The Phnom Penh Post Search

Search form




Logo of Phnom Penh Post newspaper Phnom Penh Post - តម្លៃ​កៅស៊ូ​កម្ពុជា​បន្ត​ធ្លាក់ ខណៈ​ការ​នាំ​ចេញ​កើន

តម្លៃ​កៅស៊ូ​កម្ពុជា​បន្ត​ធ្លាក់ ខណៈ​ការ​នាំ​ចេញ​កើន

តម្លៃ​កៅស៊ូ​កម្ពុជា​បន្ត​ធ្លាក់ ខណៈ​ការ​នាំ​ចេញ​កើន

20140508_12
កម្មករដែលប្រមូលជ័រកៅស៊ូនៅចម្ការកៅស៊ូជុប ក្នុងខេត្តកំពង់ចាម ភ្នំំពេញ ប៉ុស្តិ៍

ភ្នំពេញៈ តម្លៃ​ជ័រ​កៅស៊ូ​កម្ពុជា​បាន​បន្ត​ធ្លាក់​ចុះ​នៅ​ត្រីមាស ទី១ ឆ្នាំ​នេះ ខណៈ​ចំនួន​នៃ​ការ​នាំ​ចេញ​កើន ដែល​មន្ត្រី​ជំនាញ​និយាយ​ថា ដោយ​សារ​តែ​កម្ពុជា​មិន​មាន​រោងច្រ​កែច្នៃ​កៅស៊ូ​ក្នុង​ស្រុក​សម្រាប់​នាំ​ចេញ។

បើ​តាម​តួលេខ​ពី​ក្រសួង ពាណិជ្ជកម្ម ការ​នាំ​ចេញ​កៅស៊ូ​ធម្មជាតិ​សរុប​ក្នុង​ត្រីមាស ទី១ ឆ្នាំ​នេះ​កើន ២៦ ភាគរយ​ពី ១៥ ០១៨ តោន​ដល់ ១៩ ០៤១ តោន​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ ប៉ុន្តែ​ចំណូល​បាន​ពី​ការ​នាំ​ចេញ​បាន​ធ្លាក់​ចុះ ២៨ ភាគរយ។

លោក ហេង សារ៉ាត់ អគ្គ​នាយក​រង​អគ្គ​នាយកដ្ឋាន​កៅស៊ូ​បាន​ហៅ​ការ​បន្ត​ធ្លាក់​ថ្លៃ​នៃ​ជ័រ កៅស៊ូ​ក្នុង ឆ្នាំ​២០១៤ នេះ​ថា ជា​រឿង «គួរ​ឲ្យ​ភ្ញាក់​ផ្អើល»។ លោក​ថ្លែង​ថា៖ «កាល​ពី​ដើម ឆ្នាំ​២០១៣ តម្លៃ​កៅស៊ូ​ថ្លៃ​ប្រហែល ២ ៨០០ ដុល្លារ​តែ​មក​ដល់​ដើម​ឆ្នាំ​ថ្មី​នេះ​ថ្លៃ​ធ្លាក់​នៅ​ជាង ១ ៩០០ ដុល្លារ»។

លោក​មិន​អាច​ព្យាករ​ថា តម្លៃ​នឹង​បន្ត​ធ្លាក់​រហូត​ដល់​ពេល​ណា​នោះ​ទេ ដោយ​សារ​ផលិតផល​កៅស៊ូ កម្ពុជា អាស្រ័យ​លើ​តម្រូវ​ការ និង​តម្លៃ​ទីផ្សារ​ពិភពលោក។ លោក​ថ្លែង​ថា៖ «វា​ពិបាក​ថា​ណាស់។ កៅស៊ូ​យើង​ពឹង​លើ​ទីផ្សារ​សកល។ ការ​ប្រែ​ប្រួល​តម្រូវ​ការ​ផលិតផល​កៅស៊ូ​ក្នុង​ទីផ្សារ​នឹង​ធ្វើ​ឲ្យ​តម្លៃ​កៅស៊ូ​យើង​ប្រែ​ប្រួល»។

លោក​បាន​ផ្សារ​ភ្ជាប់​ការ​ធ្លាក់​ថ្លៃ​នេះ​ទៅ​នឹង​ការ​ថយ​ចុះ​នៃ​ឧស្សាហកម្ម​សម្បក​កង់​នៅ ចិន ហើយ​ថា ការ​មាន​រោងចក្រ​កែច្នៃ​កៅស៊ូ​ក្នុង​ស្រុក​នឹង​ធ្វើ​ឲ្យ កម្ពុជា អាច​មាន​ផលិតភាព​ម្ចាស់​ការ​លើ​ការ​កំណត់​តម្លៃ​ប្រសើរ​ជាង​មុន។

ទោះ​ជា​យ៉ាង​ណា អ្នក​នៅ​ក្នុង​ឧស្សាហកម្ម​កៅស៊ូ​និយាយ​ថា ផលិតភាព​កៅស៊ូ​ធម្មជាតិ​កម្ពុជា​នៅ​មិន​ទាន់​មាន​សក្តានុពល​ពេញ​លេញ​សម្រាប់​ទាក់​ទាញ​អ្នក​វិនិយោគ​លើ​ការ​កែច្នៃ​កៅស៊ូ​ជា​ផលិត​ផល​សម្រេច​នៅ​ឡើយ​ទេ។

