The Phnom Penh Post Search

Search form

Logo of Phnom Penh Post newspaper Phnom Penh Post - តម្លៃ​អគ្គិសនី​នឹង​ធ្លាក់​ចុះ​ចាប់​ពី​ឆ្នាំ​ ២០១៥ ​នេះ​ទៅ

តម្លៃ​អគ្គិសនី​នឹង​ធ្លាក់​ចុះ​ចាប់​ពី​ឆ្នាំ​ ២០១៥ ​នេះ​ទៅ

កុងទ័រភ្លើង​នៅមុខផ្ទះប្រជា​ពលរដ្ឋ​ក្នុងខេត្តកោះកុង​​។
​​កុងទ័រភ្លើង​នៅមុខផ្ទះប្រជា​ពលរដ្ឋ​ក្នុងខេត្តកោះកុង​​។ ហេង ជីវ័ន

តម្លៃ​អគ្គិសនី​នឹង​ធ្លាក់​ចុះ​ចាប់​ពី​ឆ្នាំ​ ២០១៥ ​នេះ​ទៅ

កោះ​កុងៈ ​លោក​នាយក​រដ្ឋ​មន្ត្រី​ ហ៊ុន​ សែន ​បាន​ថ្លែង​ កាល​ពី​ថ្ងៃ​ចន្ទ​ថា ​តម្លៃ​អគ្គិសនី​នៅ​កម្ពុជា​នឹង​​មាន​ការ​ចុះ​ថ្លៃ​ចាប់​ពី​ឆ្នាំ​នេះ​ទៅ​បន្ទាប់​ពី​ប្រទេស​ដែល​មាន​តម្លៃ​អគ្គិសនី​ខ្ពស់​ជាង​គេ​នៅ​តំបន់​អាស៊ី​អាគ្នេយ៍​មួយ​នេះ​បាន​និង​កំពុង​ដាក់​ឲ្យ​ដំណើរ​ការ​ជា​នូវ​ប្រភព​ថាម​ពល​វារីអគ្គិសនី​ផ្សេង​ៗ​ជា​បន្ត​បន្ទាប់​។

ថ្លែង​ក្នុង​ពិធី​ដាក់​ឲ្យ​ដំណើរ​ការ​នូវ​​ទំនប់​វារី​អគ្គិសនី​ឫស្សី​ជ្រំ​ដែល​ស្ថិត​នៅ​ក្នុង​ខេត្ត​កោះ​កុង​កាល​ពី​ម្សិល​មិញ​ លោក​ ហ៊ុន ​សែន​ ឲ្យ​ដឹង​ថា ​ទាំង​បណ្តា​សហគ្រាស​តូច​ធំ ​សិប្បកម្ម​នានា ​និង​ប្រជា​ពល​រដ្ឋ​ទាំង​ឡាយ​នឹង​រីករាយ​ជាមួយ​ការ​កំណត់​នូវ​អត្រា​ភ្លើង​ថ្មី​ពី​ឆ្នាំ​នេះ​ទៅ។

លោក​នាយក​រដ្ឋ​មន្ត្រី​បាន​អះអាង​ថា​ បញ្ហា​អគ្គិសនី​២០១៥​ នេះ​តម្លៃ​ទិញ​ពី​អនុ​ស្ថានីយ​ផ្ទាល់​តម្លៃ​៥៣០​ ក្នុង​ ២​ គីឡូវ៉ាត់​ម៉ោង​​សម្រាប់​ឧស្សាហកម្ម​ធំៗ​ សិប្បកម្ម ដែល​ទិញ​ពី​បណ្តាញ​នៅ​ភ្នំពេញ​សម្រាប់​ឆ្នាំ​២០១៥​នេះ ​គឺ​លក់​ក្នុង​តម្លៃ​ ៧២៥​ រៀល​ ឆ្នាំ​២០១៦ ​តម្លៃ ​៧០៥​ រៀល​ ២០១៧​តម្លៃ​ ៦៨៥ ​រៀល ២០១៨ ​តម្លៃ ​៦៧៥ ​រៀល ​២០១៩ ​តម្លៃ​ ៦៦៨ ​រៀល ២០២០ ​តម្លៃ ​៦៦០ ​រៀល​។

