ចាប់តាំងពីច្ងៃចន្ទសប្តាហ៍មុន តម្លៃមាសមានការប្រែប្រួលខ្លាំងពីតម្លៃ ១ ៨១៣ ដល់ ១ ៨៤៣ ដុល្លារក្នុង ១ អោនស៍ ទំនោរប្រែប្រួលខ្លាំងនេះអាចកើតឡើងដោយសារលទ្ធផលនៃការប្រកាសទិន្នន័យដ៏ខកចិត្តមួយក្នុងខែឧសភានេះ គឺការធ្លាក់ចុះនៃកំណើនការងាររបស់សហរដ្ឋអាមេរិក និងការដាក់សម្ពាធពីកំណើនសេដ្ឋកិច្ចនៅសហភាពអឺរ៉ុបទៅលើតម្លៃប្រាក់ដុល្លារអាមេរិក។
កាលពីថ្ងៃទី ៧ ខែឧសភា អត្រាការបង្កើតការងារធ្វើរបស់សហរដ្ឋអាមេរិកសម្រាប់ខែមេសាមានត្រឹមតែ ២៦៦ ពាន់នាក់ បើធៀបទៅនឹងខែមីនាមានរហូតដល់ ៧៧០ ពាន់នាក់ ហើយអត្រាអ្នកគ្មានការងារធ្វើបានកើនឡើងពី ៦% ទៅ ៦.១% ទោះបីជាវិធានការការពារជំងឺកូវីដ ១៩ មានភាពធូរស្រាលជាងមុន និងយុទ្ធនាការចាក់វ៉ាក់សាំងទទួលបានលទ្ធផលខ្ពស់ក៏ដោយ។
ដោយឡែកនៅសហភាពអឺរ៉ុបវិញ ដំណើរការសេដ្ឋកិច្ចមានការងើបឡើងយ៉ាងខ្លាំង ខណៈពេលដែលវិធានការទប់ស្កាត់ជំងឺកូវីដ ១៩ ទទួលបានលទ្ធផលល្អប្រសើរ។ ជាក់ស្ដែងគណៈកម្មការសហភាពអឺរ៉ុបបានផ្តល់អនុសាសន៍ថា៖
«រដ្ឋដែលជាសមាជិកទាំងអស់អាចធ្វើការ បន្ធូរបន្ថយ និងអនុញ្ញាតឱ្យភ្ញៀវទេសចរចូលកម្សាន្តក្នុងប្រទេសបាន»។ ដូច្នេះការងើបឡើងនៃកំណើនសេដ្ឋកិច្ចនៅសហភាពអឺរ៉ុបនេះក៏បានដាក់សម្ពាធទៅលើតម្លៃប្រាក់ដុល្លារអាមេរិកដូចគ្នាដែរ។
ក្រៅពីកត្តាខាងលើនេះ បើយោងតាមលទ្ធផលនៃការស្ទង់មតិតាមប្រព័ន្ធអនឡាញរបស់ KITCO អំពីទំនោររបស់តម្លៃមាសបានឱ្យដឹងថា ក្នុងចំណោម ១ ៤៨៥ សំឡេង គឺមានរហូតដល់ ៧៦% រំពឹងថាមាសនឹងកើនឡើងនៅសប្តាហ៍ក្រោយ។
លោក OLE HANSEN ប្រធានយុទ្ធសាស្ត្រទីផ្សាររបស់ធនាគារ SAXO BANK ក៏បានបញ្ជាក់ដែរថា៖ «តម្លៃមាសអាចនឹងបន្តកើនឡើងដោយសារតែទិន្នផលមូលបត្របំណុលធ្លាក់ចុះ ដែលជាកត្តាជំរុញឱ្យវិនិយោគិនសម្រេចប្តូរគោលដៅ ដោយធ្វើការទិញមាសជំនួសវិញដើម្បីទប់ស្កាត់ការខាតបង់ក្នុងពេលខាងមុខ»។
ដូច្នេះសម្រាប់ការវិភាគលើការជួញដូរក្នុងសប្ដាហ៍នេះ អ្នកជួញដូរគួរទិញមាសនៅតម្លៃ ១ ៧៩៨ ដុល្លារក្នុង ១ អោនស៍ ដោយកំណត់មុខងារយកប្រាក់ចំណេញទី ១ នៅតម្លៃ ១ ៨១៥ ឬទី ២ នៅតម្លៃ ១ ៨២៣ និងកំណត់មុខងារបញ្ឈប់ហានិភ័យនៅតម្លៃ ១ ៧៩០៕