លោក ម៉ែន សុភ័ក្រ អគ្គ​នាយក​រង​ចម្ការ​កៅស៊ូ ជុប ជា​ក្រុមហ៊ុន​នាំ​ចេញ​កៅស៊ូ​ធំ​មួយ​នៅ​កម្ពុជា​បាន​ឲ្យ​ដឹង​កាល​ពី ខែ​មេសា ថា អ្នក​វិនិយោគ​នឹង​ពិចារណា​បោះ​ទុន​លើ​រោងចក្រ​កែច្នៃ​កៅស៊ូ​នៅ​ពេល​ដែល កម្ពុជា អាច​ផ្គត់ផ្គង់​វត្ថុ​ធាតុ​ដើម​គ្រប់​គ្រាន់។ លោក​បន្ត​ថា៖ «នៅ​ពេល​ដែល​កៅស៊ូ​យើង​ដាំ​បាន​ដល់ ៤០ ម៉ឺន​តោន​ខ្ញុំ​ជឿ​ថា ដល់​ពេល​នោះ​នឹង​មាន​រោងចក្រ​កែច្នៃ​កៅស៊ូ​ទៅ​ជា​ផលិត​ផល​សម្រេច​នឹង​ចាប់​អារម្មណ៍​វិនិយោគ​ដោយ​ការ​ផ្គត់​ផ្គង់​វត្ថុ​ធាតុ​ដើម​មាន​គ្រប់​គ្រាន់។ ក្រុមហ៊ុន​វិនិយោគ​នឹង​មិន​ព្រួយ​បារម្ភ​អំពី​ការ​ផ្គត់​ផ្គង់​តែ​នៅ​ពេល​ឥឡូវ​នេះ​ប្រហែល​មិន​ទាន់​គ្រប់​ទេ»។

លោក​និយាយ​សំដៅ​ដល់ ឆ្នាំ​២០២០ ជា​ពេល​ដែល​ត្រូវ​គេ​បាន​គេ​ព្យាករ​ថា​ផ្ទៃ​ដី​ដាំ​ដុះ​កៅស៊ូ​នឹង​កើន​ដល់ ៤៥ ម៉ឺន​ហិកតា​ដែល​ផ្តល់​ទិន្នផល​កៅស៊ូ​ប្រមាណ ៤០ ម៉ឺន​តោន​ក្នុង​មួយ​ឆ្នាំ។

លោក ស្រី ចន្ធី អ្នក​វិភាគ​សេដ្ឋកិច្ច​ឯករាជ្យ​ពន្យល់​ថា ចំនួន​នាំ​ចេញ​ដែល​កើន​ឡើង​ខណៈ​តម្លៃ​កំពុង​ធ្លាក់​ចុះ​គឺ​ដោយ​សារ​តែ​កង្វះ​ហេដ្ឋា​រចនា​សម្ព័ន្ធ​មូលដ្ឋាន​ក្នុង​ការ​ថែរក្សា និង​ស្តុក​ទុក​ទិន្នផល​ដែល​បាន​ប្រមូល​រួច​ហើយ។

លោក​បន្ត​ថា៖ «ជា​ធម្មតា​តម្លៃ​ធ្លាក់​ចុះ​ស្មើ​នឹង​ការ​ធ្លាក់​ចុះ​នៃ​តម្រូវការ​ដែរ ប៉ុន្តែ​ហេតុ​អ្វី ចំនួន​នៃ​ការ​នាំ​ចេញ កើន​ឡើង​គឺ​ដោយ​សារ​តែ កម្ពុជា មិន​មាន​រោងចក្រ​កែច្នៃ​ឬ​ឃ្លាំង​ដើម្បី​ស្ដុក​ទុក​កៅស៊ូ​ដែល​ប្រមូល​ផល​បាន​ហើយ​កសិករ​ត្រូវ​ការ​ប្រាក់​ដើម្បី​សង​ធនាគារ​ដូច​នេះ ចង់​មិន​ចង់ ពួក​គេ​ត្រូវ​បង្ខំ​លក់​ចេញ​បើ​ទោះ​ជា​លក់​ក្នុង​តម្លៃ​ទាប​ក៏​ដោយ»។ ប៉ុន្តែ​លោក​អះអាង​ថា កម្ពុជា​មិន​ទំនង​ជា​នឹង​អាច​ទាក់ទាញ​វិនិយោគិន​បាន​ទេ​បើ​ធៀប​នឹង​បណ្ដា​ប្រទេស​នៅ​ក្នុង​តំបន់៖ «បើ​ទោះ​បី​សមាហរណកម្ម​សេដ្ឋកិច្ច​អាស៊ាន​នឹង​បើក​ចំហ​លំហូរ​ទំនិញ និង​ពលករ​ក៏​ដោយ ក៏​ជប៉ុន ឬ​ចិន មិន​មាន​ហេតុ​ផល​ចាប់​អារម្មណ៍​បង្កើត​រោងចក្រ​កែច្នៃ​នៅ​កម្ពុជា​ឡើយ​បើ​កម្មករ​យើង​មិន​មាន​ជំនាញ។ ពួក​គេ​នឹង​មិន​ចង់​ផ្លាស់​ពី វៀតណាម ឬ ថៃ ដែល​កម្លាំង​កម្មករ​គេ​មាន​ជំនាញ​ស្រាប់​ទេ»៕ PB

អត្ថបទគួរចាប់អារម្មណ៍