លោក​បន្ត​ថា ​សម្រាប់​ការ​ទិញ​ពី​បណ្តាញ​តាម​ខេត្ត ​២០១៥​ ​គឺ​ ៧០៧​ រៀល​ ២០​១៦ ​តម្លៃ​៦៨៧ ​រៀល ​២០១៧ ​តម្លៃ​៦៧៥ ​រៀល ​២០១៨​ តម្លៃ​៦៧០ ​រៀល ​២០១៩​ តម្លៃ​ ៦៦៨​ រៀ​ល ២០២០​ តម្លៃ​៦៦០ រៀល។

«និន្នាការ​នៃ​ភ្លើង​របស់​កម្ពុជា​គឺ​ចេះ​តែ​ចុះ​ អ៊ីចឹង​ពួក​អ្នក​ប្រើ​ក្រុមហ៊ុន ​រោង​ចក្រ​សហគ្រាស​ទាំង​ឡាយ​ត្រូវ​មើល​ឃើញ​អំពី​ផល​​ចំណេញ​ដែល​បាន​មក​ពី​ការ​ទិញ​អគ្គិសនី​ពី​បណ្តាញ​មក​ពី​ទីក្រុង​ភ្នំពេញ»។ ​នេះ​បើ​យោង​តាម​លោក ​ហ៊ុន សែន​។

លោក​បន្ត​ថា ​ការ​ផ្គត់​ផ្គង់​សម្រាប់​លំនៅឋាន​ក្នុង​បណ្តា​ខេត្ត​ទាំង​អស់​ក្នុង​តំបន់​ដែល​ប្រភព​អគ្គិសនី​ពី​បណ្តាញ​ជាតិ​គ្រប​ដណ្តប់ ​គឺ​ឆ្នាំ​២០១៥ ​តម្លៃ ​៩២០ ​ទៅ​៨២០ និង​ចុះ​ពី​ចន្លោះ​នេះ​គឺ​២០១៦ ​តម្លៃ​៧៨០ ​រៀល​ ២០១៧​ តម្លៃ​៧៧០ រៀល​ ២០១៨ ​តម្លៃ​៧៥០​ រៀល ​២០១៩ ​តម្លៃ​៧៤០​រៀល ​ឆ្នាំ​២០២០​ គឺ​​៧៣០ ​រៀល។

សម្រាប់​តំបន់​មួយ​ទៀត​គ្រប់គ្រង​ដោយ​ឯកជន​ដែល​បាន​វិនិយោគ​ខ្សែ​បន្ត​ពី​បណ្តាញ​របស់​រដ្ឋ ហើយ​ដែល​រដ្ឋ​លក់​អគ្គិសនី​ឲ្យ​ក្នុង​នោះ ​២០១៥ ​តម្លៃ១​០០០ ​រៀល​ ២០​១៦​ តម្លៃ​៨០០​ ឆ្នាំ​២០១៧ ​តម្លៃ ​៧៩០​ រៀល ​ឆ្នាំ​២០​១៨​ ៧៧០​​រៀល ​២០​១៩​តម្លៃ ៧៦០ ​រៀល ​និង ​ឆ្នាំ ២០២០ ​លក់​​ក្នុង​តម្លៃ​៧៥០​រៀល​។

លោក​បន្ត​ថា ​«[តម្លៃ​ឯក​ជន​គឺ​] ថ្លៃ​ជាង​តម្លៃ​រដ្ឋ​២០​រៀល​ ព្រោះ​គេ​វិនិយោគ​បណ្តាញ​ត្រូវ​ឲ្យ​គេ​ចំណេញ​លើ​បញ្ហា​ហ្នឹង ​អ៊ីចឹង​ទេ​​ បាន​​ជា​រដ្ឋ​ខិតខំ​វិនិយោគ​​ដោយ​ខ្លួន​ឯង​ដើម្បី​ខិតខំ​កាត់​បន្ថយ​កុំ​ឲ្យ​ថ្លៃ​ដល់​ប្រជា​ពល​រដ្ឋ​​ដែល​ប្រើ​​របស់​ឯកជន។

