The Phnom Penh Post Search

Search form




Logo of Phnom Penh Post newspaper Phnom Penh Post - តម្លៃ​គ្រាប់​ស្វាយចន្ទី​នៅតែ​ពឹង​លើ​ប្រទេស​ជិត​ខាង

តម្លៃ​គ្រាប់​ស្វាយចន្ទី​នៅតែ​ពឹង​លើ​ប្រទេស​ជិត​ខាង

តម្លៃ​គ្រាប់​ស្វាយចន្ទី​នៅតែ​ពឹង​លើ​ប្រទេស​ជិត​ខាង

20140310_12
ស្ងោរគ្រាប់ចន្ទីមុនកែច្នៃជាផលិតផលសម្រេចនៅសហគមន៍មួយក្នុងខេត្តកំពង់ធំ

កំពង់ធំៈ កសិករ​ខេត្ត​កំពង់ធំ​សម្តែង​ការ​ព្រួយបារម្ភ​ពី​ភាព​មិន​ប្រាកដប្រជា​នៃ​ទីផ្សារ​និង​តម្លៃ​គ្រាប់​ស្វាយចន្ទី ខណៈ​ការ​ប្រមូល​ផល​ឆ្នាំ​នេះ​អាច​នឹង​កើនឡើង​។

អ្នក​ជំនាញ​និយាយ​ថា ភាព​មិន​ប្រាកដប្រជា​នៃ​ទីផ្សារ និង​តម្លៃ​បណ្តាល​មកពី​ការ​ពឹងផ្អែក​ទៅលើ​ទីផ្សារ​ក្រៅ​ស្រុក​។

របាយការណ៍​ក្រសួង​ពាណិជ្ជកម្ម​បង្ហាញ​ថា កម្ពុជា​នាំ​ចេញ​គ្រាប់​ស្វាយចន្ទី​ក្នុង​ឆ្នាំ​២០១៣​សរុប​ចំនួន ៧៩៦ តោន​ឬ តម្លៃ ២៧៩ ៣០០ ដុល្លារ ធ្លាក់​ចុះ​៨៣ ភាគរយ​ធៀប​នឹង​ឆ្នាំ​២០១២ ដែល​មាន​ចំនួន ៤ ៤២៥​តោន ឬ តម្លៃ ៣ ៤១២ ៥០០ ដុល្លារ​។

លោក ពូ សុវណ្ណ ប្រធាន​អង្គការ​ស្រែ​ខ្មែរ ជា​អង្គការ​ស្រាវជ្រាវ​ពី​ដំណាំ​ស្វាយចន្ទី ពន្យល់​ថា ការ​ធ្លាក់​ចុះ​ទាំង​បរិមាណ​នាំ​ចេញ និង​តម្លៃ​គ្រាប់​ស្វាយ​ចន្ទី​ក្នុង​ឆ្នាំ​២០១៣ បណ្តាល​មកពី​ការ ធ្លាក់​ចុះ​តម្រូវការ​ពី​ប្រទេស​វៀតណាម និង​ថៃ ដែល​ជា​ឈ្មួញ​សំខាន់​សម្រាប់​ទីផ្សារ​គ្រាប់​ស្វាយចន្ទី​កម្ពុជា​។ លោក​ថា​៖ «​ពេល​នឹង​វា​អត់​មាន​ទីផ្សារ​។ ទាល់​តែ​ទីផ្សារ​ទាំង​ពីរ​នេះ​មាន​ហាងឆេង​ទើប​ទិន្នន័យ​នាំ​ចេញ​យើង កើនឡើង ព្រោះ​យើង​ពឹង​តែ​លើ​ប្រទេស​ពីរ​នេះ​ទេ​។ យើង​មិន​អាច​កំណត់​បាន​ទេ​»។

លោក​បន្ត​ថា​៖​«​កាលពី​ឆ្នាំ​២០១២​នោះ​ស្វាយចន្ទី​មាន​ហាងឆេង ពេល​នោះ​ឈ្មួញ​មក​ទិញ​ដល់​ខេត្ត​តែ​ម្តង ក្នុង​តម្លៃ​ខ្ពស់​»​។

អ្នកស្រី ថន រ៉េន កសិករ​ដំណាំ​ស្វាយចន្ទី​នៅក្នុង​ស្រុក កំពង់ស្វាយ ខេត្ត​កំពង់ធំ​រំពឹង​ថា ទិន្នផល​គ្រាប់​ស្វាយចន្ទី​នៅ​រដូវ​នេះ​នឹង​កើន​លើស​ឆ្នាំ​មុន តែ​និយាយ​ថា តម្លៃ​មាន​ការ​ធ្លាក់​ចុះ​។ អ្នកស្រី​និយាយ​ថា​៖ «​តម្លៃ​ឡើង​ចុះៗ​រហូត​។ ឆ្នាំ​នេះ​ធ្លាក់​មក​នៅ ៣ ៦០០ រៀល​ក្នុង​មួយ​គីឡូ​។ កាល​ឆ្នាំ​មុន​លក់​បាន​៤ ០០០​រៀល​»។

