ភ្នំពេញៈ ការរៀបចំពិធីបុណ្យឆ្លងឆ្នាំនៅបណ្តាខេត្ត មានការចូលរួមពីភ្ញៀវជាតិនិងអន្តរជាតិច្រើនកុះករជាងឆ្នាំមុន។ នេះបើតាមការឲ្យដឹងពីមន្រ្តីទេសចរណ៍ខេត្ត។
លោក ឆឺយ ឆន អនុប្រធានមន្ទីរទេសចរណ៍ខេត្តសៀមរាប បានឲ្យដឹងកាលពីម្សិលមិញថាចាប់តាំងពីថ្ងៃទី៣០រហូតដល់ថ្ងៃម្សិលមិញ ខេត្តសៀមរាបបានទទួលភ្ញៀវសរុបជាង១០ម៉ឺននាក់កើន១៥,២០ភាគរយធៀបរយៈពេលបុណ្យឆ្លងឆ្នាំដូចគ្នាកាលពីឆ្នាំ២០១៣។
ក្នុងនោះភ្ញៀវជាតិសរុបមាន៧៣ ០០០នាក់ កើន១៧,៧៤ភាគរយ ខណៈភ្ញៀវបរទេសសរុបមាន២៧ ៤០០នាក់ កើនពីឆ្នាំ២០១៣ ចំនួន៩ភាគរយ។ លោកថ្លែងថា៖«ការរៀបចំឆ្នាំនេះបានល្អ។ ផាប់ស្ទ្រីត ផ្សាររាត្រី និងកន្លែងប្រគំតន្ត្រីប្រមូលផ្តុំទៅដោយភ្ញៀវ»។
ខេត្តព្រះសីហនុដែលល្បីដោយសារឆ្នេរសមុទ្រស្អាតនោះ ក៏ទទួលបានភ្ញៀវប្រមាណ១១ម៉ឺននាក់ផងដែរក្នុងរយៈពេលបីថ្ងៃនៃពិធីបុណ្យឆ្លងឆ្នាំនេះ។
លោក នូ សុផល ប្រធានមន្ទីរទេសចរណ៍ខេត្តព្រះសីហនុ បានឲ្យដឹងថា ខណៈការរំពឹងទុកថាមានភ្ញៀវប្រមាណតែ៧ម៉ឺននាក់ប៉ុណ្ណោះ ដែលចូលរួម តែតួលេខបានកើនដល់១១ម៉ឺននាក់នៅយប់ឆ្លងឆ្នាំតែម្តង។
លោកបន្តថា៖ «តួលេខភ្ញៀវកើនដល់១១ម៉ឺននាក់ ភាគច្រើនជាភ្ញៀវជាតិដែលមកចូលរួមទស្សនាការបាញ់កាំជ្រួច និងការប្រគំតន្ត្រីនៅឆ្នេរអូរឈើទាល»។ លោកបន្តថា ការរៀបចំឆ្នាំនេះមានលក្ខណៈប្រសើរនិងទទួលបានជោគជ័យជាងនៅក្នុងឆ្នាំមុន។
ជាមួយនឹងការព្យាយាមក្នុងការទាក់ទាញភ្ញៀវទេសចរបរទេស ខេត្តបាត់ដំបងដែលជាទិសដៅទេសចរណ៍កំពុងរីកចម្រើនដោយសារអគារបេតិកភ័ណបន្សល់ទុកពីសម័យអាណានិគមនិយមបារាំង បានបង្កើតហាងតាមដងផ្លូវសាធារណៈនិងផ្សាររាត្រីជាដើម។
ជាការប្រារព្ធពិធីចូលឆ្នាំសកលលើកដំបូង ខេត្តនេះបានមើលឃើញមនុស្សជាច្រើនគួរឲ្យកត់សម្គាល់ចូលរួមពិធីបុណ្យនេះ។ នេះបើតាមលោក អ៊ុច ឱមធីនី សារ៉ា ប្រធានមន្ទីរទេសចរណ៍ខេត្តបាត់ដំបង។ លោកបន្តថា៖ «យើងប្រារព្ធពិធីនេះជាលើកដំបូងជាមួយការប៉ាន់ប្រមាណថា នឹងមានអ្នកចូលរួមប្រហែល៣០ ០០០នាក់នៅក្នុងរាត្រីមុនបុណ្យចូលឆ្នាំសកលនេះ»។
លោកថ្លែងថា ខណៈភាគច្រើននៃអ្នកមកចូលរួមគឺជាភ្ញៀវទេសចរក្នុងស្រុក ៣០ភាគរយគឺជាភ្ញៀវទេសចរបរទេសមកពីខេត្តសៀមរាប និងប្រទេសថៃ។ លោកបន្ថែមថា ខេត្តនេះនឹងប្រារព្ធពិធីនេះកាន់តែធំនៅឆ្នាំក្រោយដើម្បីក្លាយជាទិសដៅទេសចរណ៍បន្ទាប់ពីខេត្តសៀមរាប និងខេត្តព្រះសីហនុ៕PB
