.jpg)
កសិករកំពុងចាក់គ្រាប់ស្រូវ អំឡុងពេលប្រមូលផលនៅខេត្តបាត់ដំបងកន្លងមក។ ហេង ជីវ័ន
ភ្នំពេញៈ ខណៈដែលឃ្លាំងស្ដុក និងឡសម្ងួតស្រូវជាច្រើនត្រូវបានដាក់ឲ្យដំណើរការ តម្លៃស្រូវក្នុងរដូវប្រមូលផលឆ្នាំ ២០១៨-២០១៩ បានកើនឡើងចន្លោះតម្លៃពី ៩០០ រៀល ទៅ ១ ៣០០ រៀល ក្នុងមួយគីឡូក្រាម ជាតម្លៃដ៏ល្អមួយសម្រាប់កសិករបើធៀបនឹងរដូវប្រមូលផលមុនៗ។ នេះបើយោងតាមអ្នកក្នុងឧស្សាហកម្មនេះ។
លោក វង្ស ប៊ុនហេង អនុប្រធានសហព័ន្ធស្រូវអង្ករកម្ពុជា (CRF) បានកត់សម្គាល់ថា តម្លៃស្រូវបានត្រឡប់ទៅរកភាពកាន់តែប្រសើរឡើង បើធៀបនឹងរដូវ ២០១៧-២០១៨ ដោយបានកើនជាង ២០ ភាគរយ។
តម្លៃគឺផ្អែកលើប្រភេទស្រូវ និងគុណភាពរបស់វា ដោយតម្លៃស្រូវគុណភាពខ្ពស់មានចំនួន ១ ៣០០ រៀលក្នុង ១ គីឡូក្រាម ស្រូវធម្មតាតម្លៃ ៩០០ រៀល។ នេះបើយោងតាមលោក វង្ស ប៊ុនហេង។ លោកថ្លែងថា៖ «តម្លៃនេះកំពុងស្ថិតក្នុងដំណើរការកាន់តែប្រសើរឡើងនៅពេលនេះ យើងរំពឹងថា តម្លៃនេះនឹងបន្តរហូតដល់រដូវក្រោយទៀត»។ លោកបន្ថែមថា កំណើនតម្លៃនេះគឺដោយសារតែឃ្លាំងស្ដុកស្រូវត្រូវបានដាក់ឲ្យដំណើរការដែល អាចស្រូបយកស្រូវកាន់តែច្រើនពីកសិករ។ រដូវប្រមូលផលស្រូវសំខាន់ៗរបស់កម្ពុជា ចាប់ពីចុងឆ្នាំ រហូតដល់ដើមឆ្នាំនីមួយៗ។
កាលពីឆ្នាំកន្លងមកក្នុងឆ្នាំ ២០១៦ កសិករដាំដុះស្រូវនៅខេត្តបាត់ដំបង ដែលជាខេត្តផលិតស្រូវដ៏សំខាន់មួយរបស់កម្ពុជា បានចេញមកតវ៉ានៅតាមផ្លូវ ដើម្បីប្រឆាំងនឹងការធ្លាក់ចុះតម្លៃ តាមរយៈការបិទផ្លូវ ដើម្បីឲ្យមានអន្តរាគមន៍ពីរដ្ឋាភិបាល។
លោក ស៊ុម សង ប្រធានសហគមន៍អភិវឌ្ឍន៍កសិកម្មចំរើនផលរាំង កេសី ជាសហករណ៍កសិកម្មនៅស្រុកសង្កែ ខេត្តបាត់ដំបង ដែលមានសមាជិក ២៨៨ គ្រួសារមានផ្ទៃដីដាំដុះ ២ ២២៥ ហិកតា បានឲ្យដឹងថា តម្លៃនៅពេលនេះប្រសើរជាងពេលមុនដែលពេលនោះកសិករអាចលក់ស្រូវក្នុងតម្លៃចន្លោះពី ៥០០ រៀលទៅ ៦០០ រៀលប៉ុណ្ណោះក្នុង ១ គីឡូក្រាម។ សម្រាប់រដូវប្រមូលផលនេះ កសិករនៅខេត្តបាត់ដំបងអាចលក់ស្រូវរបស់ពួកគេក្នុងតម្លៃ ៨០០ រៀលទៅ ១ ១០០ រៀល ក្នុង ១ គីឡូក្រាម។
លោកថ្លែងថា៖ «ពេលដែលយើងបានទទួលការធ្វើកសិកម្មតាមកិច្ចសន្យាជាមួយម្ចាស់រោងម៉ាស៊ីនកិនស្រូវ តម្លៃរបស់យើងនឹងត្រូវបានធានា និងមិនមានការបារម្ភអំពីការប្រែប្រួលតម្លៃនោះទេ»។ លោកបន្តថា៖ «ពេលយើងមិនមានការធ្វើកសិកម្មតាមកិច្ចសន្យា តម្លៃស្រូវត្រូវប្រែប្រួល ដែលពឹងផ្អែកលើមាត់របស់ឈ្មួញ»។
លោក ផាត សារឿន ប្រធានសហករណ៍កសិកម្មអូរសារ៉ាយ នៅខេត្តតាកែវ បានឲ្យដឹងថា តម្លៃនៅខេត្តនេះបានកើនឡើងដល់ ១ ៣០០ រៀល សម្រាប់ស្រូវគុណភាពខ្ពស់ និង ៩០០ រៀលក្នុង ១ គីឡូក្រាមសម្រាប់ស្រូវធម្មតា ដែលត្រូវបានប៉ាន់ប្រមាណថាកើនឡើង ២០ ភាគរយ ធៀបនឹងរដូវកាលប្រមូលផលឆ្នាំមុន។
លោកថ្លែងថា៖ «យើងរីករាយនឹងតម្លៃបច្ចុប្បន្ន យើងលក់ឲ្យម្ចាស់រោងម៉ាស៊ីនកិនស្រូវក្នុងមូលដ្ឋាន និងឈ្មួញមកពីប្រទេស វៀតណាម ដែលផ្ដល់តម្លៃកាន់តែប្រសើរដល់ពួកយើង»។
ប៉ុន្តែលោក ផាត សារឿន ត្រូវការទម្រង់នៃការធ្វើកសិកម្មតាមកិច្ចសន្យា ដើម្បីធានាតម្លៃសម្រាប់រយៈពេលវែង។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានឲ្យដឹងថា ទីផ្សារស្រូវកម្ពុជាប្រែប្រួលតាមទីផ្សារអន្តរជាតិ ដែលគេមិនអាចធានាតម្លៃខ្ពស់រយៈពេលយូរណាមួយបានទេ។ លោកថ្លែងថា៖ «ឧស្សាហកម្មស្រូវអង្កររបស់យើង មិនអាចកំណត់តម្លៃសម្រាប់កសិករបានទេ»។
លោកបន្ថែមថា តម្លៃស្រូវមិនអាចធានាតម្លៃបានគ្រប់ពេលវេលានោះទេ លុះត្រាតែរដា្ឋភិបាលជាអ្នកធានា។ លោកបញ្ជាក់ថា៖ «មិនមានមធ្យោបាយក្នុងការធានាតម្លៃល្អបានគ្រប់ពេលនោះទេ លុះត្រាតែរដ្ឋាភិបាលទើបធានាតម្លៃបាន ប៉ុន្តែការធ្វើដូច្នេះវានឹងមានការពិបាក»៕LA