កាល​ពី​ពេល​ថ្មី​ៗ​នេះ​ អគ្គិសនី​កម្ពុជា (EDC) ប្រកាស​ដំណើ​រការ​កម្មវិធី​ផ្តល់​កម្ចី​មិន​គិត​ការ​ប្រាក់​ដែល​​មាន​ចំនួន​ ៣០ ​ម៉ឺន​ដុល្លារ​​ដល់​ម្ចាស់ អាជីវ​កម្ម​ផ្គត់​ផ្គង់​អគ្គិ​សនី​នៅ​តំបន់​ជន​បទ ​និង​គ្រួសារ​ក្រីក្រ​ដើម្បី ​បង្កើន​លទ្ធភាព​ភ្ជាប់​បណ្តាញ​អគ្គិសនី។

លោក ​ហ៊ីរ៉ូស៊ិ ហ្ស៊ុយ​សាគិ អ្នក​ជំនាញ​ផ្នែក​សេដ្ឋ​កិច្ច​នៃ​វិទ្យា​ស្ថាន​ស្រាវជ្រាវ​ពាណិជ្ជកម្ម​កម្ពុជា ​បាន​ឲ្យ​ដឹង​កាល​ពី​ពេល​ថ្មី​ៗ​នេះ​​ថា ការ​បង្កើន​លទ្ធភាព​ផ្គត់​ផ្គង់​អគ្គិ​សនី​នៅ​តំបន់​ជន​បទ​កម្ពុជា​គឺជា​ការ​ចាំបាច់​ដើម្បី​អភិវឌ្ឍ​ស្ថាន​ភាព​នៃ​ការ​រស់នៅ​របស់​​ប្រជា​ជន​នៅ​ជន​បទ​​ឲ្យ​កាន់​តែ​ប្រសើរ​ឡើង​ដោយ​តម្រូវ​ការ​មាន​កំណើន​ជា​លំដាប់​ស្រប​ពេល​ចំនួន​ប្រើប្រាស់​ឧបករណ៍​អេឡិច​ត្រូនិក​ និង IT ​ដែល​ជា​សម្ភារ​ប្រើ​ប្រាស់​ក្នុង​ផ្ទះ​កំពុង​កើន​ឡើង​។

លោក​ថ្លែង​ថា​៖ «ខ្ញុំ​គិត​ថា​កម្មវិធី​ផ្តល់​កម្ចី​របស់ ​EDC​ នឹង​ដើរតួ​យ៉ាង​សំខាន់​ក្នុង​ការ​កែលម្អ​លទ្ធភាព​ប្រើប្រាស់​អគ្គិសនី និង​ការ​កសាង​បណ្តាញ​អគ្គិសនី»​។ «​ប្រសិន​បើ​រដ្ឋាភិបាល ​និង​អគ្គិសនី​កម្ពុជា​អាច​ផ្តល់​​កម្ចី​ប្រភេទ​នេះ​ដោយ​មាន​លក្ខ​ខណ្ឌ​ល្អ បទ​ពិសោធ​របស់​យើង​​បាន​បង្ហាញ​យ៉ាង​ច្បាស់​ថា​ ការ​អភិវឌ្ឍ​វិស័យ​សហ​គ្រាស ​ខ្នាត​តូច​ និង​មធ្យម​នឹង​មាន​ការ​អភិវឌ្ឍ​បាន​យ៉ាង​លឿន​»។

