The Phnom Penh Post Search

Search form




Logo of Phnom Penh Post newspaper Phnom Penh Post - តៃវ៉ាន់​នឹង​បើក​មជ្ឈមណ្ឌល​ពាណិជ្ជកម្ម​នៅ​ក្រុង​ភ្នំពេញ

តៃវ៉ាន់​នឹង​បើក​មជ្ឈមណ្ឌល​ពាណិជ្ជកម្ម​នៅ​ក្រុង​ភ្នំពេញ

តៃវ៉ាន់​នឹង​បើក​មជ្ឈមណ្ឌល​ពាណិជ្ជកម្ម​នៅ​ក្រុង​ភ្នំពេញ

ភ្នំពេញៈ មន្ដ្រី​ក្រុម​ប្រឹក្សា​អភិវឌ្ឍន៍​ពាណិជ្ជកម្ម​ក្រៅ​ប្រទេស​របស់​តៃវ៉ាន់ (TAITRA) បាន​ប្រាប់​សារ​ព័ត៌មាន​តៃវ៉ាន់​កាល​ពី​ថ្ងៃ​ព្រហស្បតិ៍​ថា តៃវ៉ាន់​នឹង​បើក​មជ្ឈ​មណ្ឌល​ពាណិជ្ជ​នៅ ទីក្រុង​ភ្នំពេញ នៅ​ខែ​ក្រោយ​ក្នុង​គោល​បំណង​បង្កើន​ពាណិជ្ជកម្ម និង​ការ​វិនិយោគ​នៅ​ក្នុង​ប្រទេស​នេះ។

មន្ដ្រី​របស់ TAITRA បាន​ថ្លែង​ថា ពួក​គេ​បាន​ទទួល​ការ​យល់​ព្រម​ពី​រដ្ឋាភិបាល​កម្ពុជា​ដើម្បី​បើក​មជ្ឈ​មណ្ឌល​នេះ​ដែល​ត្រូវ​បាន​រំពឹង​ថា នឹង​បើក​ដំណើរការ​នៅ​ខែ​ក្រោយ ដោយ​លើក​ឡើង​ថា កម្ពុជា គឺជា​ប្រទេស​អាស៊ាន ទី៨ ដែល​ជា​ទីផ្សារ​នាំ​ចេញ​ឈាន​មុខ​គេ​ទី​ពីរ​របស់​តៃវ៉ាន់។

តាម​សារ​ព័ត៌មាន​នេះ លោក Wang Chih-kang ប្រធាន TAITRA ដែល​គ្រោង​នឹង​ចូល​រួម​ពិធី​បើក​ដំណើរ​ការ​មជ្ឈមណ្ឌល​ពាណិជ្ជកម្ម​នេះ បាន​ថ្លែង​កាល​ពី​ម្សិល​មិញ​ថា នេះ​ជា​ជំហាន​មួយ​ដើម្បី​ធ្វើ​ទំនាក់​ទំនង​បន្ថែម​ទៀត​ជាមួយ​បណ្ដា​ប្រទេស​អាស៊ាន​ដែល​ជួយ​ជំរុញ​ឱកាស​ចូល​រួម​នៃ​ភាព​ជា​ដៃ​គូ​សេដ្ឋកិច្ច​ទូលំ​ទូលាយ​ក្នុង​តំបន់​របស់​ប្រទេស​នេះ។

លោក ងួន ម៉េងតិច អគ្គ​នាយក​សភា​ពាណិជ្ជកម្ម​កម្ពុជា (CCC) បាន​សាទរ​ជា​មួយ​ការ​បង្កើត​ឡើង​នេះ។

លោក​បាន​បញ្ជាក់​ថា៖ «ពិត​ហើយ ច្បាស់​ណាស់​វា​គឺ​ជា​សញ្ញា​មួយ​ដ៏​ល្អ​បំផុត​សម្រាប់​ប្រទេស​យើង​ដែល​យើង​មាន​ការិយាល័យ​របស់ TAITRA ដោយ​សារ​តែ​វា​នឹង​ធ្វើ​ជា​វេទិកា​នៅ​ក្នុង​ការ​លើក​កម្ពស់​លំហូរ​ចូល​ទុន និង​ការ​វិនិយោគ​កាន់​តែ​ច្រើន​ពី​តៃវ៉ាន់​មក​កាន់​ប្រទេស​យើង»។

