.jpg)
ឆ្នេរសមុទ្របាក់ខ្លង ខេត្តកោះកុង។ រូបថត ហ្វេសប៊ុក
កំពតៈ ភាពសម្បូរបែបនៃធនធានធម្មជាតិនៅតាមឆ្នេរសមុទ្រ និងកោះ គឺជាឧត្តមភាពប្រកួតប្រជែងក្នុងការអភិវឌ្ឍវិស័យទេសចរណ៍នៅកម្ពុជា ខណៈទីនោះកំពុងទទួលបាននូវកំណើនភ្ញៀវជាបន្តបន្ទាប់។ នេះបើតាមរដ្ឋមន្ត្រីក្រសួងទេសចរណ៍។
ក្នុងពិធីបើកព្រឹត្តិការណ៍បុណ្យសមុទ្រលើកទី ៨ ជុំទី ២ នៅខេត្តកំពតកាលពីថ្ងៃសៅរ៍លោក ថោង ខុន រដ្ឋមន្ត្រីក្រសួងទេសចរណ៍ថ្លែងថា លក្ខណៈអំណោយផលពីធម្មជាតិ និងគោលនយោបាយរបស់រដ្ឋាភិបាលកម្ពុជាក្នុងការអភិវឌ្ឍតំបន់ឆ្នេរសមុទ្រប្រកបដោយនិរន្តរភាពធ្វើឲ្យឆ្នេរសមុទ្រកម្ពុជា ជាប់ជាឆ្នេរស្អាតបំផុតលើពិភពលោក។
លោកបន្តថា ជាមួយនឹងកិត្តិនាមនេះបានធ្វើឲ្យតំបន់ឆ្នេរសមុទ្រកម្ពុជាទាក់ទាញបាននូវកំណើនភ្ញៀវទេសចរជារៀងរាល់ឆ្នាំ។ លោកថ្លែងថា៖ «ភាពសម្បូរបែបនៃធនធានធម្មជាតិ និងវប្បធម៌នៅតាមឆ្នេរសមុទ្រ និងកោះនានា គឺជាឧត្តមភាពប្រកួតប្រជែងក្នុងការអភិវឌ្ឍវិស័យទេសចរណ៍។
បើតាមលោក ថោង ខុន សម្រាប់ឆ្នាំ ២០១៩ នេះតំបន់ឆ្នេរកម្ពុជារំពឹងថា នឹងទទួលបានភ្ញៀវទេសចរអន្តរជាតិប្រមាណ ១,៣ លាននាក់កើនឡើង ៤,៥ ភាគរយ និងទេសចរជាតិមានប្រមាណ ៣,៤ លាននាក់កើនឡើង ៣ ភាគរយ។
ដោយឡែកឆ្នាំ ២០២០ ខាងមុខតាមការព្យាករ តំបន់ឆ្នេរសមុទ្រកម្ពុជានឹងទទួលបានភ្ញៀវទេសចរអន្តរជាតិ ១,៧ លាននាក់ និងភ្ញៀវទេសចរជាតិប្រមាណ ៣,៥ លាននាក់ ហើយនៅឆ្នាំ ២០៣០ តំបន់ឆ្នេរសមុទ្រនឹងទទួលបានភ្ញៀវទេសចរអន្តរជាតិប្រមាណ ៧,៥ លាននាក់ ក្នុងកំណើន ១០ ភាគរយ និងភ្ញៀវទេសចរជាតិប្រមាណ ៥,៥ លាននាក់ កើនឡើងជាមធ្យម ៥ ភាគរយ។
លោកនាយករដ្ឋមន្ត្រី ហ៊ុន សែន បានថ្លែងថា វិស័យទេសចរណ៍កម្ពុជានៅពេលនេះមិនមែនពឹងផ្អែកតែទៅលើតំបន់ប្រាសាទនោះទេ ពោលកម្ពុជាបាននិងកំពុងកែច្នៃតំបន់ទេសចរណ៍ចម្រុះបន្ថែមទៀតជាច្រើន។
លោកបន្តថា ដើម្បីរក្សាបាននូវភាពទាក់ទាញនេះ គឺមិនត្រូវបណ្តោយឲ្យតំបន់ឆ្នេរសមុទ្រកម្ពុជាត្រូវបានបំផ្លាញដោយទឹកស្អុយការចាក់ដីចូល ឬការកាប់ព្រៃកោងកាងដើម្បីទន្ទ្រានយកដីនោះទេ ហើយត្រូវរក្សាឲ្យបាននូវតំបន់ឆ្នេរដែលស្អាត។ លោកថ្លែងថា៖ «មិនត្រូវឲ្យឆ្នេរសមុទ្ររបស់កម្ពុជាត្រូវបានដកចេញពី [ក្លិបឆ្នេរសមុទ្រដែលស្អាតបំផុតលើសកលលោក] នោះទេ»។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាឲ្យដឹងថាតំបន់ឆ្នេរសមុទ្រកម្ពុជានៅមិនទាន់មានការអភិវឌ្ឍឲ្យបានខ្លាំងក្លាទេ។ តំបន់ឆ្នេរនឹងអាចទាក់ទាញបានភ្ញៀវទេសចរកាន់តែច្រើន បើមានការអភិវឌ្ឍទៅហេដ្ឋារចនាសម្ព័ន្ធ និងបដិសណ្ឋារកិច្ចបន្ថែម៕