អ្នកស្រី បន្ថែម​ថា ការ​ដាំដុះ​ជា​លក្ខណៈ​ធម្មជាតិ​រឹត​តែ​ធ្វើឲ្យ​កសិករ​ពិបាក​រក​ចំណូល​។ អ្នកស្រី​ថា​៖«​យើង​ដាំ​មិន​ដាក់​ជី​គីមី​ដូច​គេ អ៊ីចឹង​រដូវ​ខ្លះ​ផ្លែ​ច្រើន រដូវ​ខ្លះ​ផ្លែ​តិច មិន​ទៀងទាត់ រឹត​តែ​ពិបាក​សម្រាប់​អ្នក​ដាំ​ពេល​គេ​ឲ្យ​ថ្លៃ​ថោក​»​។

លោក ជា ពិសិដ្ឋ ប្រធាន​សមាគម​ចន្ទី​សរីរាង្គ​បាន​ឲ្យ​ដឹង​ថា តម្លៃ​ស្វាយ​ចន្ទី​បាន​ឡើង​បន្តិច​ហើយ បើ​ធៀប​កាលពី​ប៉ុន្មាន​ឆ្នាំ​មុន​ពេល​ដែល​សមាគម​ត្រូវ​បង្កើត​ឡើង។ លោក​ថា​ពី​មុន​ឈ្មួញ​វៀតណាម​ឲ្យ​តម្លៃ​ត្រឹម ១២០០​ទៅ​១ ៨០០​រៀល​ប៉ុណ្ណោះ​។

បច្ចុប្បន្ន សមាគម​បាន​ព្យាយាម​កែច្នៃ​ស្វាយចន្ទី​ជា​ផលិតផល​សម្រេច​ផ្គត់ផ្គង់ ទៅ​ទីផ្សារ​ក្នុង​ស្រុក ក៏​ដូចជា​នាំ​ចេញ​។

លោក​បន្ត​ថា​៖«​ក្រៅពី​ឈ្មួញ​វៀតណាម មាន​អ្នក​មក​ទិញ​ពី​ក្រៅ​ស្រុក ដូចជា ចិន និង​ឥណ្ឌា គេ​ឲ្យ​តម្លៃ​ថោក​ពេក ថោក​ជាង​យើង​បោះ​ឲ្យ​អ្នក​ក្នុង​ស្រុក ដូច្នេះ​យើង​មិន​អាច​លក់​បាន ព្រោះ​បើ​គិត​ពី​កម្លាំង​ពលកម្ម និង​ពេលវេលា ដែល​ចំណាយ​ក្នុង​ការ​សម្ងួត និង​លីង​គ្រាប់​ស្វាយចន្ទី​នោះ យើង​មិន​អាច​ចំណេញ​»​។

គ្រាប់​ស្វាយចន្ទី​ដែល​កែច្នៃ​រួច​ត្រូវ​បាន​លក់​ទៅ​ទីផ្សារ​ក្នុង​ស្រុក​ក្នុង​តម្លៃ​ពី​៩ ទៅ​១២​ដុល្លារ​ក្នុង​មួយ​គីឡូ​។

តួលេខ​ពី​មន្ទីរ​កសិកម្ម​ខេត្ត​កំពង់ធំ បាន​ឲ្យ​ដឹង​ថា ផ្ទៃដី​ដាំដុះ​ស្វាយចន្ទី​សរុប​ទូទាំង​ខេត្ត​គិត​ត្រឹម​ឆ្នាំ​២០១៣​នេះ មាន​ចំនួន​២៣ ៤០០​ហិកតា ហើយ​ទិន្នផល​ជា​មធ្យម​ក្នុង​មួយ​ហិកតា​មាន​ចន្លោះ​ពី ២ ទៅ​៣ តោន​អាស្រ័យ​ទៅ​តាម​ប្រភេទ​ពូជ​ដើម​ស្វាយចន្ទី។

គ្រាប់​ស្វាយចន្ទី​មិន ទាន់​កែច្នៃ​ត្រូវ​បាន​នាំ​ចេញ​ទៅ​កាន់​ប្រទេស​វៀតណាម និង​ថៃ។ របាយការណ៍​ស្តី​ពី​សក្តានុពល​ដំណាំ​ស្វាយចន្ទី​នៅ​កម្ពុជា ចេញ​ដោយ IFC កាលពី​ឆ្នាំ​២០១០ សរសេរ​ថា ការ​កែច្នៃ​គ្រាប់​ស្វាយចន្ទី​មុន​នឹង​នាំ​ចេញ​និង​បង្កើន​ចំណូល​ជា តម្លៃ​បន្ថែម​ដល់​មុខ​ទំនិញ​នេះ​រហូត​ដល់​៣០​ទៅ​៤០​លាន​ដុល្លារ​ក្នុង​មួយ ឆ្នាំៗ​ផ្អែកលើ​ទំហំ​ផលិតកម្ម​នា​ពេល​បច្ចុប្បន្ន​៕

អត្ថបទគួរចាប់អារម្មណ៍