ភ្នំពេញៈ គិតមកដល់ថ្ងៃនេះតម្លៃកៅស៊ូបានធ្លាក់ចុះគួរឲ្យកត់សម្គាល់បើប្រៀបធៀបកាលពីបីខែមុន ស្របពេលតម្លៃនៅទីផ្សារអន្តរជាតិនៅតែបន្តធ្លាក់ចុះ។
លោក ហេង ស្រេង នាយកក្រុមហ៊ុនចម្ការកៅស៊ូ បឹងកេត នៅខេត្ត កំពង់ចាមបានឲ្យដឹងថា តម្លៃកៅស៊ូបានធ្លាក់ចុះយ៉ាងខ្លាំងពោលគឺធ្លាក់ចុះពី ៣១០០ ដុល្លារ ក្នុងមួយតោន (សម្រាប់គុណភាពលេខមួយ) កាលពីដើមខែមីនាឆ្នាំនេះ មកនៅត្រឹម ២ ១០០ ដុល្លារក្នុងមួយតោនគិតត្រឹមថ្ងៃទី៣០ កក្កដា។ លោកអះអាងថា៖«តម្លៃមានការធ្លាក់ចុះគួរឲ្យកត់សម្គាល់។ វាមិនទាន់ជាបញ្ហាធំនៅឡើយ តែប្រសិនបើវានៅបន្តធ្លាក់ចុះជាងនេះទៀតឬ អាចធ្លាក់ក្រោមពីរពាន់ដុល្លារក្នុងមួយតោន វានឹងប៉ះពាល់ខ្លាំង»។
លោក ម៉ែន សុភ័ក្រ អគ្គនាយករងចម្ការកៅស៊ូ ជប់ ជាក្រុមហ៊ុននាំចេញកៅស៊ូធំមួយនៅកម្ពុជា លើកឡើងថា តម្លៃកៅស៊ូនាំចេញកាលពីថ្ងៃម្សិលមិញបានធ្លាក់ចុះគួរឲ្យកត់សម្គាល់ តែការនាំចេញក្នុងអំឡុងរយៈពេល ៦ ខែដំបូងឆ្នាំនេះនៅបន្តកើនឡើង បើធៀបទៅកាលពី ៦ខែដំបូងឆ្នាំមុន។ លោកមិនបានបញ្ជាក់ពីតួលេខជាក់ស្តែងក្នុងការនាំចេញក្នុងអំឡុង ពេល ៦ ខែនេះនោះទេ។
លោកបន្តថា៖ «ការធ្លាក់ចុះនេះកំពុងប៉ះពាល់ដល់ផលិតភាពប្រកួតប្រជែង ក្នុងការនាំចេញ ហើយនឹងធ្វើឲ្យប្រាក់ចំណេញថយចុះ ព្រោះថ្លៃដើមផលិតនៅខ្ពស់»។
ទីភ្នាក់ងារ Reuters បានរាយការណ៍កាលពីម្សិលមិញថា តម្លៃកៅស៊ូនៅទីផ្សារបណ្តាប្រទេសអាស៊ាន បានធ្លាក់ចុះដោយសារការផ្គត់ផ្គង់ច្រើនជាងតម្រូវការហើយស្របពេលជាមួយគ្នា ថៃដែលជាប្រទេសផ្គត់ផ្គង់កៅស៊ូសំខាន់មួយក្នុងតំបន់ ត្រៀមបញ្ចេញកៅស៊ូក្នុងស្តុកនៅចុងឆ្នាំនេះដែរ។
លោក Stephen V. Evans អគ្គនាយកទូទៅវិទ្យាស្ថានសិក្សា និងស្រាវជ្រាវពីផលិតកម្មកៅស៊ូ (IRSG) ដែលមានទីស្នាក់ការនៅប្រទេស សិង្ហបុរី បានប្រាប់ភ្នំពេញ ប៉ុស្តិ៍ តាមរយៈសារអេឡិចត្រូនិកថា ដោយសារកម្ពុជាមិនទាន់មានរោងចក្រកែច្នៃផលិតផលចេញពីកៅស៊ូ ផលិតកម្មកៅស៊ូនៅកម្ពុជាទាំងស្រុងពឹងអាស្រ័យតែលើការនាំចេញប៉ុណ្ណោះ។ ដូច្នេះតម្លៃកៅស៊ូ និង ការផ្គត់ផ្គង់ពឹងអាស្រ័យទាំងស្រុងលើស្ថានភាព តម្រូវការលើទីផ្សារអន្តរជាតិ។
លោកបន្តថា៖ «ក្នុងករណីនេះ ការផ្គត់ផ្គង់លើសនៅលើទីផ្សារពិភពលោកមានឥទ្ធិពលយ៉ាងខ្លាំងដល់តម្លៃកៅស៊ូបើយើងប្រៀបធៀបតម្លៃនាពេលនេះទៅកាលពីដើមឆ្នាំ២០១៣។
តាមទិន្នន័យពី (IRSG) ក្នុងអំឡុងរយៈពេល ៦ ខែដំបូងឆ្នាំនេះកម្ពុជានាំចេញកៅស៊ូសរុប ៣៧ ៣០០ តោន កើន ៦២ ភាគរយបើធៀបរយៈពេលដូចគ្នាពីឆ្នាំមុន មាន ២៣ ០០០ តោន៕