បើ​យោង​ទៅ​តាម​លោក​ហ៊ុន​ សែន​ អត្រា​ថ្លៃ​អនុ​គ្រោះ​សម្រាប់​លំនៅឋាន​ក្រីក្រ និង​ការ​បូប​ទឹក​​ធ្វើ​កសិកម្ម​ដែល​បណ្តាញ​ជាតិ​​ធ្វើ​ការ​គ្រប់​គ្រង​លំ​នៅ​ឋាន​ក្រី​ក្រ​នៅ​ភ្នំពេញ​ដែល​ប្រើ​មិន​លើស​៥០​គីឡូ​វ៉ាត់​ម៉ោង​ក្នុង​ ១ ​ខែ ​គឺ​តែ ​៦១០ ​រៀល​សម្រាប់​ឆ្នាំ ​២០១៥ រហូត​ដល់​ឆ្នាំ ​២០២០​គឺ​នៅ​តែ​រក្សា​តម្លៃ ​៦១០​ រៀល​ដដែល​ ចំណែក​សម្រាប់​អ្នក​ក្រីក្រ​លំនៅឋាន​នៅ​បណ្តា​ខេត្ត​ដែល​ប្រើ​មិន​លើស​ពី​១០​គីឡូ​វ៉ាត់​ម៉ោង​ក្នុង​១​ខែ តម្លៃ​ ៤៨០​ រៀល សម្រាប់​ឆ្នាំ​ ២០១៦ ​ឆ្នាំ​ ២០១៧ ​តម្លៃ ​៤៧៤​ រៀល ឆ្នាំ ​២០១៨ ​តម្លៃ​ ៤៦២​រៀល ឆ្នាំ​២០១៩ ​តម្លៃ ​៤៥៦ ​រៀល និង​ឆ្នាំ​២០២០ ​តម្លៃ​ ៤៥០​ រៀល។

សម្រាប់​ការ​បូម​​ទឹក​ធ្វើ​ស្រែ​ពី​​ម៉ោង៩​យប់​​ដល់​ម៉ោង​៤​ព្រឹក​ គឺ​២០១​៦​ តម្លៃ​៤៨០​ ឆ្នាំ​​២០១៧​ តម្លៃ ​៤៧៤​ ឆ្នាំ ​២០១៨​ តម្លៃ ៤៦២ ​ឆ្នាំ ២០១៩ តម្លៃ​ ៤៥៦​ និងឆ្នាំ​ ២០​២០​តម្លៃ​ ៤៥០​រៀល​​ជាមួយ​គ្នា​នោះ​លោក ហ៊ុន សែន​ក៏បាន​ធ្វើ​ការ​អំពាវនាវ​ដល់​ក្រុមហ៊ុន​ឯក​ជន​ដែល​ទទួល​បាន​សិទ្ធិ​វិនិយោគ​ដែល​ដំណើរការ​ដោយ​ម៉ាស៊ីន​ប្រេង ត្រូវ​ពិនិត្យ​លទ្ធភាព​បញ្ចុះ​ថ្លៃ​អគ្គិសនី​របស់​ខ្លួន ​ខណៈ​ដែល​តម្លៃ​សាំង​កំពុង​តែ​ចុះ​ថ្លៃ​អស់​រយៈ​យូរ​មក​ហើយ។

លោក​ ហ៊ុន ​សែន ​ថ្លែង​ថា៖ «ខ្ញុំ​សូម​អំពាវ​នាវ​ក្រុម​ហ៊ុន​វិនិយោគ​ផ្គត់​ផ្គង់​ភ្លើង​ដោយ​ប្រើ​ប្រេង​នេះ​ តម្លៃ​ប្រេង​នៅ​ទីផ្សារ​អន្តរជាតិ​ធ្លាក់​ចុះមក​ជាង​ពាក់​កណ្តាល​ហើយ តម្លៃ​ភ្លើង​នៅ​តែ​មិន​ព្រម​ចុះ​? ​ដល់​ពេល​គាត់​ឡើង​ថ្លៃ​អគ្គិ​​សនី​គាត់​ថា ​ថ្លៃ​ប្រេង​វា​ឡើង ​ដល់​ពេល​ថ្លៃ​ប្រេង​វា​​ចុះ​​យូ​រក្រែ​ល​​ថ្លៃ​ភ្លើង​នៅតែ​មិន​ចុះ?»៕

អត្ថបទគួរចាប់អារម្មណ៍