លោក​បន្ត​ថា៖ «ខ្ញុំ​កំពុង​រង់​ចាំ​អស់​រយៈ​ពេល​ដ៏​យូរ​មក​ហើយ​ខណៈ​ខ្ញុំ​បាន​ផ្ដល់​យោបល់​ដល់​អតីត​រដ្ឋ​មន្ដ្រី​ពាណិជ្ជកម្ម ចម ប្រសិទ្ធ ពីរ​ដង​រួច​មក​ហើយ ប៉ុន្តែ​មិន​មាន​ការ​ឆ្លើយ​តប។ អ្នក​ដឹង​ហើយ TAITRA នេះ​បាន​ទាក់​ទាញ​លំហូរ​ទុន​វិនិយោគ​ជាង ៣០ ពាន់​លាន​ដុល្លារ​ទៅ​ក្នុង ប្រទេស​វៀតណាម កាល​ពី​ឆ្នាំ​មុន»។

លោក​បាន​លើក​ឡើង​ថា៖ «ពិត​ហើយ ទោះ​បី​ជា​ប្រទេស​របស់​យើង​គោរព​តាម​គោល​នយោបាយ ប្រទេស​ចិន តែ​មួយ​ក៏​ដោយ ប៉ុន្តែ​ពាណិជ្ជកម្ម និង​នយោបាយ​គឺជា​រឿង​ខុស​គ្នា។ បើ​យើង​មាន TAITRA នោះ​គឺជា​ព័ត៌មាន​ដ៏​ល្អ​បំផុត​ចំពោះ​ការ​អភិវឌ្ឍ​សេដ្ឋកិច្ច​របស់​យើង។ ខ្ញុំ​គិត​ថា យ៉ាង​ហោច​ណាស់​ក៏​យើង​អាច​ទាក់​ទាញ​ទឹក​ប្រាក់​ប្រហែល ១០ ពាន់​លាន​ដុល្លារ​ក្នុង​មួយ​ឆ្នាំៗ​ដែរ»។

តៃវ៉ាន់​មាន​ការិយាល័យ​ដូច​គ្នា​ដើម្បី​លើក​កម្ពស់​ពាណិជ្ជកម្ម​ទ្វេ​ភាគី​នៅ​ក្នុង ប្រទេស​ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ មីយ៉ាន់ម៉ា និង ប្រទេស​វៀតណាម។

មិន​អាច​ទាក់​ទង​លោក ស៊ុន ចាន់ថុល រដ្ឋ​មន្ដ្រី​ក្រសួង​ពាណិជ្ជកម្ម បាន​ទេ​ពី​ថ្ងៃ​ម្សិល​មិញ។

យោង​តាម​ព័ត៌មាន តៃវ៉ាន់ ក្នុង​ចំណោម​សេដ្ឋកិច្ច​អាស៊ាន កម្ពុជា​ត្រូវ​បាន​សម្លឹង​មើល​ដោយ​ពាណិជ្ជករ​តៃវ៉ាន់​ជា​ទិស​ដៅ​វិនិយោគ​ដ៏​មាន​សក្ដានុពល​មួយ​បន្ទាប់​ពី​ការ​ធ្វើ​កូដកម្ម​ប្រឆាំង ចិន នៅ​ក្នុង ប្រទេស​វៀតណាម កាល​ពី ខែ​ឧសភា ដែល​បណ្ដាល​ឲ្យ​មាន​ការ​ខូច​ខាត​ដ៏​ធ្ងន់​ធ្ងរ​ដល់​រោងចក្រ​ជាច្រើន​វិនិយោគ​ដោយ​តៃវ៉ាន់។

តួលេខ​បង្ហាញ​ថា កាល​ពី​ឆ្នាំ​មុន ការ​នាំ​ចេញ​របស់ តៃវ៉ាន់ មក កម្ពុជា មាន​សរុប ៧០៦ លាន​ដុល្លារ​កើន​ជាង​ពីរ​ដង​បើ​ធៀប​នឹង ឆ្នាំ​២០០៩៕

អត្ថបទគួរចាប់អារម្មណ៍