.jpg)
ផ្ទាំងផ្សាយពាណិជ្ជកម្មភាពយន្តហូលីវូដនៅរោងភាពយន្តមួយក្នុងទីក្រុងប៉េកាំង។ រូបថត AFP
ក្រុងប៉េកាំងៈ ប្រទេសចិនអាចនឹងសម្លឹងមើលហួសពីការដកហូតពន្ធសងសឹកទៅវិញទៅមកនៅក្នុងសង្គ្រាមពាណិជ្ជកម្មដែលកំពុងឡើងកម្តៅជាមួយសហរដ្ឋអាមេរិកជាមួយនឹងជម្រើសថ្មីៗជាច្រើននៅក្នុងដៃរបស់ខ្លួនរួមទាំងផ្ដោតទិសដៅលើខ្សែភាពយន្តហូលីវូដ ឬឈប់លូកដៃចូលក្នុងវិបត្តិកូរ៉េខាងជើង។ នេះបើតាមការលើកឡើងរបស់ក្រុមអ្នកវិភាគ។
ភាពភ័យខ្លាចនៃការកើតមានសង្គ្រាមពាណិជ្ជកម្មដ៏ធ្ងន់ធ្ងរមួយរវាងសហរដ្ឋអាមេរិក និងចិនកំពុងកើនឡើង បន្ទាប់ពីប្រធានាធិបតីអាមេរិកលោក ដូណាល់ ត្រាំ បាននិយាយថានឹងដំឡើងការដកហូតពន្ធលើទំនិញរបស់ចិនដែលមានតម្លៃរហូតដល់ ៤៥០ ពាន់លានដុល្លារដែលស្ទើរតែការនាំចេញទំនិញទាំងអស់របស់ចិនទៅកាន់សហរដ្ឋអាមេរិក។
ទីក្រុងប៉េកាំងបានឆ្លើយតបភ្លាមៗដោយបានហៅការគំរាមរបស់លោក ត្រាំ ថាជា «ការគំរាមយកផលប្រយោជន៍» និងបានព្រមានថាខ្លួនអាចនឹងឆ្លើយតបវិញជាមួយនឹង «វិធានការឆ្លើយតបដ៏ខ្លាំងក្លាដែលរួមមានទាំងវិធានការលើបរិមាណ និងគុណភាព» ផងដែរ ។
ប៉ុន្តែជាមួយនឹងការនាំចូលដែលមានតម្លៃត្រឹមតែ ១៣០ ពាន់លានដុល្លារពីអាមេរិកកាលពីឆ្នាំមុន តើប្រទេសចិននឹងឆ្លើយតបវិញដោយរបៀបណា?
ហេតុអ្វីបានជាទីក្រុងប៉េកាំងសងសឹក?
លោក Yukon Huang សមាជិកជាន់ខ្ពស់នៃវិទ្យាស្ថាន Carnegie Endowment for Peace International ដែលបានពិភាក្សាអំពីភាពតានតឹងផ្នែកពាណិជ្ជកម្មជាមួយមន្ត្រីកំពូលៗរបស់ចិនបានថ្លែងថា៖ «ការសងសឹកត្រូវតែធ្វើឡើង។ ប្រសិនបើអ្នកមិនសងសឹកទេ នោះអ្នកនឹងខាតបង់កាន់តែច្រើនដូច្នេះហើយបានជាមានសង្គ្រាមពាណិជ្ជកម្ម»។
លោក Huang បានបន្ថែមថាប្រទេសដទៃទៀតបានរៀនសូត្រពីបទពិសោធរបស់ប្រទេសជប៉ុន ដោយលើកឡើងអំពីភាពតានតឹងផ្នែកពាណិជ្ជកម្មជាប្រវត្តិសាស្ត្ររបស់ប្រទេសមហាអំណាចអាស៊ីមួយនេះជាមួយសហរដ្ឋអាមេរិក ហើយភាពតានតឹងនេះបានស្ងប់ស្ងាត់មកវិញបន្ទាប់ពីទីក្រុងតូក្យូបានទទួលយកកូតានាំចេញទៅកាន់សហរដ្ឋអាមេរិកដែលបានកាត់បន្ថយពន្ធនាំចូលដែលបានអនុញ្ញាតឱ្យរូបិយប័ណ្ណរបស់ខ្លួនឡើងថ្លៃ។
ដោយសំដៅភាពមិនរីកចម្រើនរបស់ប្រទេសនេះក្នុងរយៈពេល ២ ទសវត្សរ៍ លោក Huang ថ្លែងថា៖ «ជប៉ុនបានខាតបង់រយៈពេល ២០ ឆ្នាំ។ អ្នកទាំង ២ [ប្រទេសទាំង ២] ខាតបង់ ប៉ុន្តែបើអ្នកមិនធ្វើបែបនេះទេ គឺមានតែអ្នកប៉ុណ្ណោះដែលខាត»។
ក្រៅពីយកពន្ធលើទំនិញនាំចូល តើចិនអាចឆ្លើយតបលើផលិតផលអាមេរិកតាមរបៀបណាទៀត?
