្រៅតំបន់សម្គាល់ភូមិសាស្ត្រចំនួនជិត ៣០០ តោនក្នុងត្រីមាសទី ១ ឆ្នាំនេះដោយនាំចេញទៅកាន់ប្រទេសជប៉ុន អាលឺ្លម៉ង់ បែលហ្ស៊ិក ហូឡង់ បារាំង អាមេរិក ស្វ៊ីស វៀតណាម រុស្ស៊ី អង់គ្លេស និងឥណ្ឌា។
របាយការណ៍នេះឲ្យដឹងថាកាលពីឆ្នាំ ២០១៩ ការនាំចេញសម្រេចបានជាង ៣ ៦៩៣ តោនកើន ៥៣,១៧ ភាគរយ ធៀបនឹងរយៈពេលដូចគ្នាឆ្នាំ ២០១៨ ដែលមាន ២ ៤១១ តោន៕LA