ភ្នំពេញៈ ប្រជាជននៅភ្នំពេញបានផ្អើលទិញអង្ករ មីកញ្ចាប់ គ្រឿងឧបភោគបរិភោគផ្សេងៗដែលអាចទុកបានយូរនាល្ងាចថ្ងៃអាទិត្យជាថ្ងៃបោះឆ្នោតថ្នាក់ជាតិរបស់កម្ពុជាបន្ទាប់ពីសេចក្តីរាយការណ៍ជាបន្តបន្ទាប់ក្រៅផ្លូវការថា គណបក្សសង្គ្រោះជាតិកំពុងនាំមុខគណបក្សប្រជាជនកម្ពុជា។
ប៉ុន្តែស្ថានភាពនេះបានវិលត្រឡប់មករកស្ថានភាពធម្មតាវិញហើយបន្ទាប់ពីការប្រកាសលទ្ធផលបណ្តោះអាសន្នរបស់គ ជ ប ដែលបានបង្ហាញថា គណបក្សប្រជាជននៅតែឈ្នះការបោះឆ្នោតស្របពេលលទ្ធផលបណ្តោះអាសន្នរបស់គណបក្សប្រជាជនកម្ពុជាបង្ហាញថា គណបក្សប្រជាជនកម្ពុជាទទួល៦៨អាសនៈ និងគណប្សសង្គ្រោះជាតិទទួលបាន៥៥អាសនៈ។
ចាប់ពីព្រឹកម្សិលមិញតម្រូវការនិងតម្លៃទំនិញសំខាន់ៗសម្រាប់ហូបចុកនិងប្រើប្រាស់ប្រចាំថ្ងៃមានស្ថិរភាពជាធម្មតាវិញ។
អ្នកស្រីហង់ សាវ៉ន ម្ចាស់ហាងលក់អង្ករម្នាក់នៅភ្នំពេញ បានប្រាប់ភ្នំពេញប៉ុស្តិ៍ថា មានប្រជាជនច្រើនគួរសមបានមករកទិញអង្ករក្នុងសភាពប្រញាប់ប្រញាល់កាលពីល្ងាចថ្ងៃអាទិត្យ។ គិតត្រឹមតែប្រហែលពីរម៉ោងគាត់បានលក់អង្ករចេញបានប្រហែល២០បាវ (ប្រហែល១តោន)។ តែសកម្មភាពនេះក៏បានថមថយទៅវិញ ហើយគិតចាប់ពីព្រឹកម្សិលមិញមកដំណើរការទិញលក់ មានសភាពធម្មតាវិញ។
អ្នកស្រីបញ្ជាក់ថា៖«ចាប់ពីព្រឹកមកអ្វីៗដំណើរការធម្មតា ហើយឥឡូវទាំងតម្រូវការទាំងតម្លៃមានដូចកាលពីមុនវិញលែងមានឡើងចុះខ្លាំងអីទៀតហើយ»។
អាជីវករលក់ត្រីឆ្អើរម្នាក់ក្នុងផ្សារអូរឫស្សីឈ្មោះសំ ឆាយ បានឲ្យដឹងថា គាត់ក៏បានទទួលពត៌មានពីការផ្អើលទិញ អង្ករ មីឬទំនិញផ្សេងៗកាលពីថ្ងៃអាទិត្យដែរតែអ្វីៗបានត្រឡប់មករកភាពប្រក្រតីឡើងវិញតាំងពីព្រឹកម្សិលមិញ។ អ្នកស្រីបានលើកឡើងថាការផ្អើលទិញទំនិញក្នុងចំណោមប្រជាជនតាមតំបន់ខ្លះនោះប្រហែលអាចមកពីពួកគាត់មានការព្រួយបារម្ភពីការប្រែប្រួលស្ថានភាពនយោបាយពេលលទ្ធផលបោះឆ្នោតត្រូវបានប្រកាស។
កាលពីល្ងាចថ្ងៃអាទិត្យ កម្លាំងប្រដាប់អាវុធ ត្រូវបានដាក់ពង្រាយតាមផ្លូវនានាក្បែរភូមិគ្រឹះលោកនាយករដ្ឋមន្ត្រីហ៊ុន សែន និងទីស្នាក់ការគណបក្សប្រជាជន។
មានប្រជាពលរដ្ឋនៅភ្នំពេញមួយចំនួនរត់ទៅទិញម្ហូបអាហារដកប្រាក់ពីម៉ាស៊ីន អេធីអឹមខណៈដែលអ្នកខ្លះទៀតបានយករថយន្តនិងម៉ូតូសម្រុកទៅចាក់សាំងទុក។
លោក ខេង ទីតូ អ្នកនាំពាក្យកងរាជអាវុធហត្ថបានថ្លែងប្រាប់ភ្នំពេញប៉ុស្តិ៍កាលពីថ្ងៃអាទិត្យថាវាជារឿងធម្មតាសម្រាប់កងប្រដាប់អាវុធក្នុងការការពារសន្តិសុខក្រោយការបោះឆ្នោត។ លោកបន្តថា៖«យើងបានដាក់ពង្រាយកងប្រដាប់អាវុធដើម្បីការពារសន្តិសុខក្រោយបោះឆ្នោត។ យើងនឹងដកកងកម្លាំងប្រដាប់អាវុធកាលណាយើងទទួលបានបញ្ជា»។
កាលពីម្សិលមិញ តម្លៃទំនិញម្ហូបអាហារសំខាន់ៗដូចជា អង្ករ មីកញ្ចប់ ត្រីងៀត ជាដើមមានតម្លៃធម្មតាវិញហើយខណៈតម្រូវការក៏មានសភាពប្រក្រតីដែរ។
អ្នកស្រីអៀរ ណៃ ម្ចាស់តូបលក់ទំនិញម្នាក់ទៀតនៅក្នុងផ្សារអូរឫស្សីបាននិយាយថា បន្ទាប់ពីមានព័ត៌មានថាមានការផ្អើលទិញអង្ករ មី ហើយធ្វើឲ្យថ្លៃទំនិញកើនឡើងគិតចាប់ពីព្រឹកម្សិលមិញមក ស្ថានភាពទីផ្សារមិនមានអ្វីជាការព្រួយបារម្ភនោះទេ។ អ្នកស្រីបន្តថា៖ «វាដំណើរធម្មតាលែងមានផ្អើលទៀតហើយ»។
លទ្ធផលបោះឆ្នោតបណ្តោះអាសន្នរបស់គណបក្សប្រជាជនកម្ពុជាបានបង្ហាញថាគណបក្សប្រជាជនទទួលបានអាសនៈចំនួន៦៨អាសនៈ ខណៈគណបក្សសង្គ្រោះជាតិដែលជាគូប្រជែង បានអាសនៈចំនួន៥៥ អាសនៈ ប៉ុន្តែគណបក្សសង្គ្រោះជាតិកាលពីថ្ងៃចន្ទបានប្រកាសមិនទទួលស្គាល់លទ្ធផលនេះ៕
