បច្ចុប្បន្ន តម្លៃមាសស្ថិតនៅក្នុងទំនោរធ្លាក់ចុះ ដោយសារស្ថានភាពសេដ្ឋកិច្ចពិភពលោកមិនអនុញ្ញាតឱ្យមានតម្រូវការខ្ពស់លើមាស។ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល បានមើលឃើញថា មានមូលហេតុជាច្រើនទៀត ដែលភាគច្រើនពាក់ព័ន្ធនឹងស្ថានភាពសេដ្ឋកិច្ចមហាអំណាចសហរដ្ឋអាមេរិក ដែលធ្វើឱ្យតម្លៃមាសមានការធ្លាក់ចុះ។
ស្របជាមួយគ្នានេះ លោក សំណាង ក៏បានផ្ដល់ជាការប្រឹក្សាយោបល់ជួញដូរទៅលើតម្លៃមាស ដែលអាចជួយវិនិយោគិនឱ្យទទួលបានប្រាក់ចំណេញផងដែរ។
ចំណុចសំខាន់ចម្បងនោះ គឺមូលបត្របំណុលរបស់រដ្ឋាភិបាលសហរដ្ឋអាមេរិកបានឈានដល់កម្រិតខ្ពស់មួយ ដោយ ១ ឆ្នាំ លើសពី ១,៦% ហើយវាក៏ជាកំណត់ត្រាដ៏អស្ចារ្យមួយសម្រាប់មូលបត្របំណុលសហរដ្ឋអាមេរិកក្នុងរយៈពេល ១០ ឆ្នាំមកនេះ។ ដោយអត្រាមូលបត្របំណុលនៅតែបន្ដកើនឡើងខ្ពស់លើសពី ១,៥% វាបានបណ្តាលឱ្យវិនិយោគិនដកទំនុកចិត្តពីការវិនិយោគមាសមកទិញមូលបត្របំណុលវិញ។
ម្យ៉ាងវិញទៀត ដើម្បីសម្រេចបាននូវកញ្ចប់ថវិកាស្ដារសេដ្ឋកិច្ចចំនួន ១,៩ ពាន់ពាន់លានដុល្លារ សហរដ្ឋអាមេរិកក៏បានប្រើប្រាស់វិធីសាស្ដ្រលក់មូលបត្របំណុលនេះផងដែរ។
លោកស្រី Janet Yellen រដ្ឋលេខាធិការក្រសួងរតនាគារសហរដ្ឋអាមេរិកបាននិយាយកាលពីថ្ងៃចន្ទនៅលើគណនី Twitter របស់គាត់ថា៖ «កញ្ចប់ថវិកាស្ដារសេដ្ឋកិច្ចដែលមានទឹកប្រាក់ ១,៩ ពាន់ពាន់លានដុល្លារ របស់លោកប្រធានាធិបតី Joe Biden នឹងអាចផ្តល់ធនធានគ្រប់គ្រាន់ក្នុងការជំរុញការងើបឡើងវិញនៃសេដ្ឋកិច្ចរបស់សហរដ្ឋអាមេរិក» នៅក្នុងបទសម្ភាសជាមួយសារព័ត៌មាន MSNBC កាលពីថ្ងៃចន្ទដដែលនោះ លោកស្រីបានបញ្ជាក់ទៀតថា កញ្ចប់ថវិកាស្ដារសេដ្ឋកិច្ចនេះ គឺជាវិក្កយបត្រសង្គ្រោះពីជំងឺកូវីដ ១៩ ហើយវាពិតជាមានអត្ថប្រយោជន៍សម្រាប់ការងើបឡើងវិញនៃកំណើនសេដ្ឋកិច្ចសហរដ្ឋអាមេរិក។
លោកស្រីក៏សង្ឃឹមដែរថា អត្រាអ្នកមានការងារធ្វើនឹងវិលត្រឡប់មករកភាពពេញលេញឡើងវិញ ដែលជាភាពល្អប្រសើរនៃសកម្មភាពសេដ្ឋកិច្ច។
តាមរយៈសូចនាករសេដ្ឋកិច្ចខាងលើ លោក ឡុង សំណាង បានវិភាគថា តម្លៃមាសនឹងបន្ដធ្លាក់ចុះក្នុងចន្លោះ ១ ៧០៥ ទៅ ១ ៦៨៦ ដុល្លារ ក្នុង ១ អោនស៍ និងបានផ្ដល់យោបល់ដល់អ្នកជួញដូរឱ្យរង់ចាំទិញមាសក្នុងរយៈពេលវែង នៅពេលតម្លៃធ្លាក់ដល់ ១ ៦៨៦ ដុល្លារ ដោយកំណត់មុខងារកាត់យកប្រាក់ចំណេញនៅតម្លៃ ១ ៧២០ ដុល្លារ និងកំណត់មុខងារការពារហានិភ័យនៅតម្លៃ ១ ៦៦៨ ដុល្លារ ក្នុង ១ អោនស៍៕