ទូរស័ព្ទម៉ាក iPhone X រថយន្តម៉ាក Buick Excelle ហាងកាហ្វេ Starbucks និងសំបុត្រចូលទស្សនាភាពយន្តរបស់លោក Tom Cruise នារដូវក្តៅ ទំនិញទាំងអស់នេះគឺលក់ដាច់ខ្លាំងនៅក្នុងប្រទេសចិន។
ក្រុមអ្នកវិភាគឲ្យដឹងថា ទាំងអស់នោះអាចក្លាយជាប្រធានបទដែលត្រូវរឹតបន្តឹងប្រសិនបើភាពតានតឹងបន្តកើតឡើងនៅក្នុងសង្គ្រាមពាណិជ្ជកម្មជាមួយសហរដ្ឋអាមេរិកនោះ។
ទីក្រុងប៉េកាំងបានបង្ហាញទៅកាន់បណ្តាប្រទេសផ្សេងទៀតថា ខ្លួនអាចប្រើប្រាស់យុទ្ធវិធីជាច្រើន ដើម្បីឆ្លើយតបទៅនឹងការដាក់ទណ្ឌកម្មសេដ្ឋកិច្ច។
កាលពីឆ្នាំមុននៅពេលមានជម្លោះលើបញ្ហាភូមិសាស្ត្រនយោបាយជាមួយទីក្រុងសេអ៊ូលនោះ ភោជនីយដ្ឋានចំនួន ១២០ របស់ក្រុមហ៊ុន Lotte របស់ប្រទេសកូរ៉េខាងត្បូងក្នុងប្រទេសចិនត្រូវបានបិទទ្វារដោយសារ «បញ្ហាសុវត្ថិភាព» ដោយសារក្រុមបាតុករពោរពេញដោយការខឹងសម្បាបាននាំគ្នាទៅធ្វើការតវ៉ានៅពីមុខហាងទាំងនោះ។
ភ្ញៀវទេសចរជនជាតិចិនជាច្រើនដែលតែងតែពេញនិយមប្រើប្រាស់គ្រឿងសម្អាងរបស់កូរ៉េខាងត្បូង ពួកគេបានឈប់ធ្វើដំណើរទៅកាន់ទីក្រុងសេអ៊ូល ខណៈដែលទីក្រុងប៉េកាំងបានដាក់បម្រាមដល់ការធ្វើដំណើរទេសចរណ៍ជាក្រុម។
អាជីវកម្មរបស់សហរដ្ឋអាមេរិកមួយចំនួនបានរងផលប៉ះពាល់រួចទៅហើយ ដោយកាលពីខែមុន ចិនបាននិយាយថាខ្លួនបានបង្កើនការត្រួតពិនិត្យទំនិញនាំចូលសំខាន់ៗពីសហរដ្ឋអាមេរិកដែលមានដូចជាសាច់ជ្រូក និងរថយន្ត ដែលកំពុងជាប់គាំងនៅតាមកំពង់ផែមួយចំនួនដោយសារតែមាន «បញ្ហា» ជាច្រើន។
សេដ្ឋវិទូមួយរូបឈ្មោះ Andrew Polk បានថ្លែងក្នុងព្រឹត្តិបត្រព័ត៌មានមួយថា៖ «ចិននៅមានអាវុធជាច្រើនទៀតដើម្បីប្រើប្រាស់»។
តើទីក្រុងប៉េកាំងអាចបញ្ចប់កិច្ចសហការលើបញ្ហាកូរ៉េខាងជើងដែរឬទេ?
ក្រុមអ្នកវិភាគបានឲ្យដឹងថាការដាក់ទណ្ឌកម្មរបស់អង្គការសហប្រជាជាតិលើប្រទេសកូរ៉េខាងជើងគឺត្រូវបានយល់ព្រម និងអនុវត្តដោយទីក្រុងប៉េកាំង ដែលបាននាំទីក្រុងព្យុងយ៉ាងងាកមករកតុចរចា និងបានធ្វើឲ្យមានជំនួបកំពូលរវាងលោក ត្រាំ និងលោក គីម ជុងអ៊ុន កើតឡើងកាលពីដើមខែនេះនៅប្រទេសសិង្ហបុរី។
លោក Cheng Xiaohe សាស្ត្រាចារ្យផ្នែកទំនាក់ទំនងអន្តរជាតិនៅសាកលវិទ្យាល័យ Renmin University បានថ្លែងថាដើម្បីសម្រេចបាននូវការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើងលោក ដូណាល់ ត្រាំ ទំនងជាត្រូវការទីក្រុងប៉េកាំងឲ្យធ្វើការរួមគ្នាលើបញ្ហាទណ្ឌកម្មនេះ ប៉ុន្តែសង្គ្រាមពាណិជ្ជកម្មអាចផ្លាស់ប្តូរការគិតរបស់ចិន។
លោក Cheng ថា កិច្ចសហប្រតិបត្តិការរវាងចិន និងអាមេរិកលើបញ្ហាប្រទេសកូរ៉េខាងជើង «នឹងក្លាយជារឿងស្មុគស្មាញ និងលំបាកបំផុត»។
ក្នុងការបង្ហាញឥទ្ធិពលរបស់ចិនលើបញ្ហានេះលោក គីម បានទៅបំពេញទស្សនកិច្ចនៅទីក្រុងប៉េកាំងដែលធ្វើឡើងមួយសប្តាហ៍បន្ទាប់ពីកិច្ចប្រជុំកំពូល ដើម្បីជម្រាបលោក ស៊ី ជីនភីង អំពីកិច្ចប្រជុំកំពូលនេះ៕ NS
