.jpg)
កសិករកំពុងលីស្រូវដែលប្រមូលរួចនៅនឹងវាលស្រែក្នុងខេត្តបាត់ដំបងកន្លងមក។ ហេង ជីវ័ន
ភ្នំពេញៈ ខណៈការប្រមូលផលស្រូវក្រអូបបានចូលមកដល់អ្នកនៅក្នុងវិស័យនេះបានឲ្យដឹងថា តម្លៃស្រូវក្រអូបជារួមតាមបណ្តាខេត្តមួយចំនួនបានបង្ហាញពីស្ថិរភាពបើធៀបនឹងឆ្នាំមុន ខណៈអ្នកក្នុងវិស័យស្រូវអង្ករអះអាងថា នេះគ្រាន់តែជាការចាប់ផ្តើមប្រមូលផលដំបូងប៉ុណ្ណោះ។
ស្រូវផ្ការំដួល ដែលជាប្រភេទនៃអង្ករជាប់លេខ ១ ល្អរបស់កម្ពុជាទើបតែចាប់ផ្តើមប្រមូលផលបានប្រហែល ១ សប្តាហ៍ នៅតាមខេត្តមួយចំនួនដូចជា ពោធិ៍សាត់ ព្រៃវែង ស្វាយរៀង និងបាត់ដំបងជាដើម។ ការប្រមូលផលស្រូវប្រភេទនេះនឹងត្រូវបញ្ចប់នៅចុងខែធ្នូ ឬដើមខែមករាខាងមុខ។
អនុប្រធានសហព័ន្ធស្រូវអង្ករកម្ពុជា (CRF) លោក ចាន់ សុខឃាំង កាលពីម្សិលមិញបាននិយាយថា តម្លៃស្រូវផ្ការំដួលពេលប្រមូលផលដំបូងនេះមានតម្លៃចន្លោះពី ១ ១០០ ទៅ ១២០០ រៀលក្នុងមួយគីឡូក្រាមប្រហាក់ប្រហែលនឹងឆ្នាំមុន។ ទោះបីជាយ៉ាងនេះក្តី លោកមិនទាន់អាចសន្និដ្ឋានថានឹងប្រែប្រួលបែបណាទេនាពេលខាងមុខ។
លោកបន្តថា ដើម្បីលើកកម្ពស់ឲ្យការនាំចេញអង្ករទៅកាន់ទីផ្សារអន្តរជាតិ សហព័ន្ធស្រូវអង្ករកម្ពុជាកំពុងជំរុញក្រុមហ៊ុន និងរោងម៉ាស៊ីនជាសមាជិករបស់ខ្លួនទាំងអស់ឲ្យប្រមូលទិញស្រូវរំដួលនេះយកមកស្តុកឲ្យបានច្រើន។ លោកអះអាងថា៖ «ស្រូវប្រភេទនេះមានតម្រូវការច្រើននៅលើទីផ្សារអន្តរជាតិ»។
បើតាមលោក ចាន់ សុខឃាំង បច្ចុប្បន្នអង្ករផ្ការំដួលលក់នៅលើទីផ្សារអន្តរជាតិអាចមានតម្លៃចន្លោះពី ៨៨០-៩០០ ដុល្លារក្នុង ១ តោន។
ជាមួយគ្នានេះក្នុងនាម CRF លោក សុខឃាំង ក៏បានស្នើឲ្យធនាគារពាណិជ្ជទាំងអស់ជួយផ្តល់កញ្ចប់ថវិកាទៅដល់ក្រុមហ៊ុន និងរោងម៉ាស៊ីនកិនស្រូវ ដើម្បីប្រមូលទិញស្រូវយកមកស្តុកទុកនឹងកាត់បន្ថយស្រូវហូរចេញទៅប្រទេសជិតខាង។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានឲ្យដឹងថា ទិន្នផល និងតម្លៃស្រូវនៅពេលនេះអាចល្អជាងឆ្នាំមុន។ លោកថា៖ «បើតាមខ្ញុំដឹង គឺតម្លៃស្រូវឆ្នាំនេះមានភាពល្អប្រសើរ ព្រោះមិនឃើញមានសមាជិកសហព័ន្ធណាត្អូញត្អែរ ឬនិយាយពីការធ្លាក់ចុះតម្លៃស្រូវទេមកដល់ពេលនេះ»។
ទោះបីយ៉ាងណាលោក ហេង ផេង នាយកប្រតិបត្តិក្រុមហ៊ុន Thmor Korl Rice Import Export Co., Ltd ជាក្រុមហ៊ុននាំចេញអង្ករមានមូលដ្ឋានក្នុងខេត្តបាត់ដំបងបានឲ្យដឹងថា តម្លៃស្រូវនៅដើមរដូវនៅខេត្តបាត់ដំបងហាក់បានធ្លាក់ចុះបន្តិចបើធៀបនឹងឆ្នាំទៅ។
លោកបន្តថា តម្លៃស្រូវដែលរោងម៉ាស៊ីនលោកទិញពីកសិករ មួយតោនតម្លៃ ១១៧០ ០០០ រៀល ខណៈកាលពីឆ្នាំមុនមានតម្លៃ ១ ២៨០ ០០០ រៀល។
របាយការណ៍មន្ទីរកសិកម្មខេត្តបាត់ដំបងបានឲ្យដឹងថា គិតត្រឹមថ្ងៃទី ៤ ខែវិច្ឆិកា ឆ្នាំ ២០១៩ ទូទាំងខេត្តបាត់ដំបងមានផ្ទៃដីប្រមូលផលស្រូវសរុប ៣៥៨ ៦៣៣ ហិកតាដោយក្នុង ១ ហិកតាផ្តល់ទិន្នផលជាមធ្យម ៤,១៦ តោន។
លោក ហេង សិទ្ធិ មន្ត្រីនៃមន្ទីរកសិកម្មខេត្តបាត់ដំបងបាននិយាយថា សម្រាប់ឆ្នាំ ២០១៩ នេះផ្ទៃដីបង្កបង្កើនផលបានកើនលើសផែនការរហូតដល់ ១១៤,៤៩ ភាគរយនៃផែនការ។ ចំណែកទិន្នផលស្រូវត្រូវព្យាករថានឹងមានបរិមាណ ១,២៤ លានតោនកើនលើសឆ្នាំមុន ជាង ៨,៥ ម៉ឺនតោន៕ LA
